Budhi Thakurani Yatra 2025 ବ୍ରହ୍ମପୁର: ପ୍ରତି ଦୁଇ ବର୍ଷକୁ ଥରେ ଆୟୋଜିତ ହୋଇଥିବା ବ୍ରହ୍ମପୁରର ପ୍ରସିଦ୍ଧ ମା' ବୁଢୀ ଠାକୁରାଣୀ ଯାତ୍ରା । ମା'ଙ୍କ ଯାତ୍ରାରେ ପ୍ରତ୍ୟେକ ଦିନ ଘଟ ପରିକ୍ରମା ହୋଇଥାଏ । ସନ୍ଧ୍ୟା ଆଳତୀ ପରେ ମା' ନଗର ପରିକ୍ରମା ପାଇଁ ବାହାରିଥାନ୍ତି । ଏହି ସମୟରେ ମା'ଙ୍କ ମୁଖ୍ୟ ଘଟ ପାଇଁ ଫୁଲରେ ସଜ୍ଜିତ ହୋଇଥିବା ଟାହିଆ ପ୍ରସ୍ତୁତ ହୋଇଥାଏ । ମା'ଙ୍କ ଏହି ମୁଖ୍ୟ ଘଟ ପାଇଁ ଟାହିଆ ଯୋଗାଇ ଆସୁଛନ୍ତି ବ୍ରହ୍ମପୁର ସହର ଉପକଣ୍ଠ ଲାଠୀ ଅଞ୍ଚଳର ଲକ୍ଷ୍ମୀ ନାରାୟଣ ରାଓ ଏବଂ ତାଙ୍କ ପରିବାର । ପୂର୍ବରୁ ଲକ୍ଷ୍ମୀ ନାରାୟଣଙ୍କ ବାପା ଏହି କାର୍ଯ୍ୟ କରି ଆସୁଥିଲେ । ମାତ୍ର ଗତ କିଛି ବର୍ଷ ଧରି ବାପାଙ୍କ ପରେ ସେ ଏହାକୁ ଯୋଗାଇ ଆସୁଛନ୍ତି ।
ଟାହିଆ ପହଞ୍ଚିଲେ ସ୍ପଷ୍ଟ ହୋଇଥାଏ ମା'ଙ୍କ ଘଟ ପରିକ୍ରମା ପାଇଁ ବାହାରିବ:
ମା' ବୁଢୀ ଠାକୁରାଣୀଙ୍କ ଯାତ୍ରା ସମୟରେ ପ୍ରତି ଦିନ ମା'ଙ୍କ ଘଟ ପରିକ୍ରମା ପୂର୍ବରୁ ଅସ୍ଥାୟୀ ମଣ୍ଡପ ପରିସରରେ ସନ୍ଧ୍ୟା ସମୟରେ ଟାହିଆ ଆସି ପହଞ୍ଚିଥାଏ । ମୁଖ୍ୟ ଘଟ ପାଇଁ ଫୁଲରେ ସୁସଜ୍ଜିତ ଟାହିଆ ପହଞ୍ଚିବା ପରେ ମା'ଙ୍କ ଘଟ ପରିକ୍ରମା ପାଇଁ ଅପେକ୍ଷାରେ ଭକ୍ତମାନେ ସ୍ପଷ୍ଟ ହୋଇଯାଇଥାନ୍ତି ଯେ, ମା'ଙ୍କ ଘଟ କିଛି ସମୟ ମଧ୍ୟରେ ବାହାରିବ । ମା'ଙ୍କ ଏହି ଟାହିଆକୁ ପ୍ରସ୍ତୁତ କରିଥାନ୍ତି ସହର ଉପକଣ୍ଠ ଲାଠି ଅଞ୍ଚଳର ଲକ୍ଷ୍ମୀ ନାରାୟଣ ରାଓ । ଲକ୍ଷ୍ମୀ ନାରାୟଣ ଟାହିଆକୁ ନିଜ ସାଥିରେ ନେଇ ଆସି ମା'ଙ୍କ ଅସ୍ଥାୟୀ ମନ୍ଦିରରେ ପ୍ରଦାନ କରିଥାନ୍ତି । ପେରେ ସେଠାରୁ ପୂରୁଣା ଟାହିଆକୁ ନେଇଥାନ୍ତି । ଏହାର କିଛି ସମୟ ମଧ୍ୟରେ ଟାହିଆକୁ ମୁଖ୍ୟ ଘଟରେ ରଖାଯାଇ ମା'ଙ୍କୁ ସନ୍ଧ୍ୟା ଆଳତୀ କରାଯାଏ । ପରେ ମୁଖ୍ୟ ଘଟ ପରିକ୍ରମାରେ ବାହାରିଥାଏ । ମୁଖ୍ୟ ଘଟ ସହ ସମସ୍ତ ପାର୍ଶ୍ୱ ଘଟ ମଧ୍ୟ ପରିକ୍ରମା ଅଭିମୁଖେ ବାହାରିଥାଏ ।
ବାପାଙ୍କ ପରେ ପୁଅ ଟାହିଆ ପ୍ରସ୍ତୁତି କରୁଛନ୍ତି:
ଏହି ଅବସରରେ ମା'ଙ୍କୁ ବୁଢୀ ଠାକୁରାଣୀ ଯାତ୍ରା ସମୟରେ ନିୟମିତ ଭାବରେ ଟାହିଆ ଯୋଗାଇ ଆସୁଥିବା ଲକ୍ଷ୍ମୀ ନାରାୟଣ ରାଓ କହିଛନ୍ତି, "ମୁଁ ମା'ଙ୍କ ଯାତ୍ରା ସମୟରେ ପ୍ରତିଦିନ ଏହି କାର୍ଯ୍ୟ କରୁଛି । ନିୟମିତ ଭାବରେ ମା'ଙ୍କ ଟାହିଆରେ ଯେପରି ସୁନ୍ଦର ଭାବରେ ଫୁଲ ଲଗାଯିବ ଏବଂ ତାହାକୁ ଆଣି ଅସ୍ଥାୟୀ ମନ୍ଦିରରେ ଦିଆଯିବ ସେହି କାର୍ଯ୍ୟ କରୁଛି । ପୂର୍ବରୁ ମୋ ବାପା ଏହି କାର୍ଯ୍ୟ କରୁଥିଲେ । ବାପାଙ୍କ ପରେ ମୁଁ ଏବେ ଚାହିଆ ପ୍ରସ୍ତୁତ କରିବା କାର୍ଯ୍ୟ କରୁଛି । ଏଥିପାଇଁ ବେଶ ଖୁସି ଅନୁଭବ କରୁଛି ।"
ଏହା ମଧ୍ୟ ପଢ଼ନ୍ତୁ... ବୁଢ଼ୀ ଠାକୁରାଣୀଙ୍କ 'ବିଞ୍ଚଣା ରଥ', ଏହା କାହିଁକି ମାଆଙ୍କ ପ୍ରିୟ ? ଜାଣନ୍ତୁ ମା' ବୁଢୀ ଠାକୁରାଣୀଙ୍କ ଆଶୀର୍ବାଦ ନେଲେ ସାଂସଦ ପ୍ରଦୀପ ପାଣିଗ୍ରାହୀ, ମୁଖ୍ୟମନ୍ତ୍ରୀଙ୍କୁ କଲେ ଅନୁରୋଧ |
ସେପଟେ ପ୍ରତ୍ୟେକ ଦିନ ସନ୍ଧ୍ୟା ସମୟରେ ଯେତେବେଳେ ସେହି ଟାହିଆକୁ ନେଇ ନାରାୟଣଙ୍କ ପରିବାର ଆସିଥାନ୍ତି, ମା'ଙ୍କ ପାଇଁ ଭୋଗ ନୈବେଦ୍ୟ ମଧ୍ୟ ନେଇଥାନ୍ତି ବୋଲି କହିଛନ୍ତି ଦେଶୀ ବେହେରା ମିନତୀ ପଣ୍ଡା ।
ଇଟିଭି ଭାରତ, ବ୍ରହ୍ମପୁର
