ଓଟାୱା: ହୁତୁ ହୁତୁ ହୋଇ ଜଳୁଛି କାନାଡା । କାନାଡାର ଜଙ୍ଗଲରେ ଲାଗିଥିବା ଭୟଙ୍କର ବନାଗ୍ନି ବ୍ୟାପି ବହୁ ଧନଜୀବନ ହାନି ଘଟିଛି । ବୁଧବାର ଯାହା ଫଳରେ 31,000ରୁ ଉର୍ଦ୍ଧ୍ୱ ବାସିନ୍ଦାଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି । ଏହି ନିଆଁ ଧୀରେ ଧୀରେ ଗାଁ ଓ ସହରକୁ ବ୍ୟାପୁଥିବାରୁ ଏହା ଅଗ୍ନିଶମ ବିଭାଗର ଚିନ୍ତା ବଢାଉଛି ବୋଲି ଅଧିକାରୀ କହିଛନ୍ତି ।
ପାଉଁଶ ହେଲାଣି 2.2 ମିଲିଅନ ହେକ୍ଟର:
କାନାଡାରେ 200ରୁ ଅଧିକ ସ୍ଥାନରେ ନିଆଁ ଲାଗିଛି । ସେଗୁଡିକ ମଧ୍ୟରୁ ଅର୍ଦ୍ଧେକ ଆୟତ୍ତ ବାହାରେ ରହିଥିବା ଜଣାପଡିଛି । ବର୍ତ୍ତମାନ ଏହି ନିଆଁ ଦ୍ୱାରା 2.2 ମିଲିଅନ ହେକ୍ଟର ପରିମିତ ଅଞ୍ଚଳ ଜଳି ନଷ୍ଟ ହୋଇଯାଇଥିବା ଜଣା ପଡିଛି । ସାସ୍କାଚେୱନ ଓ ମଣିତୋବା ଆଦି ସ୍ଥାନରେ ସର୍ବାଧିକ କ୍ଷୟକ୍ଷତି ଘଟିଛି । ଯାହା ଫଳରେ ଏହି ସ୍ଥାନରେ ଜରୁରୀକାଳୀନ ପରିସ୍ଥିତିର ଘୋଷଣା କରାଯାଇଛି । ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ଥିବା ବେଳେ ବହୁ ଧନଜୀବନ ଓ ବ୍ୟବସାୟ କ୍ଷତିଗ୍ରସ୍ତ ହୋଇଛି ।
ସ୍ଥାନୀୟ ବାସିନ୍ଦାଙ୍କୁ ସ୍ଥାନାନ୍ତର:
ନିଆଁର ପ୍ରଭାବ ଯୋଗୁଁ 2500 ସଂଖ୍ୟା ବିଶିଷ୍ଟ ଏକ ଛୋଟ ସହରର ବାସିନ୍ଦାଙ୍କୁ ସ୍ଥାନାନ୍ତର କରାଯାଇଛି । ସେଠାକାର ଏକ ହୋଟେଲ ବ୍ୟବସାୟର ମାଲିକ ତାରିକ୍ ହୋସେନ୍ ଆଲିନ ଓ ଅଗ୍ନିଶମ ବିଭାଗ ମିଳିତ ଭାବେ ପରିସ୍ଥିତି ସମ୍ଭାଳିବା ପାଇଁ ପ୍ରଚେଷ୍ଠା ଜାରି ରଖିଛନ୍ତି । ତାରିକ୍ ହୋସେନ୍ ଆଲିନଙ୍କ ଅନୁଯାୟୀ, 'ମୁଁ ଭୟଭୀତ ଅବସ୍ଥାରେ ଅଛି, ଲୋକେ ନିଜର ସମ୍ପତ୍ତି, ଧନ ଓ ସ୍ୱପ୍ନ ହରାଉଛନ୍ତି ।'
ସାରା ଦେଶରେ ଅଗ୍ନିଶମ ବିଭାଗର ଅଧିକାରୀ ମାନେ ସତର୍କ ରହିଥିବା ବେଳେ 140 ଆମେରିକୀୟ ଅଧିକାରୀ କାନାଡାରେ ପହଁଚି ନିଆଁ ନିୟନ୍ତ୍ରଣ କରିବାରେ ସାହାଯ୍ୟ କରୁଛନ୍ତି । ଲା'ରୋଞ୍ଜ ଅଗ୍ନିଶମ ବିଭାଗ କହିଛି, 'ଗତ ଶେଷ କିଛି ଘଣ୍ଟା ସଂଘର୍ଷପୂର୍ଣ୍ଣ ଥିଲା ।' ଲା'ରୋଞ୍ଜ ଅଞ୍ଚଳ ଆଖପାଖ ଅଞ୍ଚଳରେ ସକ୍ରିୟ ଭାବେ ଅଗ୍ନି ବ୍ୟାପୁଥିବାର ଜଣାପଡିଛି ।
ଭୟଙ୍କର ବନାଗ୍ନି ଦ୍ୱାରା ଗୋଟିଏ ଅଞ୍ଚଳରେ 4,70,000 ହେକ୍ଟର ପରିମିତ ଅଞ୍ଚଳ ନଷ୍ଟ ହୋଇଯାଇଥିବା ବେଳେ ପଶ୍ଚିମାଞ୍ଚଳରେ ମଧ୍ୟ 1,40,000 ହେକ୍ଟର ପରିମିତ ଅଞ୍ଚଳ ପାଉଁଶରେ ପରିଣତ ହୋଇଛି । ଏହି ନିଆଁ ଦ୍ୱାରା କେନ୍ଦ୍ରୀୟ କାନାଡା ସମେତ ଆମେରିକାର ଉତ୍ତର ଭାଗର ବାୟୁର ମାନ ନିମ୍ନସ୍ତରକୁ ହ୍ରାସ ପାଇଛି । ଏହି ନିଆଁରୁ ବାହାରୁ ଥିବା ଗ୍ୟାସ୍ ଗୁଡିକରେ କାର୍ବନ ମନୋକ୍ସାଇଡ ଭଳି କ୍ଷତିକାରକ ପ୍ରଦୂଷକ ରହିଥିବା ବେଳେ ଏହା ସେଠାକାର ବାସିନ୍ଦାଙ୍କ ଶରୀର ଉପରେ କ୍ଷତିକାରୀ ପ୍ରଭାବ ପକାଇବାର ଆଶଙ୍କା ରହିଛି ।
ମାନବକୃତ କାରଣ:
କାନାଡାରେ ଘଟୁଥିବା ପ୍ରମୁଖ ଅଗ୍ନିକାଣ୍ଡ ଗୁଡିକ ପଛରେ ମାନବକୃତ କାରଣ ରହିଛି । ପ୍ରାୟତଃ ଅସାବଧାନତାବଶତଃ ବଣଭୋଜିରୁ ନିଆଁ ବ୍ୟାପି କିମ୍ବା ଶୁଷ୍କ ଅଞ୍ଚଳରେ ଯାନବାହାନ ଚଳାଚଳ ଫଳରେ ଏପରି ନିଆଁ ବ୍ୟାପିବାର ପ୍ରମୁଖ କାରଣ ବୋଲି କୁହାଯାଉଛି ।
ମନରୁ ଲିଭିନି 2023ର ଭୟଙ୍କର ବନାଗ୍ନି:
ଜଳବାୟୁ ପରିବର୍ତ୍ତନ ଦ୍ୱାରା କାନାଡାରେ ଖରାପ ପାଣିପାଗର ପରିସ୍ଥିତି ସୃଷ୍ଟି ହୋଇଛି । ଗତ 2023 ମସିହାରେ କାନାଡାରେ ଭୟଙ୍କର ବନାଗ୍ନି ଯୋଗୁଁ 15 ନିୟୁତ ହେକ୍ଟର ଜଙ୍ଗଲ ଜଳି ଧ୍ୱଂସ ହୋଇଯାଇଥିଲା ।
