ହାଇଦ୍ରାବାଦ: ଗୃହଯୁଦ୍ଧରେ ଗତ ତିନିଦିନ ହେଲାଣି ଜଳୁଛି ବାଂଲାଦେଶ । ଏପର୍ଯ୍ୟନ୍ତ 4ଶହରୁ ଅଧିକ ନାଗରିକଙ୍କ ମୃତ୍ୟୁ ହେଲାଣି । ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ପଦରୁ ଇସ୍ତଫା ଦେବା ସହ ଦେଶ ଛାଡି ଏବେ ଭାରତରେ ଶରଣ ନେଇଛନ୍ତି । ତାଙ୍କର ରାଜନୈତିକ ଭବିଷ୍ୟତ ଏବେ ଅନିଶ୍ଚିତତା ମଧ୍ୟରେ । ସେନା କେଉଁ ପ୍ରକାର ମଧ୍ୟବର୍ତ୍ତୀକାଳୀନ ସରକାର ଗଠନ କରିବ, ସେନେଇ ସମଗ୍ର ବିଶ୍ବର ନଜର ଥିବା ବେଳେ ଆସନ୍ତାକାଲି ପ୍ରଫେସର ମହମ୍ମଦ ୟୁନୁସଙ୍କ ନେତୃତ୍ବରେ ସେନା ସମର୍ଥିତ ଏହି ଅନ୍ତରୀଣ ସରକାର ଗଠନ ହେବାକୁ ଯାଉଛି ।
- କିପରି ହେବ ଅନ୍ତରୀଣ ସରକାରର ରୂପରେଖ:-
ମହମ୍ମଦ ୟୁନୁସ ହେଉଛନ୍ତି ନୋବେଲ ପୁରସ୍କାର ବିଜେତା ଅର୍ଥଶାସ୍ତ୍ରୀ । ତାଙ୍କ ନାମ ସେନା ପକ୍ଷରୁ ସୁପାରିଶ କରାଯାଇଥିଲା । ସେ ଆସନ୍ତାକାଲି ସେ ଅନ୍ତରୀଣ ସରକାର ଗଠନ କରିବେ । ତେବେ ଏହି ଅନ୍ତରୀଣ ସରକାରର ରୂପରେଖ କିପରି ହେବ ସେ ସମ୍ପର୍କରେ କୌଣସି ସ୍ପଷ୍ଟତା ଆସିନି । ମାତ୍ର ଏଥିରେ ସେନାର ପ୍ରଛନ୍ନ ନିୟନ୍ତ୍ରଣ ରହିବାକୁ ଥିବା ବେଳେ ଦେଶର ଅନ୍ୟ ରାଜନୈତିକ ଦଳର ପ୍ରତିନିଧିମାନେ ସାମିଲ ହେବେ । ହେଲେ ହସିନାଙ୍କ ଦଳ ଆଓ୍ବାମୀ ଲିଗର କୌଣସି ସଦସ୍ୟଙ୍କୁ ଏଥିରେ ସ୍ଥାନ ମିଳିବ ନାହିଁ ବୋଲି ସୂତ୍ରରୁ ଜଣାପଡିଛି ।
- କିଏ ଏହି ମହମ୍ମଦ ୟୁନୁସ:-
1940 ମସିହାରେ ଅବିଭକ୍ତ ଭାରତରେ ଜନ୍ମଗ୍ରହଣ କରିଥିଲେ ୟୁନୁସ । ସେ ଜଣେ ବିଶ୍ବର ଜଣାଶୁଣା ଅର୍ଥଶାସ୍ତ୍ରୀ ଓ ଅର୍ଥନୀତି ପ୍ରାଧ୍ୟାପକ । ସେ ଅର୍ଥନୀତି ପାଇଁ 2006ରେ ବିଶ୍ବର ସମ୍ମାନଜନକ ‘ନୋବେଲ’ ପ୍ରାଇଜରେ ସମ୍ମାନିତ ହୋଇସାରିଛନ୍ତି । ଏକଧାରାରେ ଜଣେ ଅର୍ଥଶାସ୍ତ୍ରୀ, ଶିକ୍ଷାବିତ, ଉଦ୍ୟୋଗୀ ଓ ବ୍ୟାଙ୍କର ଭାବେ ତାଙ୍କର ବହୁମୁଖୀ ପରିଚୟ ରହିଛି । ସେ ବାଂଲାଦେଶର ପ୍ରତିଷ୍ଠିତ ‘ଗ୍ରାମୀଣ ବ୍ୟାଙ୍କ’ର ପ୍ରତିଷ୍ଠାତା-ମୁଖ୍ୟ ମଧ୍ୟ । 2012ରେ ସେ ସ୍କଟଲାଣ୍ଡର ଗ୍ଲାସ୍ଗୋ କାଲେଡୋନିଆନ ବିଶ୍ବବିଦ୍ୟାଳୟର ଚାନସେଲର ଭାବେ ନିଯୁକ୍ତ ହୋଇଥିଲେ । ହସିନା ସରକାରର ପତନ ପରେ ସେନା ଅନ୍ତରୀଣ ସରକାର ଗଠନ କରାଯିବା ଘୋଷଣା କରିବା ପରେ ୟୁନୁସଙ୍କ ନାମ ବିଶ୍ବବ୍ୟାପୀ ଚର୍ଚ୍ଚାକୁ ଆସିଥିଲା ।
- ହସିନାଙ୍କ ପାର୍ଟିର ନେତାଙ୍କୁ କରାଯାଉଛି ଟାର୍ଗେଟ କିଲିଂ:-
ଗତ 3ଦିନ ଧରି ସମଗ୍ର ବାଂଲାଦେଶ ଜଳୁଥିବା ବେଳେ ଶେଖ ହସିନାଙ୍କ ଦଳର ନେତାଙ୍କୁ ବିଦ୍ରୋହୀମାନେ ଖୋଜି ଖୋଜି ହତ୍ୟା କରୁଛନ୍ତି । ବର୍ତ୍ତମାନ ସୁଦ୍ଧା ପ୍ରାୟ 20ରୁ ଅଧିକ ‘ଆଓ୍ବାମୀ ଲିଗ’ର ନେତାଙ୍କୁ ହତ୍ୟା କରାଯାଇ ସାରିଲାଣି । ବାଂଲାଦେଶର ବିଭିନ୍ନ ସ୍ଥାନରେ ଏହି ନେତା ଓ ତାଙ୍କ ପରିବାର ସଦସ୍ୟଙ୍କୁ ଟାର୍ଗେଟ କିଲିଂ କରାଯାଇଛି । ଏବେ ସୁଦ୍ଧା ପ୍ରାୟ 4ଶହରୁ ଅଧିକ ସାଧାରଣ ଲୋକଙ୍କର ଜୀବନହାନୀ ହୋଇସାରିଲାଣି ।
- ସମଗ୍ର ଦେଶରେ କର୍ଫ୍ୟୁ ଜାରି କରିବା ପାଇଁ ଚାହୁଁଥିଲେ ହସିନା, ମନା କରିଥିଲା ସେନା:-
ଇସ୍ତଫା ଦେବା ପୂର୍ବ ରାତିରେ ସମଗ୍ର ଦେଶରେ କର୍ଫ୍ୟୁ ଜାରି କରି ସ୍ଥିତିକୁ ନିୟନ୍ତ୍ରଣ କରିବାକୁ ସେନାକୁ ନିର୍ଦ୍ଦେଶ ଦେଇଥିଲା ହସିନାଙ୍କ କାର୍ଯ୍ୟାଳୟ । ମାତ୍ର ସେନା ତାହା ଗ୍ରହଣ କରିନଥିଲା । ନିଜେ ସେନାମୁଖ୍ୟ ହସିନାଙ୍କ ସହ ଆଲୋଚନା କରି ଏପରି ସ୍ଥିତିରେ କର୍ଫ୍ୟୁ ଜାରି କରିବା ସମ୍ଭବପର ନୁହେଁ ଓ ସେନା ଆନ୍ଦୋଳନକାରୀଙ୍କୁ ଗୁଳି ଚଳାଇପାରିବ ନାହିଁ ବୋଲି କହିଥିଲେ । ଫଳରେ ହସିନାଙ୍କ ନିକଟରେ ଇସ୍ତଫା ଛଡା ଆଉ କୌଣସି ବିକଳ୍ପ ନଥିଲା । ମାତ୍ର ଇସ୍ତଫା ପରେ ସେ ପ୍ରଧାନମନ୍ତ୍ରୀଙ୍କ ସରକାରୀ ବାସଭବନ ‘ଗଣଭବନ’ରେ ରହିବା ମଧ୍ୟ ସମ୍ଭବପର ନହେବାରୁ ସେ ତୁରନ୍ତ ଦେଶ ଛାଡି ଭାରତ ଅଭିମୁଖେ ଉଡାଣ ଭରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
