ନୂଆଦିଲ୍ଲୀ: ଭାରତରେ IPL 2025ର ଉତ୍ସାହ ଜାରି ରହିଛି। ଏପର୍ଯ୍ୟନ୍ତ ଖେଳାଯାଇଥିବା ମ୍ୟାଚ୍ଗୁଡ଼ିକରେ ଅନେକ ବ୍ୟାଟ୍ସମ୍ୟାନ୍ ଚମତ୍କାର ପ୍ରଦର୍ଶନ କରିଛନ୍ତି। ପ୍ରିୟାଂଶ ଆର୍ଯ୍ୟ ଏବଂ ଅଭିଷେକ ଶର୍ମାଙ୍କ ଭଳି ଯୁବ ଖେଳାଳିମାନେ ସେମାନଙ୍କର ବିସ୍ଫୋରକ ବ୍ୟାଟିଂରେ ଚମତ୍କାର କରୁଛନ୍ତି। ହେଲେ ଏହା ମଝିରେ ଏବେ 23 ବର୍ଷୀୟ ଜୈନ ନକଭି 26 ବଲ୍ରେ ଶତକ ହାସଲ କରି କ୍ରିକେଟ ପ୍ରେମୀଙ୍କ ଧ୍ୟାନ ଆକର୍ଷଣ କରିଛନ୍ତି। ତାଙ୍କୁ କ୍ରିକେଟରେ ଜଣେ ନୂଆ ଖେଳାଳି ଭାବେ ଦେଖାଯାଉଛି। ଆଶ୍ଚର୍ଯ୍ୟଜନକ ଭାବେ ଜୈନ ଶେଷ ଓଭରରେ ଲଗାତାର 6ଟି ବଲରେ 6ଟି ଛକା ମାରି ଇତିହାସ ରଚିଥିଲେ।
ଜୈନ ନକଭିଙ୍କ ଝଡ଼
ୟୁରୋପୀୟ T-10 ମ୍ୟାଚ୍ରେ ଜୈନ ନକଭି ଏପରି କଲେ ଯାହା ମହାନ ବ୍ୟାଟସମ୍ୟାନମାନେ ମଧ୍ୟ ସ୍ୱପ୍ନ ଦେଖିଥାନ୍ତି। ୟୁରୋପୀୟ T-10ରେ ଟିମ୍ ସିଭିଡାଟ୍ ଏବଂ ମାରଖୋର ମିଲାନୋ ମଧ୍ୟରେ ଖେଳାଯାଇଥିବା ମ୍ୟାଚ୍ ରେ ଜୈନଙ୍କ ବ୍ୟାଟ୍ ରୁ ଖାଲି ରନ୍ ବର୍ଷା ହୋଇଥିଲା। ସେ ମାରଖୋର ପକ୍ଷରୁ ଏକ ଭଲ ଇନିଂସ ଖେଳିଥିଲେ। ଶେଷ ଓଭରରେ, ଜୈନ ଲଗାତାର 6 ବଲରେ 6ଟି ଛକା ମାରିଥିଲେ। ସେ ୨୬ ବଲରେ ତାଙ୍କର ଶତକ ପୂରଣ କରି ଇତିହାସ ସୃଷ୍ଟି କରିଥିଲେ। ଏପରିକି ଶତକ ପୂରଣ କରିବା ପରେ ମଧ୍ୟ ତାଙ୍କ ବ୍ୟାଟ୍ ଶାନ୍ତ ପଡ଼ିନଥିଲା। ସେ ୩୭ ବଲ୍ରେ ୧୬୦ ରନ୍ର ଏକ ଚମତ୍କାର ଇନିଂସ ଖେଳିଥିଲେ। ତାଙ୍କ ଇନିଂସ ମଧ୍ୟରେ ସେ ୨୪ଟି ଛକା ଏବଂ ୨ଟି ଚୌକା ମାରିଥିଲେ। ଏହି ସମୟ ମଧ୍ୟରେ ସେ ୪୩୨.୪୩ ଷ୍ଟ୍ରାଇକ୍ ରେଟରେ ବ୍ୟାଟିଂ କରିଛନ୍ତି।
ଇନିଂସର ଶେଷ ଓଭରରେ ଛଅଟି ଛକା ମାରିଥିଲେ
୨୩ ବର୍ଷୀୟ ଜୈନ ନକଭି ତାଙ୍କ ଇନିଂସ ସମୟରେ ସିଭିଡାଟ୍ ର ଗୁରପ୍ରୀତ ସିଂହଙ୍କ ଇନିଂସର ଶେଷ ଓଭରରେ ଲଗାତାର 6ଟି ବଲରେ 6ଟି ଛକା ମାରିଥିଲେ। ଗୁରପ୍ରୀତଙ୍କ ଦୁଇ ଓଭରରେ ମୋଟ 53 ରନ ହୋଇଥିଲା। ଏହି ସମୟରେ, ସିଭିଡାଟ୍ ଅଧିନାୟକ କୁଲଜିନ୍ଦର ସିଂହ ଆହୁରି ମହଙ୍ଗା ପ୍ରମାଣିତ ହେଲେ। ସେ ତାଙ୍କର ଦୁଇଟି ଓଭରରେ ମୋଟ ୨୯ ରନ ଦେଇଥିଲେ।
ମାରଖୋର ମିଲାନୋ ମ୍ୟାଚ୍ ଜିତିଲେ
ପ୍ରଥମେ ବ୍ୟାଟିଂ କରି ମାରଖୋର ମିଲାନୋ ଜୈନ ନକଭିଙ୍କ ଦ୍ରୁତ ଶତକ ସହାୟତାରେ ୨ ୱିକେଟ୍ ହରାଇ ୨୧୦ ରନ୍ କରିଥିଲା। ଜୈନଙ୍କ ବ୍ୟତୀତ ଆତା ଉଲ୍ଲାହ ୨ ରନ୍ କରିଥିଲେ, ଯେତେବେଳେ ୱାସଲ ହୁସେନ ୨୫ ରନ୍ କରିଥିଲେ। ୨୧୧ ରନର ବିଶାଳ ଟାର୍ଗେଟକୁ ପିଛା କରି ସିଭିଡାଟ୍ ଦଳ ୯ ଓଭରରେ ୧୦୬ ରନରେ ଅଲଆଉଟ ହୋଇଯାଇଥିଲା। ସିଭିଡାଟ୍ ପକ୍ଷରୁ ଶାହବାଜ ମାସୁଦ ସର୍ବାଧିକ 34 ରନ କରିଥିଲେ।
ଜୈନ ନକଭିଙ୍କ କ୍ୟାରିଅର
ଜୈନ ନକଭି ଇଟାଲୀ ଦଳ ପାଇଁ ଖେଳନ୍ତି। ସେ ଏପର୍ଯ୍ୟନ୍ତ ୪ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ରେ ଇଟାଲୀ ପକ୍ଷରୁ ପ୍ରତିନିଧିତ୍ୱ କରିଛନ୍ତି। ଏଥିରେ ସେ ୭ ରନ୍ କରିଛନ୍ତି। ଏହି ଇନିଂସ ପରେ ସେ ସ୍ପଷ୍ଟ କରିଛନ୍ତି ଯେ, ଆଗାମୀ ସମୟରେ ସେ ସବୁଠି ତାଙ୍କ ନାମ ପ୍ରସିଦ୍ଧ କରିବେ।
ଏହା ମଧ୍ୟ ପଢ଼ନ୍ତୁ- ବିସିସିଆଇର ବଡ ଆକ୍ସନ, ହଠାତ୍ ଗମ୍ଭୀରଙ୍କ କୋଚିଂ ଷ୍ଟାଫରୁ 3 କୋଚ୍ ବିଦା
