ଭୁବନେଶ୍ବର: ଏମ୍ସ ଭୁବନେଶ୍ବର କୌଣସି ଗୁଣରେ ଏମ୍ସ ଦିଲ୍ଲୀ ଠାରୁ କମ୍ ନୁହେଁ। ଓଡ଼ିଶାରେ ପ୍ରତିଷ୍ଠିତ ଏହି ଜାତୀୟ ପ୍ରତିଷ୍ଠାନ ରାଜ୍ୟ ତଥା ରାଜ୍ୟ ବାହାର ଲୋକଙ୍କୁ ଗୁଣବତ୍ତାପୂର୍ଣ୍ଣ ସ୍ବାସ୍ଥ୍ୟସେବା ପ୍ରଦାନ କରୁଛି। ଏହାକୁ ଆହୁରି ଆଗକୁ ନେବା ସହିତ ଦେଶରେ ଏକ ନମ୍ବର କରିବାକୁ ଆହ୍ବାନ ଦେଇଛନ୍ତି କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ଏବଂ ରସାୟନ ଏବଂ ସାର ମନ୍ତ୍ରୀ ଜଗତ ପ୍ରକାଶ ନଡ୍ଡା। ଆଜି ଏମ୍ସ ଭୁବନେଶ୍ୱର ପରିଦର୍ଶନ କରିବା ସହିତ ଏପରି ଢଙ୍ଗରେ ଏହି ଅନୁଷ୍ଠାନକୁ ପ୍ରଶଂସା କରିବା ସହିତ ଅଙ୍ଗୀକାରବଦ୍ଧ ହୋଇ ଆହୁରି ଅଧିକ କାମ କରିବାକୁ ଆହ୍ବାନ ଦେଇଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ନଡ୍ଡା।
ପ୍ରତିଷ୍ଠା ହେବ ପୂର୍ବ ଭାରତର ପ୍ରଥମ ସରକାରୀ ପରିଚାଳିତ ସ୍କିନ୍(ଚର୍ମ) ବ୍ୟାଙ୍କ
ଏଥିସହିତ ଏମ୍ସ ଭୁବନେଶ୍ୱରରେ ପୂର୍ବ ଭାରତର ପ୍ରଥମ ସରକାରୀ ପରିଚାଳିତ ସ୍କିନ୍(ଚର୍ମ) ବ୍ୟାଙ୍କ ଖୁବ୍ ଶୀଘ୍ର ପ୍ରତିଷ୍ଠା ହେବା ନେଇ ମଧ୍ୟ ଘୋଷଣା କରିଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ। ଏହି ଗୁରୁତ୍ୱପୂର୍ଣ୍ଣ ସୁବିଧା ମୃତ୍ୟୁର ୬ ଘଣ୍ଟା ମଧ୍ୟରେ ଦାତାଙ୍କ ଠାରୁ ଚର୍ମ ସଂଗ୍ରହ କରାଯିବ। ମୁମ୍ବାଇ ଏବଂ ବେଙ୍ଗାଲୁରୁର କେନ୍ଦ୍ର ଉପରେ ବର୍ତ୍ତମାନର ନିର୍ଭରଶୀଳତାକୁ ଦୂର କରି, ତୀବ୍ର ପୋଡ଼ିଯାଇଥିବା ରୋଗୀଙ୍କ ପାଇଁ ଜୀବନରକ୍ଷାକାରୀ ଚର୍ମ ପ୍ରତିରୋପଣ ପ୍ରଦାନ କରିବ। ଏହି ସ୍କିନ୍ ବ୍ୟାଙ୍କ୍ ପୋଡ଼ା ରୋଗୀଙ୍କ ଜୀବନର ମାନକୁ ଉନ୍ନତ କରିବା ସହିତ ଓଡ଼ିଶା ଏବଂ ପଡ଼ୋଶୀ ରାଜ୍ୟର ଏପରି ରୋଗୀଙ୍କ ଜୀବନର ଗୁଣବତ୍ତା ମଧ୍ୟ ଉଲ୍ଲେଖନୀୟ ଭାବରେ ବୃଦ୍ଧି କରିବ ବୋଲି ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଆଶୁତୋଷ ବିଶ୍ୱାସ କହିଛନ୍ତି।
ଅତ୍ୟାଧୁନିକ କେନ୍ଦ୍ରୀୟ ଗବେଷଣା ପ୍ରୟୋଗଶାଳାକୁ ଉଦଘାଟନ
ଅତ୍ୟାଧୁନିକ କେନ୍ଦ୍ରୀୟ ଗବେଷଣା ପ୍ରୟୋଗଶାଳାକୁ ଉଦଘାଟନ କରିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ। ଯାହାକି ଚିକିତ୍ସା ନବସୃଜନ ଏବଂ ଅନୁବାଦମୂଳକ ଗବେଷଣାର ଏକ ଶକ୍ତିଶାଳୀ କେନ୍ଦ୍ର ଭାବରେ ପରିକଳ୍ପିତ କରାଯାଇଛି। ଏହି ସୁବିଧା ବୈଜ୍ଞାନିକ ଆବିଷ୍କାର ପାଇଁ ଏକ ଉତ୍ପ୍ରେରକର ଭୂମିକା ନିର୍ବାହ କରିବା ସହିତ ଅଗ୍ରଣୀ ଚିକିତ୍ସା ଏବଂ ସ୍ୱାସ୍ଥ୍ୟସେବା ସମାଧାନ ନିମନ୍ତେ ପଥ ଉନ୍ମୁକ୍ତ କରିବ ବୋଲି ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ବାସ ପ୍ରକାଶ କରିଛନ୍ତି। ସେହିପରି ମଲ୍ଟିୟୁଟିଲିଟି ଏବଂ ଗ୍ୟାଷ୍ଟ୍ରୋନୋମି ବ୍ଲକ୍ର ଭିତ୍ତିପ୍ରସ୍ତର ସ୍ଥାପନ କରି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ସାମଗ୍ରିକ ବିକାଶ ପ୍ରତି ସରକାରଙ୍କ ପ୍ରତିବଦ୍ଧତାକୁ ସୁନିଶ୍ଚିତ କରିଛନ୍ତି। ଏହି ବ୍ଲକରେ ଛାତ୍ରଛାତ୍ରୀ, ଅଧ୍ୟାପକ ଅଧ୍ୟାପିକା, କର୍ମଚାରୀ ଏବଂ ଜନସାଧାରଣଙ୍କ ପାଇଁ ଅତ୍ୟାବଶ୍ୟକ ସମସ୍ତ ସେବା ଉପଲବ୍ଧ ରହିବ।
ଡିଜିଟାଲ୍ ଉପରେ ଗୁରୁତ୍ବ
ତେବେ ପ୍ରତିଷ୍ଠାନରେ ଡିଜିଟାଲ୍ ପରିବର୍ତ୍ତନ ଯାତ୍ରାର ଏକ ଅଂଶ ଭାବରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେପି ନଡ୍ଡା ଏମ୍ସ ଭୁବନେଶ୍ୱରର ଏକ ନୂତନ ୱେବସାଇଟ୍କୁ ଉନ୍ମୋଚନ କରିଛନ୍ତି। ଏହି ୱେବସାଇଟ୍ରେ ରୋଗୀ- କୈନ୍ଦ୍ରିକ ସେବା, ସମନ୍ୱିତ କାର୍ଯ୍ୟକ୍ଷମତା ଏବଂ ଓଡ଼ିଶାର ସାଂସ୍କୃତିକ ଐତିହ୍ୟର ଏକ ସ୍ପନ୍ଦନଶୀଳ ପ୍ରଦର୍ଶନ ରହିଛି। ରୋଗୀ ଏବଂ ସେମାନଙ୍କର ସମ୍ପର୍କୀୟଙ୍କ ପାଇଁ ସ୍ୱାସ୍ଥ୍ୟସେବା ସେବାର ସୁଗମତା ପାଇଁ ଏହା ଡିଜାଇନ୍ କରାଯାଇଛି। ଇଏଚ୍ଏସ କ୍ଲିନିକ୍ ଏବଂ ଅମୃତ ଫାର୍ମାସିର ମଧ୍ୟ ଉଦ୍ଘାଟନ କରିଛନ୍ତି। ଏହି ସେବା ଏମ୍ସ କର୍ମଚାରୀଙ୍କ ନିମନ୍ତେ ସୁଲଭ ଔଷଧ ଏବଂ ଅତ୍ୟାବଶ୍ୟକ ସେବାର ଉପଲବ୍ଧତାକୁ ଆହୁରି ସୁଦୃଢ଼ କରିବ।
ରୋଗୀଙ୍କ ସହ କଥା ହେଲେ ଜେପି ନଡ୍ଡା
ସିଧାସଳଖ ଡାକ୍ତରୀ, ନର୍ସିଂ ଛାତ୍ରଛାତ୍ରୀ, ସଫେଇ କର୍ମଚାରୀ ଏବଂ ରୋଗୀଙ୍କ ସହିତ ସିଧାସଳଖ ଭାବବିନିମୟ କରିଛନ୍ତି ଜେପି ନଡ୍ଡା । କେନ୍ଦ୍ର ସ୍ବାସ୍ଥ୍ୟମନ୍ତ୍ରୀଙ୍କର ଏହି ଭାବନା ସମସ୍ତଙ୍କୁ ପ୍ରେରଣା ପ୍ରଦାନ କରିଛି । ତେବେ ଏହି କାର୍ଯ୍ୟକ୍ରମରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେପି ନଡ୍ଡାଙ୍କ ସହିତ ଏମ୍ସ ଭୁବନେଶ୍ୱର ଅଧ୍ୟକ୍ଷ ଡ. ଶୈଳେଶ କୁମାର, କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସ, କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଯୁଗ୍ମ ସଚିବ ଅଙ୍କିତା ବୁନ୍ଦେଲା ମିଶ୍ର, ରାଜ୍ୟ ସ୍ବାସ୍ଥ୍ୟ ସଚିବ ଅଶ୍ବଥୀ ଏସ୍, ଡିନ୍ ଡ. ପ୍ରଶାନ୍ତ ରାଘବ ମହାପାତ୍ର, ଡ. ସୌଭାଗ୍ୟ କୁମାର ଜେନା, ଡ. ସତ୍ୟଜିତ ମିଶ୍ର, ଡିଡିଏ ଲେଫ୍ଟନାଣ୍ଟ କର୍ଣ୍ଣେଲ ଅଭିଜିତ ସରକାର, ମେଡିକାଲ୍ ଅଧୀକ୍ଷକ ଡ. ଦିଲ୍ଲୀପ କୁମାର ପରିଡ଼ା, ବରିଷ୍ଠ ପ୍ରଶାସନିକ ଅଧିକାରୀ ରଶ୍ମି ରଞ୍ଜନ ସେଠୀ ପ୍ରମୁଖ ଉପସ୍ଥିତ ରହିଥିଲେ ।
ଏହା ମଧ୍ୟ ପଢନ୍ତୁ ଗରିବ ସେବା ଭଗବାନ ସେବା: ପତିଙ୍କ ରାସ୍ତାରେ ପତ୍ନୀ, ଖୋଲିଲେ ଟଙ୍କିକିଆ ଦାନ୍ତ କ୍ଲିନିକ
ଏହା ମଧ୍ୟ ପଢନ୍ତୁ ଓଡ଼ିଶାରେ ଲାଗୁ ହେଲା ଆୟୁଷ୍ମାନ ଭାରତ, ଗୋଟିଏ କାର୍ଡରେ ସାରା ଦେଶରେ ମାଗଣା ଚିକିତ୍ସା !
