ଭୁବନେଶ୍ବର: ବିଜୁ ଜନତା ଦଳର ସାଂଗଠନିକ ନିର୍ବାଚନ ଏବେ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ବିଜେଡି ସଭାପତି ପଦ ପାଇଁ ଆଜି ନାମାଙ୍କନ ଦାଖଲ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଧାର୍ଯ୍ୟ ସମୟ ମଧ୍ୟରେ ଆଉ କେହି ପ୍ରାର୍ଥୀପତ୍ର ଦାଖଲ କରିନଥିବାରୁ ନବମ ଥର ପାଇଁ ନିର୍ଦ୍ବନ୍ଦ୍ବରେ ନିର୍ବାଚିତ ହେବାକୁ ଯାଉଛନ୍ତି ନବୀନ । ଆସନ୍ତା 19 ତାରିଖରେ ଏନେଇ ଔପଚାରିକ ବିଧିବଦ୍ଧ ଘୋଷଣା ହେବ । ସେପଟେ ଅନ୍ୟ ଛାମୁଆ ସଂଗଠନ ଓ ରାଜ୍ୟ କାର୍ଯ୍ୟକାରିଣୀ ସଦସ୍ୟ ହେବା ଲାଗି ଦଳରେ ଜୋରଦାର ଲବି ଆରମ୍ଭ ହୋଇଛି ।
ସଭାପତି ପାଇଁ ନାମାଙ୍କନ ଭରିଲେ ନବୀନ:
ବିରୋଧୀ ଦଳ ନେତା ନବୀନ ପଟ୍ଟନାୟକ ଆଜି ବିଜେଡି ସଭାପତି ପଦ ପାଇଁ ନାମାଙ୍କନ ଭରିଛନ୍ତି । ପୂର୍ବାହ୍ନରେ ଶଙ୍ଖ ଭବନକୁ ଯାଇ ଦଳର ବରିଷ୍ଠ ନେତାମାନଙ୍କ ଉପସ୍ଥିତିରେ ସେ ବିଜୁ ଜନତା ଦଳ ସଭାପତି ପଦ ପାଇଁ ପ୍ରାର୍ଥୀ ପତ୍ର ଦାଖଲ କରିଛନ୍ତି । ଅପରାହ୍ନ 1 ପର୍ଯ୍ୟନ୍ତ ନାମାଙ୍କନ ଦାଖଲ ପାଇଁ ସମୟ ଥିବା ଆଉ କେହି ପ୍ରାର୍ଥୀତ୍ବ ଦାଖଲ କରିନାହାନ୍ତି । ତେଣୁ ନିର୍ଦ୍ଵନ୍ଦ୍ବରେ ବିଜେଡି ସଭାପତି ନବୀନ ନିର୍ବାଚିତ ହେବେ । ଏନେଇ ଆସନ୍ତା 19 ତାରିଖରେ ବିଧିବଦ୍ଧ ଔପଚାରିକ ଘୋଷଣା ହେବ । ଫଳରେ ନବମ ଥର ପାଇଁ ନବୀନ ବିଜେଡି ସଭାପତି ହେବା ସ୍ପଷ୍ଟ ହୋଇଛି । ନିର୍ବାଚନ ପ୍ରକ୍ରିୟାରେ ବର୍ତ୍ତମାନ ସୁଦ୍ଧା 355 ଜଣିଆ ଷ୍ଟେଟ କାଉନସିଲ ଗଠନ ହୋଇଛି । ଆସନ୍ତା 19 ତାରିଖରେ 81 ଜଣିଆ କାର୍ଯ୍ୟକାରିଣୀ ବୈଠକ ବସି ନବୀନଙ୍କ ନାଁ ଘୋଷଣା ହେବ ।
19ରେ ହେବ ବିଧିବଦ୍ଧ ଘୋଷଣା:
ବିଜେଡିର ନିର୍ବାଚନ ଅଧିକାରୀ ପ୍ରତାପ କେଶରୀ ଦେବ କହିଛନ୍ତି, ‘ଦଳର ସାଙ୍ଗଠନିକ ନିର୍ବାଚନ ପ୍ରକ୍ରିୟା ଚୂଡାନ୍ତ ପର୍ଯ୍ୟାୟରେ ପହଁଚିଛି । ଚତୁର୍ଥ ପର୍ଯ୍ୟାୟରେ ଜିଲ୍ଲା ସଭାପତି ନିର୍ବାଚନ ହୋଇଛି । ପଞ୍ଚମ ଓ ଷଷ୍ଠ ପର୍ଯ୍ୟାୟ ନିର୍ବାଚନ ସାଙ୍ଗରେ ହୁଏ । ରାଜ୍ୟ ପରିଷଦ ଓ ରାଜ୍ୟ ପରିଷଦରୁ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଚୟନ ହୁଏ । ସଭାପତି ପଦ ପାଇଁ ଆଜି ପୂର୍ବାହ୍ନ 10ରୁ ଅପରାହ୍ନ 1 ପର୍ଯ୍ୟନ୍ତ ସମୟ ଧାର୍ଯ୍ୟ ହୋଇଥିଲା । ଏହି ସମୟ ମଧ୍ୟରେ କେବଳ ନବୀନ ପଟ୍ଟନାୟକ ସଭାପତି ପଦ ପାଇଁ ନାମାଙ୍କନ ଦାଖଲ କରିଛନ୍ତି । ଆସନ୍ତା 19 ତାରିଖ ପୂର୍ବାହ୍ନ 11ରେ ଏନେଇ ବିଧିବଦ୍ଧ ଘୋଷଣା ହେବ । ରାଜ୍ୟ ପରିଷଦ ଓ ରାଜ୍ୟ କାର୍ଯ୍ୟକାରିଣୀର ବୈଠକ ଡକାଯାଇ ସଭାପତିଙ୍କ ନାଁ ଘୋଷଣା ହେବ । ରାଜ୍ୟ ପରିଷଦରରେ 355 ଜଣ ସଦସ୍ୟ ଅଛନ୍ତି । ସେହିପରି ରାଜ୍ୟ କର୍ଯ୍ୟକାରିଣୀ ସଦସ୍ୟ ସଂଖ୍ୟା 81 ।’
ଛାମୁଆ ସଂଗଠନର ନେତୃତ୍ୱ ନେବା ଲାଗି ଜୋରଦାର ଲବି:
ନବୀନ ପୁନର୍ବାର ରାଜ୍ୟ ସଭାପତି ହେବେ ବୋଲି ସ୍ପଷ୍ଟ ହୋଇଛି । କିନ୍ତୁ ନବୀନଙ୍କ ନମ୍ବର ଦୁଇ କିଏ ହେବେ ଚର୍ଚ୍ଚା ଲାଗି ରହିଛି । ସେହିପରି ଦଳର ବିଭିନ୍ନ ଛାମୁଆ ସଂଗଠନର ନେତୃତ୍ୱ ନେବା ଲାଗି ଦଳ ଭିତରେ ଜୋରଦାର ଲବି ଆରମ୍ଭ ହୋଇଛି । ଯୁବ, ଛାତ୍ର ଓ ମହିଳା ସଂଗଠନର ନେତୃତ୍ୱରେ ନେବା ଲାଗି ନେତାଙ୍କ ମଧ୍ୟରେ ଛକାପଞ୍ଝା ଆରମ୍ଭ ହୋଇଯାଇଛି । ଯୁବ ବିଜେଡି ସଭାପତି ଲାଗି ଆରମ୍ଭରୁ ଆଗରେ ଥିଲେ ବାଙ୍କୀ ବିଧାୟକ ଦେବୀ ରଞ୍ଜନ ତ୍ରିପାଠୀ । ଛାତ୍ର ସଂଗଠନର ନେତୃତ୍ୱ ନେଇ ସଫଳ ହୋଇଥିବା ଦେବୀ ଯୁବ ସଭାପତି ହେବାକୁ ଅଶାୟୀ ଥିଲେ । କିନ୍ତୁ କିଛି ମାସ ହେଲା ଦଳରେ ସୃଷ୍ଟି ହୋଇଥିବା ବିବାଦ ପାଇଁ ସେ ଯୁବ ସଭାପତି ରେସରୁ ବାଦ ପଡିପାରନ୍ତି । ଯୁବ ନେତାଙ୍କ ମେଳିରେ ସାମିଲ, ବାପା ପ୍ରଭାତ ତ୍ରିପାଠୀଙ୍କୁ ଦଳରେ ବିବାଦ ତାଙ୍କୁ ଏଥିରୁ ବଞ୍ଚିତ କରିପାରେ । କାରଣ ବର୍ତ୍ତମାନ ବିଜେଡିର ଗୋଟେ ଗୋଷ୍ଠୀ ଦେବୀଙ୍କ ବିପକ୍ଷରେ ଅଛନ୍ତି ।
ଏମାନଙ୍କ ନାଁ ଅଛି ଚର୍ଚ୍ଚାରେ:
ସେହିପରି ୱାକଫ ବିଲ ବିବାଦରେ ମୁହଁ ଖୋଲି ଦଳର ଗୋଟେ ଶକ୍ତିଶାଳୀ ଗୋଷ୍ଠୀଙ୍କୁ ସନ୍ତୁଷ୍ଟ କରିପାରିଛନ୍ତି ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ । ସେଥିପାଇଁ ଶୁଭାଶିଷଙ୍କ ନାଁ ଯୁବ ସଭାପତିଙ୍କ ପାଇଁ ଆଗକୁ ଆସିଛି । ବାଣୀବିହାରର ପରେ ରାଜ୍ୟର ଛାତ୍ର ନେତୃତ୍ୱକୁ ବଳ ଯୋଗାଇଥିବା ଚିନ୍ମୟ ସାହୁଙ୍କ ନାଁ ମଧ୍ୟ ଯୁବ ସଭାପତି ପଦ ପାଇଁ ଚର୍ଚ୍ଚାରେ ରହିଛି । ଚିନ୍ମୟଙ୍କୁ ବିଧାୟକ ତଥା ବରିଷ୍ଠ ନେତା ଅରୁଣ ସାହୁଙ୍କ ସମର୍ଥନ ରହିଛି । ଦଳ ଭିତରେ ବଢୁଥିବା ବିବାଦକୁ ଦୃଷ୍ଟିରେ ରଖି ପୁନର୍ବାର ଚାନ୍ଦବାଲି ବିଧାୟକ ବ୍ୟମକେଶ ରାୟଙ୍କୁ ସଭାପତି ପଦ ଦିଆଯାଇପାରେ ବୋଲି ଆକଳନ ହେଉଛି । ଭଦ୍ରକ ଜିଲ୍ଲାରୁ ଆସୁଥିବା ବ୍ୟୋମକେଶଙ୍କୁ ବିଜେପିର ରାଜ୍ୟ ସଭାପତି ମନମୋହନ ସାମଲ, ଯୁବ ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ କାଉଣ୍ଟର କରିବା ଲାଗି ଦଳ ଏହି ନିଷ୍ପତ୍ତି ନେଇପାରେ ।
ଛାତ୍ର ସଙ୍ଗଠନ ନେତୃତ୍ବ ନେବାକୁ ଏମାନେ ଆଶାୟୀ:
ଛାତ୍ର ସଂଗଠନ ନେତୃତ୍ୱ ନେବାକୁ ଦଳରେ 10ରୁ ଅଧିକ ଅଶାୟୀ ଆଗକୁ ଆସିଲେଣି । ବିଧାୟକ ସୌଭିକ ବିଶ୍ୱାଳ, ପୂର୍ବତନ ବିଧାୟକ ରୁଦ୍ରପ୍ରତାପ ମହାରଥି, ହରିଶଙ୍କର ରାଉତ, ପ୍ରଦୋଷ ପରିଡ଼ା, ରାଜେଶ ରାଜ ସ୍ବାଇଁ ଓ ଇପସିତା ସାହୁ ଆଶାୟୀ ଅଛନ୍ତି । କଟକ ଜିଲ୍ଲାକୁ ସନ୍ତୁଷ୍ଟ କରିବା ପାଇଁ ବିଧାୟକ ସୌଭିକ ବିଶ୍ୱାଳଙ୍କୁ ଛାତ୍ର ସଂଗଠନର ନେତୃତ୍ୱ ମିଳିପାରେ । ପୁରୀ ଜିଲ୍ଲାରେ ଦୁର୍ବଳ ସଂଗଠନକୁ ସଜାଡିବା ଲାଗି ପିପିଲିର ପୂର୍ବତନ ବିଧାୟକ ରୁଦ୍ର ପ୍ରତାପ ମହାରଥୀଙ୍କୁ ଏହି ଦାୟିତ୍ୱ ପାଇଁ ଦଳର ଗୋଟେ ଗୋଷ୍ଠୀ ସମର୍ଥନ କରୁଛି । ସେହିପରି ହରିଶଙ୍କରଙ୍କୁ ବରିଷ୍ଠ ନେତା ଦେବୀ ପ୍ରସାଦ ମିଶ୍ରଙ୍କ ସମର୍ଥନ ଥିବାବେଳେ ପ୍ରଦୋଷଙ୍କ ପଛରେ ଅଛି ବିଧାୟକ ଦେବୀ ରଞ୍ଜନ ତ୍ରିପାଠୀଙ୍କ ସମର୍ଥନ । ରାଜେଶଙ୍କ ପଛରେ ରହିଛି ଅରୁଣଙ୍କ ସମର୍ଥନ । ମହିଳା ନେତ୍ରୀ ଭାବେ ଇପ୍ସିତା ସାହୁଙ୍କ ନାଁ ମଧ୍ୟ ଚର୍ଚ୍ଚାକୁ ଆସିଛି ।
ମହିଳା ସଙ୍ଗଠନ ପାଇଁ ଦାବିଦାର ଅନେକ:
ବିଜେଡି ମହିଳା ସଂଗଠନ ପାଇଁ ଦାବିଦାରଙ୍କ ସଂଖ୍ୟା ମଧ୍ୟ ବେଶ ଲମ୍ବା । ପୁନର୍ବାର ସଭାନେତ୍ରୀ ପାଇଁ ସ୍ନେହାଙ୍ଗିନୀ ଛୁରିଆ ଆଶାବାଦୀ ଥିବାବେଳେ ବିଧାୟିକା ସୁବସିନୀ ଜେନା, ପୂର୍ବତନ ବିଧାୟିକା ଲତିକା ପ୍ରଧାନ, ଶ୍ରୀମୟୀ ମିଶ୍ର, ପୂର୍ବତନ ମନ୍ତ୍ରୀ ଟୁକୁନି ସାହୁ ଓ ସାଂସଦ ସୁଲତା ଦେଓ ଆଶାୟୀ ରେସରେ ଅଛନ୍ତି । ସ୍ନେହାଙ୍ଗିନୀଙ୍କ ଦାବିଦାରୀକୁ ଦଳର ବରିଷ୍ଠ ନେତା ସଞ୍ଜୟ ଦାସବର୍ମାଙ୍କ ସମର୍ଥନ ରହିଛି । ଲତିକାଙ୍କୁ ଅତନୁ, ଦେବୀ ଓ ବବିଙ୍କ ସମର୍ଥନ ଥିବା କଥା କୁହାଯାଉଛି । ନିର୍ବାଚନ ଟିକେଟରୁ ବଞ୍ଚିତ ଶ୍ରୀମୟୀ ମିଶ୍ରଙ୍କୁ ଦଳ ସନ୍ତୁଷ୍ଟ କରି ଟ୍ରାକକୁ ଆଣିବା ଲାଗି ଚେଷ୍ଟା କରିପାରେ ।
ଏହା ମଧ୍ୟ ପଢନ୍ତୁ: ଛିଣ୍ଡୁନି ବିଜେଡି ଅଙ୍କ, ଫାଙ୍କା ରହିଲା 15 ଜିଲ୍ଲା ସଭାପତି ଘୋଷଣା |
ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର କହିଛନ୍ତି, "ଛାମୁଆ ସଂଗଠନର କର୍ମକର୍ତ୍ତା ଘୋଷଣା ଆସନ୍ତା 19 ତାରିଖ ପରେ ଆରମ୍ଭ ହେବ । ଏହା ସହ ବିଜେଡିର ବିଭିନ୍ନ ସେଲ ବା ସାମୁଖ୍ୟ ମଧ୍ୟ ଗଠନ ହେବ । ଶ୍ରମିକ ସାମୁଖ୍ୟ ଗଠନ ହୋଇଛି । ଏସସି ଏସଟି, ସଂଖ୍ୟାଲଘୁ, ସାଂସ୍କୃତିକ ସାମୁଖ୍ୟ ଗଠନ ହେବ । ବରିଷ୍ଠ, କନିଷ୍ଠ, ଦକ୍ଷତା, ଅଞ୍ଚଳ ମଧ୍ୟରେ ସମନ୍ୱୟର ସନ୍ତୁଳନ ରକ୍ଷା କରି ନିଷ୍ପତ୍ତି ନିଆଯିବ ।"
ଇଟିଭି ଭାରତ, ଭୁବନେଶ୍ବର
