ହାଇଦ୍ରାବାଦ: ଲୋକପ୍ରିୟ ବଲିଉଡ ଫିଲ୍ମ ନିର୍ମାତା ବିବେକ ଅଗ୍ନିହୋତ୍ରୀ ଗତ ବର୍ଷ 'ଦ ଦିଲ୍ଲୀ ଫାଇଲ୍ସ' ଘୋଷଣା କରିଥିଲେ । ବିବେକ ଅଗ୍ନିହୋତ୍ରୀଙ୍କ ଏହି ଫିଚର ଫିଲ୍ମଟି ପୂର୍ବରୁ ଚଳିତ ବର୍ଷ ସ୍ୱାଧୀନତା ଦିବସରେ ରିଲିଜ୍ ହେବାର ଥିଲା । କିନ୍ତୁ, ଏବେ ଏଥିରେ ଅନେକ ପରିବର୍ତ୍ତନ କରାଯାଇଛି । ଆଜି, ଜୁନ୍ ୧୦ ତାରିଖରେ, ଫିଲ୍ମ ନିର୍ମାତା ବିବେକ ଅଗ୍ନିହୋତ୍ରୀ 'ଦି ଦିଲ୍ଲୀ ଫାଇଲ୍ସ' ବିଷୟରେ ଏକ ଅପଡେଟ୍ ସେୟାର କରିଛନ୍ତି । ସେ 'ଦ ଦିଲ୍ଲୀ ଫାଇଲ୍ସ'ର ନାମ ପରିବର୍ତ୍ତନ କରିଛନ୍ତି । ଏହା ସହିତ, ଫିଲ୍ମର ରିଲିଜ୍ ତାରିଖ ମଧ୍ୟ ପରିବର୍ତ୍ତନ କରାଯାଇଛି ।
ବିବେକ ଅଗ୍ନିହୋତ୍ରୀ ମଙ୍ଗଳବାର, ଜୁନ୍ ୧୦ ତାରିଖରେ ଏକ ନୂତନ ପୋଷ୍ଟର ସହ 'ଦ ଦିଲ୍ଲୀ ଫାଇଲ୍ସ' ବିଷୟରେ ଏକ ଅପଡେଟ୍ ସେୟାର କରିଛନ୍ତି । ସେ ତାଙ୍କ ପ୍ରଶଂସକମାନଙ୍କୁ କହିଛନ୍ତି ଯେ ସେ ତାଙ୍କ ଆଗାମୀ ଫିଲ୍ମ 'ଦ ଦିଲ୍ଲୀ ଫାଇଲ୍ସ'ର ନାମ ଏବଂ ରିଲିଜ୍ ତାରିଖ ପରିବର୍ତ୍ତନ କରିଛନ୍ତି । ତାଙ୍କ ଫିଲ୍ମର ନାମ ପୂର୍ବରୁ 'ଦ ଦିଲ୍ଲୀ ଫାଇଲ୍ସ: ଦ ବେଙ୍ଗଲ୍ ଚାପ୍ଟର' ଥିଲା । ଏହି ଫିଲ୍ମଟି ଚଳିତ ବର୍ଷ ସ୍ୱାଧୀନତା ଦିବସ ଅବସରରେ ୧୫ ଅଗଷ୍ଟରେ ରିଲିଜ୍ ହେବାର ଥିଲା । କିନ୍ତୁ, ଏବେ ଏହାକୁ ପରିବର୍ତ୍ତନ କରାଯାଇଛି ।
'ଦ ଦିଲ୍ଲୀ ଫାଇଲ୍ସ'ର ନାମ ଓ ରିଲିଜ ଡେଟ୍
ବିବେକ ଫିଲ୍ମର ନୂତନ ପୋଷ୍ଟର ସେୟାର କରି ଫିଲ୍ମ ବିଷୟରେ ସୂଚନା ଦେବା ସହିତ କ୍ୟାପସନରେ ଲେଖିଛନ୍ତି, 'ବଡ଼ ଘୋଷଣା: 'ଦ ଦିଲ୍ଲୀ ଫାଇଲ୍ସ' ଏବେ 'ଦ ବେଙ୍ଗଲ ଫାଇଲ୍ସ' ହୋଇଯାଇଛି । ଟିଜର ଏହି ଗୁରୁବାର, ୧୨ ଜୁନ୍ ୨୦୨୫ ଦିନ ୧୨ଟାରେ ଆସିବ । ୫ ସେପ୍ଟେମ୍ବର ୨୦୨୫ରେ ସିନେମା ହଲରେ ରିଲିଜ୍ ହେବ ।' ତେବେ ଫିଲ୍ମର ନାମ ଏବେ 'ଦ ବେଙ୍ଗଲ ଫାଇଲ୍ସ: ରାଇଟ୍ ଟୁ ଲାଇଫ୍' ରଖାଯାଇଥିବା ବେଳେ ଗୁରୁଦିବସ ଅବସରରେ ସେପ୍ଟେମ୍ବର ୫ ତାରିଖରେ ସାରା ବିଶ୍ୱର ସିନେମା ହଲରେ ରିଲିଜ୍ ହେବ ।
'ଦ ବେଙ୍ଗଲ୍ ଫାଇଲ୍ସ' ଷ୍ଟାରକାଷ୍ଟ
'ଦ ବେଙ୍ଗଲ୍ ଫାଇଲ୍ସ' ବିବେକଙ୍କ ଦ୍ୱାରା ନିର୍ଦ୍ଦେଶିତ ଏବଂ ପରବର୍ତ୍ତୀ ଅଭିଷେକ ଅଗ୍ରୱାଲ ଏବଂ ପଲ୍ଲବୀ ଜୋଶୀଙ୍କ ଦ୍ୱାରା ନିର୍ମିତ । 'ଦ ବେଙ୍ଗଲ୍ ଫାଇଲ୍ସ: ରାଇଟ୍ ଟୁ ଲାଇଫ୍'ର ଷ୍ଟାରକାଷ୍ଟ ତାଲିକାରେ ମିଥୁନ୍ ଚକ୍ରବର୍ତ୍ତୀ, ଅନୁପମ ଖେର ଏବଂ ପଲ୍ଲବୀ ଜୋଶୀ ପ୍ରମୁଖ ଭୂମିକାରେ ନଜର ଆସିବେ ।
ଏହା ମଧ୍ୟ ପଢନ୍ତୁ: ତଥ୍ୟ ସହ ସତ୍ୟ ଦେଖାଇବ 'ଦି କାଶ୍ମୀର ଫାଇଲ୍ସ ଅନରିପୋର୍ଟେଡ' ! ଟିଜର ରିଲିଜ
'ଦ ବେଙ୍ଗଲ୍ ଫାଇଲ୍ସ' କାହାଣୀ
ଫିଲ୍ମର କାହାଣୀ ବିଷୟରେ କହିବାକୁ ଗଲେ, ଏହି ଫିଲ୍ମଟି ୧୯୪୦ ଦଶକରେ ବଙ୍ଗଳାରେ ହୋଇଥିବା ସାମ୍ପ୍ରଦାୟିକ ହିଂସା, ବିଶେଷକରି ଡାଇରେକ୍ଟ ଆକ୍ସନ୍ ଡେ ଏବଂ ନୋଆଖାଲି ଦଙ୍ଗା ଭଳି ଘଟଣା ଉପରେ ଆଧାରିତ । ବିବେକ ଅଗ୍ନିହୋତ୍ରୀ ଏହି ଘଟଣାକୁ 'ହିନ୍ଦୁ ନରସଂହାର' ଭାବରେ ବର୍ଣ୍ଣନା କରିଛନ୍ତି ଏବଂ କହିଛନ୍ତି ଯେ ଏହି ଫିଲ୍ମ ଭାରତୀୟ ଇତିହାସର ସେହି ଅଧ୍ୟାୟକୁ ଉଜାଗର କରିବାକୁ ଚେଷ୍ଟା କରିବ ଯାହାକୁ ପ୍ରାୟତଃ ଅଣଦେଖା କରାଯାଇଛି । କହିରଖୁଛୁ ଯେ, 'ଦ ବେଙ୍ଗଲ୍ ଫାଇଲ୍ସ' ଅଗ୍ନିହୋତ୍ରୀ ଫାଇଲ୍ସ ଟ୍ରାୟଲୋଜିର ତୃତୀୟ ଫିଲ୍ମ, ଯାହା ପୂର୍ବରୁ ଦ ତାସକେଣ୍ଟ ଫାଇଲ୍ସ (୨୦୧୯) ଏବଂ ଦ କାଶ୍ମୀର ଫାଇଲ୍ସ (୨୦୨୨) ପ୍ରକାଶିତ ହୋଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
