ଢେଙ୍କାନାଳ: ପରଲୋକରେ ରାଜ୍ୟ କଂଗ୍ରେସର ବରିଷ୍ଠ ନେତା ତଥା ପୂର୍ବତନ ବିଧାୟକ ପ୍ରଫୁଲ୍ଲ ଭଞ୍ଜ । ସୋମବାର ରାତିରେ କଟକର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ତାଙ୍କୁ 87 ବର୍ଷ ବୟସ ହୋଇଥିଲା । ବାର୍ଦ୍ଧକ୍ୟ ଜନିତ ସମସ୍ୟା ଯୋଗୁଁ ତାଙ୍କର ପରଲୋକ ଘଟିଛି । ସେ ଢେଙ୍କାନାଳ ଜିଲ୍ଲା ଗନ୍ଦିଆର ପୂର୍ବତନ ବିଧାୟକ ଓ ବିଶିଷ୍ଠ ସମାଜସେବୀ ମଧ୍ୟ । ଅତ୍ୟାଧୁନିକ ଢେଙ୍କାନାଳ ପୋୖରାଞ୍ଚଳର ନିର୍ମାତା ମଧ୍ୟ।
ଶେଷ ଦର୍ଶନ କଲେ ପୂର୍ବତନ ମନ୍ତ୍ରୀ-ବିଧାୟକ:
ଆଜି ସକଳେ ତାଙ୍କ ପାର୍ଥିବ ଶରୀରକୁ ଢେଙ୍କାନାଳ ସ୍ଥିତ ମିନା ବଜାରରେ ଥିବା ବାସଭବନକୁ ନିଆଯାଇଥିଲା । ସେଠାରେ ତାଙ୍କର ସମର୍ଥକ ଓ ସମ୍ପର୍କୀୟ ମାନେ ଶେଷ ଦର୍ଶନ କରିଥିଲେ । ପୂର୍ବତନ ମନ୍ତ୍ରୀ ନବୀନ ଦାସ, ପୂର୍ବତନ ବିଧାୟକ ସରୋଜ ସାମଲ, ଜିଲ୍ଲା କଂଗ୍ରେସର କର୍ମକର୍ତ୍ତାଙ୍କ ସମେତ ଶହ ଶହ ସଂଖ୍ୟାରେ ବୁଦ୍ଧିଜୀବୀ ଶେଷ ଦର୍ଶନ କରିବା ସହିତ ପାର୍ଥିବ ଶରୀରରେ ପୁଷ୍ପମାଲ୍ୟ ଅର୍ପଣ କରିଥିଲେ । ପରେ ତାଙ୍କ ମରଶରୀରକୁ ଏକ ବିରାଟ ପଟୁଆରରେ ଗାନ୍ଧୀ ମନ୍ଦିର ଜିଲ୍ଲା କଂଗ୍ରେସ କାର୍ଯ୍ୟାଳୟ ଓ ପରେ ଢେଙ୍କାନାଳ ପୌର କାର୍ଯ୍ୟାଳୟକୁ ନିଆଯିବା ସହିତ ସହର ପରିକ୍ରମା କରାଯାଇଥିଲା । ସୁଆଗି ସ୍ଥିତ ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଥିବା ଜଣାପଡିଛି ।
ରାଜ୍ୟ ପ୍ରଦେଶ କଂଗ୍ରେସ କମିଟିର ଆଗ ଧାଡ଼ିର ନେତା ଥିଲେ:
ସୂଚନା ଥାଉକି ସ୍ବର୍ଗତ ପ୍ରଫୁଲ୍ଲ ଭଞ୍ଜ କଂଗ୍ରେସର ଜଣେ ଦୃଢ ସଙ୍ଗଠକ ଓ ବରିଷ୍ଠ ନେତା ଥିଲେ । ସେ ରାଜ୍ୟ ପ୍ରଦେଶ କଂଗ୍ରେସ କମିଟିର ଆଗ ଧାଡ଼ିର ନେତା, ସିଧାସଳଖ ନିର୍ବାଚନରେ ଢେଙ୍କାନାଳ ପୌର ସଂସ୍ଥାର ନଗରପାଳ ରହିଥିଲେ । ୧୯୮୫ରୁ ୧୯୯୦ ପର୍ଯ୍ୟନ୍ତ କଂଗ୍ରେସ ଦଳରୁ ଗନ୍ଦିଆ ବିଧାନସଭା ନିର୍ବାଚନ ମଣ୍ଡଳୀରୁ ବିଧାୟକ ରହିଥିଲେ । ଓଡିଶା ରାଜ୍ୟ ଓବିସିସିର ଅଧ୍ୟକ୍ଷ ଆଦି ପଦ ପଦବୀରେ ରହି କଂଗ୍ରେସ ଦଳର ଜଣେ ଅଦ୍ୱିତୀୟ ସଙ୍ଗଠକ ଭାବେ ସୁପରିଚିତ ଥିଲେ । ଢେଙ୍କାନାଳ ସାନ୍ଧ୍ୟ ମହାବିଦ୍ୟାଳୟକୁ ପ୍ରତିଷ୍ଠା ଓ ବିଭିନ୍ନ ଲୋକହିତ କାର୍ଯ୍ୟ ପାଇଁ ଜଣେ ଲୋକପ୍ରିୟ ଜନନାୟକ ଭାବେ ଢେଙ୍କାନାଳବାସୀଙ୍କ ପାଇଁ ଚିରସ୍ମରଣୀୟ ହୋଇ ରହିଯିବେ ସେ । ସ୍ବର୍ଗତ ପ୍ରଫୁଲ୍ଲ ଭଞ୍ଜ ଜଣେ ଅମାୟିକ, ମିଷ୍ଠଭାଷୀ, ମେଳାପୀ ଓ ପରୋପକାରୀ ବ୍ୟକ୍ତି ଥିଲେ।
ଇଟିଭି ଭାରତ, ଢେଙ୍କାନାଳ
