ଭୁବନେଶ୍ବର: OSSSC ପରୀକ୍ଷାରେ ବ୍ୟାପକ ଅନିୟମିତତା ଅଭିଯୋଗ। RI, ARI, ICDS ସୁପରଭାଇଜର ଓ ଅମିନ ପରୀକ୍ଷାରେ ବ୍ୟାପକ ଅନିୟମିତତା ଅଭିଯୋଗ ଆଣି ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ 'ଲୋଡିଲା ଷ୍ଟୁଡେଣ୍ଟସ ଏଗେନଷ୍ଟ କରପସନ'। ସେପଟେ ଆଇଟି ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, "ଘଟଣା ଉପରେ ଆମ ନଜର ରହିଛି ।"
ପରୀକ୍ଷାରେ ଅନିୟମିତତା ପ୍ରସଙ୍ଗ:
ଆରଆଇ, ଏଆରଆଇ, ଆଇସିଡିଏସ ସୁପରଭାଇଜର ଓ ଅମିନ ପରୀକ୍ଷା ଅନିୟମିତତା ପ୍ରସଙ୍ଗକୁ ନେଇ ଷ୍ଟୁଡେଣ୍ଟସ ଏଗେନଷ୍ଟ କରପସନ ସାମ୍ବାଦିକ ସମ୍ମିଳନୀ କରିଛି । ସଂଯୋଜକ ବିଭୁତି ଭୂଷଣ ମହାପାତ୍ର କହିଛନ୍ତି, "ଏହି ପରୀକ୍ଷାରେ OSSSC ପକ୍ଷରୁ ଅନିୟମିତତା ହୋଇଛି। ଯେଉଁ ସଂସ୍ଥାକୁ OSSSC ଦାୟିତ୍ୱ ଦେଇଛି ତାହା ସାଢ଼େ ପାଞ୍ଚ ଲକ୍ଷ ପରୀକ୍ଷାଥିଙ୍କ ଭାଗ୍ୟ ନିର୍ଦ୍ଧାରଣ କରିବ। ଏହି ସଂସ୍ଥା ପୂର୍ବରୁ ବ୍ଲାକ ଲିଷ୍ଟେଡ୍ ଓ ଏବେ ଏହି ସଂସ୍ଥା ନାଁରେ ସିବିଆଇରେ କେସ୍ ଚାଲିଛି। ସାଇ ଏଡୁକେୟାର ପ୍ରାଇଭେଟ ଲିମିଟେଡକୁ ପରୀକ୍ଷା କେନ୍ଦ୍ର ଚୟନର ଦାୟିତ୍ୱ ଦିଆଯାଇଛି । ପରୀକ୍ଷା ପାଇଁ ଅଯୋଗ୍ୟ କମ୍ପାନୀକୁ ଦାୟିତ୍ୱ ଦିଆଯାଇଛି ଏବଂ ସେହି କମ୍ପାନୀ ଅନ୍ୟ ଯେଉଁ ସଂସ୍ଥାକୁ ପରୀକ୍ଷା ଦାୟିତ୍ୱ ଦେଇଛି ତାହା ବି ଅଯୋଗ୍ୟ ।"
ସୂଚନା ଅନୁସାରେ, ସୋମବାର 3 ଟି ସିଫ୍ଟରେ ପରୀକ୍ଷା ହେଉଥିଲା। 4 ଘଣ୍ଟା ବିଳମ୍ବ ପରେ ବି ପରୀକ୍ଷାର୍ଥୀଙ୍କୁ ପ୍ରବେଶ କରାଯାଇନଥିଲା । ଏନେଇ Student Against Corruption ସଂଘ ମୁଖ୍ଯମନ୍ତ୍ରୀଙ୍କ ହସ୍ତକ୍ଷେପ ଲୋଡିଛି। ପୂର୍ବ ସରକାରରେ ଏଭଳି ଘୋଟାଲା ହେଉଥିବା ଅଭିଯୋଗ ଆଣିଛି ସଂଘ। ତେବେ ନୂଆ ସରକାର ଏନେଇ ଦୃଢ଼ କାର୍ଯ୍ୟାନୁଷ୍ଠାନ କରିବାକୁ ଅନୁରୋଧ କରାଯାଇଛି।
"ଏହାସହ ତୁରନ୍ତ ପରୀକ୍ଷା କରାଉଥିବା ସଂସ୍ଥା ବିରୋଧରେ ତଦନ୍ତ କରାଯିବା ନେଇ ଦାବି ରହିଛି । ଓଡ଼ିଆ ମେଧାବୀଙ୍କ ଭବିଷ୍ୟତର କଥା। ପିଲାମାନେ ଦୀର୍ଘ ଦିନ ଧରି ସରକାରୀ ଚାକିରିଟିଏ ପାଇଁ ବହୁ ପରିଶ୍ରମ କରିଆସୁଛନ୍ତି। ଏଭଳି ସ୍ଥିତିରେ ଅଯୋଗ୍ୟ ସଂସ୍ଥା ଉପରେ ଭରସା କରି ପରୀକ୍ଷା ଦାୟିତ୍ବ ଦିଆଯାଇଛି," ବୋଲି କହି Student Against Corruption ପକ୍ଷରୁ ନିନ୍ଦା କରାଯାଇଛି।
ଇଟିଭି ଭାରତ, ଭୁବନେଶ୍ବର
