Biju Patnaik 28th Death Anniversary ଭୁବନେଶ୍ବର: ‘ଜଣେ ଓଡ଼ିଆ ଭାବେ ବିଜୁ ବାବୁ ସବୁବେଳେ ଗର୍ବ ଅନୁଭବ କରୁଥିଲେ । ବିଜୁ ବାବୁଙ୍କ ସ୍ଵପ୍ନ ସାକାର କରିବା ପାଇଁ ୨୦୦୦ରୁ ୨୦୨୪ ଯାଏ ଅନେକ ପଦକ୍ଷେପ ନେଇଥିଲେ ବିଜେଡି ସରକାର । ମହାନ ନେତାଙ୍କ ଇତିହାସ ବଦଳାଇବାକୁ ଚାଲିଛି ଅପଚେଷ୍ଟା । ହେଲେ ଏହା ସମ୍ଭବ ନୁହେଁ । ତେଣୁ ସମୟ ନଷ୍ଟ ନକରି ବିକାଶର ନୂଆ ଅଧ୍ୟାୟ ସୃଷ୍ଟି କଲେ ଓଡ଼ିଶାର ମଙ୍ଗଳ ହେବ । ଏହା କହିଛନ୍ତି ବିଜେଡ଼ି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ବିଜୁ ତିରୋଧାନ ଦିବସରେ ଏହା କହି ବିଜେପି ସରକାରଙ୍କୁ ଟାର୍ଗେଟ କରିଛନ୍ତି ନବୀନ ।
ଶଙ୍ଖ ଭବନରେ ବିଜୁ ପଟ୍ଟନାୟକଙ୍କ ଶ୍ରାଦ୍ଧ ଦିବସ:
ଶଙ୍ଖ ଭବନରେ ଆଜି ମହାନ ଜନନାୟକ ବିଜୁ ପଟ୍ଟନାୟକଙ୍କ ୨୮ତମ ଶ୍ରାଦ୍ଧ ଦିବସ ପାଳିତ ହୋଇଛି । କାର୍ଯ୍ୟକ୍ରମରେ ସାମିଲ ହୋଇଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ବିଜୁ ବାବୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି ନବୀନ କହିଛନ୍ତି, ‘ଜଣେ ଓଡ଼ିଆ ଭାବେ ବିଜୁ ବାବୁ ସବୁବେଳେ ଗର୍ବ କରୁଥିଲେ । ଓଡିଶାକୁ ଶ୍ରେଷ୍ଠ ରାଜ୍ୟରେ ପରିଣତ କରିବା ତାଙ୍କର ଲକ୍ଷ୍ୟ ଥିଲା । ବିଜୁ ବାବୁଙ୍କ ସ୍ବପ୍ନକୁ ସାକାର କରିବା ପାଇଁ ବିଜେଡି ସରକାର ଅନେକ ପଦକ୍ଷେପ ନେଇଥିଲା । ୨୦୦୦ରୁ ୨୦୨୪ ମଧ୍ୟରେ ବହୁତ ଭଲ କାମ ହୋଇଥିଲା । ଯେଉଁଥି ପାଇଁ ଓଡିଶାକୁ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଅନେକ ସ୍ୱୀକୃତି ମଧ୍ୟ ମିଳିଥିଲା ।’
ବିଜୁ ବାବୁଙ୍କ ଅବଦାନ ମନେ ପକାଇଲେ ନବୀନ:
ନବୀନ ଆହୁରି ମଧ୍ୟ କହିଛନ୍ତି, ‘ଦେଶର ତ୍ରିସ୍ତରୀୟ ପଞ୍ଚାୟତ ବ୍ୟବସ୍ଥାକୁ ଶକ୍ତିଶାଳୀ କରିବା ଓ ମହିଳା ସଶକ୍ତିକରଣ ହେଉଛି ଭାରତୀୟ ରାଜନୀତିକୁ ବିଜୁ ବାବୁଙ୍କ ଶ୍ରେଷ୍ଠ ଅବଦାନ । ବିଜୁ ବାବୁଙ୍କ ଅବଦାନକୁ କେହି ଭୁଲି ପାରିବେ ନାହିଁ । ବରପୁତ୍ର ମାନଙ୍କ ତ୍ୟାଗ ଓ ଅବଦାନକୁ ନ୍ୟୁନ କରିବା ପାଇଁ ବର୍ତ୍ତମାନ କିଛି ଲୋକ ଉଦ୍ୟମ କରୁଛନ୍ତି । ଇତିହାସ ବଦଳେଇବାକୁ ଚେଷ୍ଟା କରୁଛନ୍ତି । ଇତିହାସ ହେଉଛି ଗୋଟିଏ ନିର୍ଦ୍ଦିଷ୍ଟ କାଳଖଣ୍ଡରେ ଗୋଟିଏ ଜାତିର ସାମୁହିକ ଅନୁଭବର ପରିପ୍ରକାଶ । ଏହାକୁ କେହି ବଦଳେଇ ପାରିବେନାହିଁ । ତେଣୁ ଏଥିରେ ସମୟ ନଷ୍ଟ ନ କରି ବିକାଶ ଇତିହାସରେ ନୂଆ ଅଧ୍ୟାୟ ଯୋଡି ପାରିଲେ ରାଜ୍ୟର ମଙ୍ଗଳ ହେବ ।’
‘ବିଜୁ ପଟ୍ଟନାୟକଙ୍କୁ ଅପମାନ କରାଯାଇଛି’:
ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ‘ବିଜୁ ପଟ୍ଟନାୟକଙ୍କୁ ଅପମାନିତ କରାଯାଇଛି । ଏହା କାହାର ଷଡ଼ଯନ୍ତ୍ର ଦିନେ ନାଦିନେ ଲୋକଲୋଚନକୁ ଆସିବ । ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ନିଆଁ ଲଗେଇ ଦେଲେ । କିନ୍ତୁ ନିଆଁ ଲାଗିବା ଦ୍ଵାରା ବିଜୁ ପଟ୍ଟନାୟକଙ୍କ ମୁହଁ କଳା ପଡିନାହିଁ । ଯେଉଁ ମାନେ ନିଆଁ ଲଗେଇଛନ୍ତି ତାଙ୍କ ମୁହଁ କଳା ହୋଇଗଲା । ବିଜୁ ପଟ୍ଟନାୟକଙ୍କ ସ୍ମୃତିକୁ ଲିଭେଇ ଦେବାକୁ ବର୍ତ୍ତମାନ ସରକାର ପ୍ରୟାସ କରିଛନ୍ତି । ବିଜୁ କେବଳ କୌଣସି ଦଳର ନେତା କି ମୁଖ୍ୟମନ୍ତ୍ରୀ ନଥିଲେ । ବିଜୁ ଯୁଗ ପୁରୁଷ ଥିଲେ । ଯେଉଁ ମାନେ ତାଙ୍କୁ ଅପମାନିତ କରୁଛନ୍ତି ଲୋକେ ତାଙ୍କୁ ଜବାବ ଦେବେ ।’
ବିନ୍ଦୁ ସାଗରରେ ତିଳତର୍ପଣ:
ବିଜେଡ଼ିର ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର କହିଛନ୍ତି, ‘ଆଧୁନିକ ଓଡ଼ିଶାର ନିର୍ମାତା ବିଜୁ ପଟ୍ଟନାୟକଙ୍କର ତିରୋଧାନ ଦିବସ । କେବଳ ଭାରତ ନୁହେଁ ଅନ୍ୟ ଦେଶର ମୁକ୍ତି ସଂଗ୍ରାମରେ ସେ ସାମିଲ ହୋଇଥିଲେ । ସେହି ଅଗଷ୍ଟ ବିପ୍ଳବର ଯୋଦ୍ଧାଙ୍କ ତିରୋଧାନ ଦିବସ ସାରା ରାଜ୍ୟରେ ପାଳନ ହୋଇଛି । ଆଜି ସକାଳୁ ଦଳ ତରଫରୁ ବିନ୍ଦୁ ସାଗରରେ ତିଳତର୍ପଣ କରାଯାଇଛି । ଦଳର ସଭାପତିଙ୍କ ସମେତ ବରିଷ୍ଠ ନେତା ବିଜୁ ପଟ୍ଟନାୟକ ପାର୍କରେ ପ୍ରତିମୂର୍ତ୍ତିରେ ପୁଷ୍ପ ମାଲ୍ୟ ଅର୍ପଣ କରାଯାଇଛି । ହସ୍ପିଟାଲରେ ଫଳ ବଣ୍ଟନ କାର୍ଯ୍ୟକ୍ରମ ହୋଇଛି ।’
ଏହା ମଧ୍ୟ ପଢନ୍ତୁ: ବିଜୁ ପଟ୍ଟନାୟକଙ୍କ 28ତମ ଶ୍ରାଦ୍ଧବାର୍ଷିକ ପାଳିତ ବିଜୁବାବୁଙ୍କ ପ୍ରତିମୂର୍ତ୍ତିରେ କିଏ ଲଗାଇଲା ନିଆଁ ? ମୁଖ୍ୟମନ୍ତ୍ରୀଙ୍କ ନିନ୍ଦା, BJDର ତୀବ୍ର ପ୍ରତିକ୍ରିୟା |
ବିଜୁବାବୁଙ୍କ ଚିତ୍ର ମଳିନ କରିବାକୁ ଉଦ୍ୟମ, ତାହା ସମ୍ଭବ ନୁହେଁ:
ସେହିପରି ବରିଷ୍ଠ ନେତା ଅଶୋକ ଚନ୍ଦ୍ର ପଣ୍ଡା କହିଛନ୍ତି, ‘ମାହାଙ୍ଗାରେ ହେଉ କି ପାଟଣାଗଡ ବିଜୁ ବାବୁଙ୍କ ଚିତ୍ରକୁ ମଳିନ କରିବାକୁ ଉଦ୍ୟମ ହେଉଛି । କିନ୍ତୁ ତାହା ହେବା ସମ୍ଭବ ନୁହେଁ । ବିଜୁ ବାବୁଙ୍କ ମୂର୍ତ୍ତି ଓ କୁର୍ତ୍ତିକୁ କେହି ମଳିନ କରିପାରିବେ ନାହିଁ । ବିଜୁ ବାବୁଙ୍କ ପାଦ ଚିହ୍ନ ପରପିଢି ପାଇଁ ପ୍ରେରଣାର ଉତ୍ସ ହୋଇ ରହିବ । ବର୍ତ୍ତମାନ ସରକାରରେ ଥିବା ଦଳ କରୁଥିବା ମନ୍ଦ ଉଦ୍ୟମରେ ବିଫଳ ହେବ । ବିଧାୟକ ସୁଶାନ୍ତ ରାଉତଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ଦଳର ବରିଷ୍ଠ ନେତା, ବିଧାୟକ ପ୍ରମୁଖ ଉଦବୋଧନ ଦେଇ ବିଜୁ ବାବୁଙ୍କୁ ଶ୍ରଦ୍ଧା ନିବେଦନ କରିଛନ୍ତି । ସକାଳେ ବିରୋଧୀ ଦଳ ନେତା ନବୀନ ପଟନାୟକ ବିଜୁ ପଟନାୟକ ପାର୍କକୁ ଯାଇ ବିଜୁ ବାବୁଙ୍କ ପ୍ରତିମୂର୍ତ୍ତିରେ ଶ୍ରଦ୍ଧା ସୁମନ ଅର୍ପଣ କରିଥିଲେ ।
ଇଟିଭି ଭାରତ, ଭୁବନେଶ୍ବର
