ଭବାନୀପାଟଣା: ବେଆଇନ୍ ବିସ୍ପୋରକ ସାମଗ୍ରୀ ଚାଲାଣ ବେଳେ ମାଡ଼ି ବସିଲା ପୋଲିସ । ବିପୁଳ ପରିମାଣର ବିସ୍ଫୋରକ ସାମଗ୍ରୀ ଜବତ, 4 ଜଣ ଗିରଫ । କଳାହାଣ୍ଡି ଏସପିଙ୍କ ନିର୍ଦ୍ଦେଶରେ ଜୟପାଟଣା ଥାନା ଅନ୍ତର୍ଗତ ଜାମଚୁଆ କ୍ରସରରୁ ସାଢ଼େ ୬ କ୍ବିଣ୍ଟାଲ ବିସ୍ଫୋରକ ସହ ୧୧୫ଟି ଡିଟୋନେଟର ଜବତ କରିଛି ପୋଲିସ । ଗୋଟିଏ ଟ୍ରକ ଆଉ ଗୋଟିଏ ପିକଅପ ଭ୍ୟାନରେ ଲାଖବାହାଳି କ୍ରସରକୁ ବେଆଇନ ଭାବେ ଏହି ବିସ୍ଫୋରକ ସାମଗ୍ରୀ ଚାଲାଣ ହେଉଥିଲା ।
ସାଢ଼େ ୬ କ୍ବିଣ୍ଟାଲ ବିସ୍ଫୋରକ ସାମଗ୍ରୀ ଜବତ:
ଏନେଇ ଖଣି ବିଭାଗ ପକ୍ଷରୁ ଜୟପାଟଣା ଥାନାରେ ଅଭିଯୋଗ କରାଯାଇଛି । ଉକ୍ତ ବିସ୍ଫୋରକ ସାମଗ୍ରୀ ଏକ କମ୍ପାନୀର ଦୁଇ ଜଣ ବ୍ୟକ୍ତି କଣ୍ଟାବାଞ୍ଜିରୁ ଲାଖବାହାଳି କ୍ରସରକୁ ଚାଲାଣ କରୁଥିଲେ । ତେବେ ସେ କିପରି ଏତେ ପରିମାଣରେ ବିସ୍ଫୋରକ ପରିବହନ କରୁଥିଲେ ଓ ଏହା କେଉଁଠାକୁ ଯାଉଥିଲା ? ତାହାର ତଦନ୍ତ ଆରମ୍ଭ ହୋଇଛି । ବର୍ତ୍ତମାନ ଖଣି ବିଭାଗ ଅଧିକାରୀ ଓ ଜୟପାଟଣା ପୋଲିସ ତଦନ୍ତ ଆରମ୍ଭ କରିଛନ୍ତି । ଏତେ ପରିମାଣର ବିସ୍ପୋରକ ଗଚ୍ଛିତ ରଖିବା ପାଇଁ କ୍ରସର ମାଲିକଙ୍କ ପାଖରେ ଲାଇସେନ୍ସ ନଥିବା ବେଳେ କେମିତି ଏତେ ପରିମାଣର ବିସ୍ଫୋରକ ଗଚ୍ଛିତ ରଖିଥିଲେ , ସେନେଇ ତଦନ୍ତ ଚାଲିଥିବା ଏକ ପ୍ରେସ ବିଜ୍ଞପ୍ତି ଜରିଆରେ କଳାହାଣ୍ଡି ପୋଲିସ ସୂଚନା ଦେଇଛନ୍ତି ।
ଏପରି କହିଲେ ଜୟପାଟଣା ଥାନା ଅଧିକାରୀ :
ଏନେଇ ଜୟପାଟଣା ଥାନା ଅଧିକାରୀ ମମତା ହେମ୍ବ୍ରମ କହିଛନ୍ତି,"ଆମ ଥାନା ଅଞ୍ଚଳରେ ଏସପିଙ୍କ ନିର୍ଦ୍ଦେଶ ଅନୁସାରେ ଗତକାଲି ରାତିରେ ଖଣି ବିଭାଗ ଓ ପୋଲିସର ମିଳିତ ଚଢାଉ ବେଳେ ବିପୁଳ ପରିମାଣର ବିସ୍ପୋରକ ସାମଗ୍ରୀ ଜବତ ହୋଇଥିଲା । ଏହି ଘଟଣାରେ ୪ ଜଣଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି । ୬ ହଜାର ୫୦୦ ଶହ କେଜି ବିସ୍ଫୋରକ ଅଛି, ଯାହା ଲକ୍ଷାଧିକ ଟଙ୍କାର ହେବ । " ସେପଟେ ଏହା ପୂର୍ବରୁ ଗତ 27ରେ ସୁନ୍ଦରଗଡ଼ ବାଙ୍କୋ ଅଞ୍ଚଳରୁ ମାଓବାଦୀ ମାନେ ବିଫୁଳ ବିସ୍ଫୋରକ ସାମଗ୍ରୀ ଲୁଟ କରିବା ଘଟଣା ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା ।
ଇଟିଭି ଭାରତ, କଳାହାଣ୍ଡି
