ସାନଖେମୁଣ୍ଡିରେ ଝାଡ଼ାବାନ୍ତି: ଦିନକରେ 3 ମୃତ୍ୟୁ ଅଭିଯୋଗ, 10 ଆକ୍ରାନ୍ତ
ଗଂଜାମ ଜିଲ୍ଲା ଦାମପୁରରେ ବ୍ୟାପୁଛି ଝାଡ଼ାବାନ୍ତି । ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଲେ ମୃତ୍ୟୁର କାରଣ ଡାଇରିଆ ନୁହେଁ ।
Published : July 24, 2025 at 10:25 AM IST
|Updated : July 24, 2025 at 1:17 PM IST
DIARRHEA IN SANKHEMUNDI ବ୍ରହ୍ମପୁର(ଗଞ୍ଜାମ): ଗଂଜାମ ଜିଲ୍ଲା ସାନଖେମୁଣ୍ଡି ବ୍ଳକ ଦାମପୁରରେ ଝାଡ଼ାବାନ୍ତି ଆତଙ୍କ । ଦୁଇ/ତିନି ଦିନରେ ଝାଡ଼ାବାନ୍ତିରେ ୧୦ ଜଣ ଆକ୍ରାନ୍ତ ହେବା ସହ ତିନି ଜଣଙ୍କ ଜୀବନ ଯାଇଥିବା ଅଭିଯୋଗ ହୋଇଛି । ଡାକ୍ତରୀ ଟିମ ଦାମପୁରରେ ପହଞ୍ଚି ଅନୁଧ୍ୟାନ କରୁଛି।
ମୃତ ୩ ଜଣ ଟି. ଗୋବିନ୍ଦପୁର ପଞ୍ଚାୟତ ଦାମପୁର ଗ୍ରାମର । ଗୋଟିଏ ଦିନରେ ଜଣେ ମହିଳା ସମେତ ତିନି ଜଣଙ୍କ ମୃତ୍ୟୁ ଘଟିବା ପରେ ଗାଁରେ ଆତଙ୍କ ଖେଳି ଯାଇଛି । ଅନ୍ୟପକ୍ଷେ ଦିନକୁ ଦିନ ଆକ୍ରାନ୍ତ ସଂଖ୍ୟା ବୃଦ୍ଧି ପାଇବାରେ ଲାଗିଛି । ସେପଟେ ଗ୍ରାମରେ ସ୍ୱାସ୍ଥ୍ୟ ବିଭାଗ ଟିମ୍ ପହଞ୍ଚି କାହିଁକି ଏବଂ କେଉଁ କାରଣରୁ ଝାଡାବାନ୍ତି ହୋଇଛି ତାହାର ଅନୁଧ୍ୟାନ କରୁଛି । ତେବେ ମୃତ୍ୟୁର କାରଣ ଡାଇରିଆ ନୁହେଁ ବୋଲି କହିଛନ୍ତି ଗଞ୍ଜାମ ଜିଲ୍ଲାର ସ୍ୱାସ୍ଥ୍ୟ ବିଭାଗ ।
କଣ କହିଲେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ
ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା.ସୁଶାନ୍ତ କୁମାର ନାୟକ ଗଣମାଧ୍ୟମକୁ କହିଛନ୍ତି, " ଆଡପଡା ସ୍ୱାସ୍ଥକେନ୍ଦ୍ରରୁ ଏକ ଟିମ୍ ସଂପୃକ୍ତ ଅଞ୍ଚଳକୁ ଯାଇଛନ୍ତି । ଝାଡାବାନ୍ତିରେ ତିନି ଜଣ ମରିଥିବା ଗାଁ ଲୋକେ କହୁଥିବା ବେଳେ ସ୍ୱାସ୍ଥବିଭାଗ ପକ୍ଷରୁ ତାହାକୁ ଅନୁଧ୍ୟାନ କରାଯାଉଛି । " ତେବେ ଝାଡାବାନ୍ତି ଯେପରି ହୋଇଥାଏ ଏହା ସେହିପରି ନୁହେଁ ବୋଲି ଅନୁମାନ କରାଯାଉଛି ବୋଲି କହିଛନ୍ତି ସିଡିଏମ୍ଓ । ଏପରିକି ଗ୍ରାମବାସୀଙ୍କ ପାଇଁ ପନୀୟ ଜଳର ସୁବିଧା ରହିଥିବା ବେଳେ ସରକାରଙ୍କ ବସୁଧା ଯୋଜନାରେ ପାନୀୟ ଜଳ ଯୋଗାଇ ଦିଆଯାଉଥିବା ସେ କହିିଛନ୍ତି ।
ସେପଟେ ଗ୍ରାମବାସୀଙ୍କ କହିବା ଅନୁଯାୟୀ, ପ୍ରଥମ ଦିନରେ ଦୁଇ ଜଣ ଆକ୍ରାନ୍ତ ସମ୍ବାରୁ ମଲ୍ଲିକ (୬୦) ଏବଂ କାନ୍ଦରା ମଲ୍ଲିକ(୬୨) ଙ୍କ ମୃତ୍ୟୁ ଘଟିଥିଲା । ପରେ ଅନ୍ୟଜଣଙ୍କ ମୃତ୍ୟୁ ଘଟିଥିଲା । ଇତିମଧ୍ୟରେ ମୋଟ ତିନି ଜଣଙ୍କ ଜୀବନ ଯାଇଥିବା ବେଳେ ଅନେକ ଆକ୍ରାନ୍ତ ବିଭିନ୍ନ ମେଡିକାଲରେ ଭର୍ତ୍ତି ହୋଇଛନ୍ତି ।
ଗ୍ରାମରେ ଭ୍ରାମ୍ୟମାଣ ମେଡିକାଲ ଓ ବୈଷୟିକ ଟିମ୍
ଝାଡାବାନ୍ତି ବ୍ୟାପିବା ଖବର ପାଇବା ପରେ ଭ୍ରାମ୍ୟମାଣ ମେଡିକାଲ ଟିମ୍ ଦାମପୁର ଗ୍ରାମରେ ପହଞ୍ଚିଛି । କାହିଁକି ଝାଡ଼ାବାନ୍ତି ବ୍ୟାପିଲା ଏବଂ କେଉଁ କାରଣରୁ ତିନିଜଣଙ୍କର ଗୋଟିଏ ଦିନରେ ମୃତ୍ୟୁ ଘଟିଲା ତାର ତଦନ୍ତ କରୁଛନ୍ତି । ସମସ୍ତ ଘଟଣାକୁ ଅନୁଧ୍ୟାନ କରାଯାଉଛି । ମେଡିକାଲ ଟିମ୍ ପହଞ୍ଚି ଗ୍ରାମବାସୀଙ୍କୁ ସଚେତନ କରାଇବା ସହ ପ୍ରତିରୋଧକ ଔଷଧ ବଣ୍ଟନ କରିଛନ୍ତି ।
ଗ୍ରାମ୍ୟ ଓ ଜଳ ପରିମଳ ବିଭାଗ ପକ୍ଷରୁ ଏକ ବୈଷୟିକ କର୍ମଚାରୀ ଟିମ୍ ପହଞ୍ଚି ଜଳର ନମୁନା ପରୀକ୍ଷଣ କରିବା ସହ ଗ୍ରାମରେ ରହିଥି୍ବା ସମସ୍ତ ନଳକୂପକୁ ଯୁଦ୍ଧକାଳୀନ ଭିଭିରେ ମରାମତି ଓ ବିଶୋଧନ କରିଛନ୍ତି ।
ଆକ୍ରାନ୍ତମାନେ ଦିଗପହଣ୍ଡି ଏବଂ ଏମ୍.କେ.ସି.ଜିରେ ଭର୍ତ୍ତି
ଦାମପୁରରେ ଝାଡାବାନ୍ତିରେ ଅନେକ ଆକ୍ରାନ୍ତ ହୋଇଥିବା ବେଳେ, ସେମାନଙ୍କ ମଧ୍ୟରୁ କେତେକଙ୍କୁ ପ୍ରଥମେ ଦିଗପହଣ୍ଡି ମେଡିକାଲ ଏବଂ ପରେ ବ୍ରହ୍ମପୁର ଏମ୍.କେ.ସି.ଜି ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ସେପଟେ ଜିଲ୍ଲା ସ୍ୱାସ୍ଥ୍ୟ ବିଭାଗ ଟିମ୍ ଓ ଆଡ଼ପଡା ମେଡିକାଲ ଅଧିକ୍ଷକଙ୍କ ନେଇ ଗଠିତ ଟିମ୍ ଗ୍ରାମରେ ସଚେତନ କରିବା ସହ ଔଷଧ ବଣ୍ଟନ କରିଛନ୍ତି ।
ସ୍ଥାନୀୟ ବାସିନ୍ଦା ତଥା ସରପଞ୍ଚ ପ୍ରତିନିଧି ମଙ୍ଗଳା ଗମାଙ୍ଗଙ୍କ କହିବା କଥା, କୌଣସି ଖାଦ୍ୟ କିମ୍ୱା ନିଶା ସାମଗ୍ରୀ ବ୍ୟବହାର କାରଣରୁ ମୃତ୍ୟୁ ଘଟିଛି ତାହା ସ୍ପଷ୍ଟ ହୋଇନାହିଁ । ସେପଟେ ଗାଁ ନିକଟରେ ସ୍ୱାସ୍ଥକେନ୍ଦ୍ର ଥିଲେ ହେଁ ଡାକ୍ତର ଅଭାବ ସହିତ କର୍ମଚାରୀ ନାହାନ୍ତି । ଗ୍ରାମରେ କ୍ୱାକମାନେ ପହଞ୍ଚି ଚିକିତ୍ସା କରୁଥିବା ସେ କହିଛନ୍ତି ।
ଡାଇରିଆ ଘଟଣାକୁ ଅସ୍ୱୀକାର କଲା ଜିଲ୍ଲା ସ୍ୱାସ୍ଥ୍ୟ ବିଭାଗ
ଗତ ଏକ ମାସ ମଧ୍ୟରେ ଗଞ୍ଜାମ ଜିଲ୍ଲାରେ ଝାଡାବାନ୍ତିରେ ପାଞ୍ଚ ଜଣଙ୍କ ଜୀବନ ଯାଇଥିବା ଅଭିଯୋଗ ହେଉଥିବା ବେଳେ, ମୃତ୍ୟୁର କାରଣ ଡାଇରିଆ ନୁହେଁ ବୋଲି ସ୍ୱାସ୍ଥବିଭାଗ ପକ୍ଷରୁ କୁହାଯାଇଛି । ସେପଟେ ଜିଲ୍ଲାର ବିଭିନ୍ନ ସ୍ଥାନରେ ୧୫ ଜଣ ଆକ୍ରାନ୍ତ ଚିକିତ୍ସିତ ହେଉଥିବା ବେଳେ ଆକ୍ରାନ୍ତଙ୍କ ଗ୍ରାମରେ କିପରି ହାତ ଧୋଇବେ, ସ୍ୱଚ୍ଛତା ଅବଲମ୍ୱନ କରିବେ ସେ ନେଇ ଗୁରୁତ୍ୱ ଦିଆଯାଉଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ।
ଏହା ମଧ୍ୟ ପଢନ୍ତୁ ପୁଣି ପଶ୍ଚିମବଙ୍ଗରୁ ଆସିବ ଆଳୁ, ମମତାଙ୍କ ସହିତ ଆଲୋଚନା କରିବେ ଯୋଗାଣ ମନ୍ତ୍ରୀ
ଏହା ମଧ୍ୟ ପଢନ୍ତୁ ଶଙ୍ଖ ଫୁଙ୍କିବେ କି ସୁଜାତା ? ହସ୍ପିଟାଲରେ ବିଜେଡି ନେତାଙ୍କୁ ଭେଟିବା ପରେ ବଢିଲା ଚର୍ଚ୍ଚା
