ଗୟା: 20 ବର୍ଷ ପୂର୍ବେ ପାନୀୟ ଜଳ ପାଇଁ ସଂଘର୍ଷ କରୁଥିବା ମହିଳାଙ୍କୁ ଦେଖିଥିଲେ ସେ । କିଭଳି ଟାଇଁ ଟାଇଁ ଖରାରେ ମୁଣ୍ଡରେ ପାଣି ଗରା ବୋହି ଘରର ମହିଳାମାନେ ମାଇଲ ମାଇଲ ବାଟ ଚାଲୁଛନ୍ତି । ଏ ଦୃଶ୍ୟ ତାଙ୍କୁ ବିଚଳିତ କରିଥିଲା । 2004ରେ ବିହାର ବୋଧଗୟାର ବିବେକ କୁମାର କଲ୍ୟାଣ ଏନେଇ ପଦକ୍ଷେପ ନେଇଥିଲେ । ବର୍ତ୍ତମାନ ସୁଦ୍ଧା ବିବେକ 2 ହଜାରରୁ ଊର୍ଦ୍ଧ୍ବ ନଳକୂପ 500 ଗାଁରେ ଖନନ କରିସାରିଲେଣି । ଝାଡଖଣ୍ଡ ଠୁ ନେପାଳ ସୀମା ପର୍ଯ୍ୟନ୍ତ ଅଧିକାଂଶଙ୍କ ଜୀବନ ବଦଳାଇ ଦେଇଛନ୍ତି ବିବେକ ।
- 2 ହଜାରରୁ ଅଧିକ ନଳକୂପ ଖନନ
‘‘ଗୋଟିଏ ଗରା ପାଣି ପାଇଁ ମହିଳା ମାନେ ଏତେ ଟାଣ ଖରାରେ ମାଇଲ ମାଇଲ ଦୂର ଯିବା ମୁଁ ଦେଖିଛି । ଯାହା ମୋତେ ଆଶ୍ଚର୍ଯ୍ୟ କରୁଥିଲା । ସେତେବେଳେ ମୁଁ ଚିନ୍ତା କରିଥିଲି ଏହି ମହିଳା ମାନଙ୍କ ପାଇଁ କିଛି କରିବି । ଆଉ ଏବେ ସେ ସମୟ ଆସିବାରୁ ମୁଁ ତାହା କରି ଦେଖାଇଛି’’ । କିଛି ସଞ୍ଚିତ ଅର୍ଥରୁ ଆରମ୍ଭ ଏହି ଛୋଟ ମିଶନ ଏବେ ଜନ ଆନ୍ଦୋଳନରେ ପହଞ୍ଚିଛି । ଏବେ ଦେଶ ବାହାରୁ ବିବେକ ପାଇଁ ଛୁଟୁଛି ସାହାଯ୍ୟର ସୁଅ । 10, 15 କି 50 ନଳକୂପ ହେଉ ବିବେକଙ୍କୁ ଏଥିପାଇଁ ଫଣ୍ଡିଂ ମିଳୁଛି । ବିଭିନ୍ନ ପରିବାର ଓ ସ୍ଥାନୀୟ ସ୍ବେଚ୍ଛାସେବୀ ସଙ୍ଗଠନ ଏଥିପାଇଁ ତାଙ୍କୁ ସାହାଯ୍ୟ କରୁଛନ୍ତି ।
ତାଙ୍କର କାର୍ଯ୍ୟ ମୁଖ୍ୟତଃ ଦଳିତ,ବସ୍ତିବାସିନ୍ଦା, ଦୁର୍ଗମ ଅଞ୍ଚଳ ଏବଂ ଯେଉଁ ଅଞ୍ଚଳରେ ସରକାରୀ ହସ୍ତକ୍ଷେପ ନାହିଁ କିମ୍ବା କମ୍ ସେହି ଅଞ୍ଚଳକୁ ଫୋକସ କରିଛନ୍ତି ବିବେକ । ସେ କୁହନ୍ତି, "ଜଳ ଅଭାବ ଅଧିକାଂଶ ଲୋକଙ୍କ ହୃଦୟଙ୍ଗମ କରିବା ଅପେକ୍ଷା ଏକ ବଡ ସମସ୍ୟା ଅଟେ। ଏହା ବଞ୍ଚିବାର ବିଷୟ। ଯେଉଁମାନଙ୍କୁ ଜଳ ପାଇବାକୁ ସଂଘର୍ଷ କରିବାକୁ ପଡିବ ସେମାନଙ୍କୁ ଏହି ସମସ୍ୟାରୁ ଉଦ୍ଧାର କରିବାକୁ ପଡିବ।"
- 24 ଘଣ୍ଟାରେ ଜଳ ସମସ୍ୟାର ସମାଧାନ
ସରକାରରେ ଅମଲାତାନ୍ତ୍ରିକ ବାଧା କାରଣରୁ ସାଧାରଣତଃ ସମୟ ସାପେକ୍ଷ । ଯେଉଁଥିପାଇଁ ଅଧିକାଂଶ ଲୋକ ଜଳ ସମସ୍ୟାର ସମାଧାନ ପାଇଁ ବିବେକଙ୍କ କବାଟ ବାଡେଇବା ଆରମ୍ଭ କରି ଦେଇଛନ୍ତି। ବିବେକ କୁହନ୍ତି, "ସରକାରୀ ହ୍ୟାଣ୍ଡପମ୍ପ ସ୍ଥାପନ ପାଇଁ ସେମାନଙ୍କୁ ଏତେ ପ୍ରକ୍ରିୟା ଦେଇ ଗତି କରିବାକୁ ପଡିବ ତେଣୁ ସେମାନେ ମୋତେ କିମ୍ବା ମୋ ଦଳକୁ ଡାକିବାରେ ସହଜ ଅନୁଭବ କରନ୍ତି।" ଆଜି, ତାଙ୍କ ଟିମ୍ କଲ୍ ଗ୍ରହଣ କରିବାର 24 ଘଣ୍ଟା ମଧ୍ୟରେ ଏକ ନଳକୂପ ସ୍ଥାାପିତ କରିଛନ୍ତି । ଭଙ୍ଗା ନଳକୂପର ମରାମତି ପାଇଁ ମଧ୍ୟ ଗ୍ରାମବାସୀ, ସ୍ଥାନୀୟ ନେତା, ଏପରିକି ସରକାରୀ କର୍ମଚାରୀମାନେ ତୁରନ୍ତ ସାହାଯ୍ୟ ଆବଶ୍ୟକ କରୁଥିବା ସମୟରେ ତାଙ୍କୁ ଡାକନ୍ତି। ସେ ଥଟ୍ଟା କରି କୁହନ୍ତି “ବେଳେବେଳେ, ମୁଁ ଅନୁଭବ କରୁଛି ଯେ ମୁଁ ଏକ ସରକାରୀ ବିଭାଗ ଚଳାଉଛି।
ବିବେକଙ୍କ କାମକୁ ସମ୍ମାନ ମିଳୁଥିବାବେଳେ ତାଙ୍କ ନେଟୱର୍କ ବୃଦ୍ଧି ପାଉଛି । ସେ ସିଦ୍ଧାର୍ଥ କ୍ୟାମ୍ପେନ ଟ୍ରଷ୍ଟ ନାମରେ ଏକ ସଂସ୍ଥା ପ୍ରତିଷ୍ଠା କରିଛନ୍ତି । ଏହି ସଂସ୍ଥା ମାଧ୍ୟମରେ ଲୋକଙ୍କ ନିକଟରେ ପାନୀୟ ଜଳ ପହଞ୍ଚିବାର ବ୍ୟବସ୍ଥା କରିବା ସହ ପ୍ରତି ଅଞ୍ଚଳରେ ତାଙ୍କ ଟିମର 5 ଜଣ ସଦସ୍ୟଙ୍କୁ ନିୟୋଜିତ କରିଛନ୍ତି । ବୋଧ ଗୟା ଆସୁଥିବା ବିଦେଶୀ ପର୍ଯ୍ୟଟକ ତାଙ୍କ କାମ ଦେଖି ଏହି ପ୍ରକ୍ରିୟାରେ ସ୍ବେଚ୍ଛାକୃତ ଭାବେ ସାମିଲ ହେବାକୁ ବିବେକଙ୍କୁ ଅନୁରୋଧ କରୁଥିବା ସେ କହିଛନ୍ତି । ତାଙ୍କ କାମକୁ ସବଆଡୁ ପ୍ରଶଂସା ମିଳୁଥିବା ବେଳେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ମଧ୍ୟ ବିବେକଙ୍କ କାମକୁ ପ୍ରଶଂସା କରିଛନ୍ତି । ଯେତେବେଳେ କୋବିନ୍ଦ ବିହାରର ରାଜ୍ୟପାଳ ଥିଲେ ସେ ମୋତେ ଭେଟି ମୋ କାମକୁ ପ୍ରଶଂସା କରିଥିଲେ । ଆଗକୁ ଏମିତି କାମ ଜାରି ରଖିବାକୁ ସେ ମୋତେ ପ୍ରେରଣା ଦେଇଥିଲେ ବୋଲି କହିଛନ୍ତି ବିବେକ । କେବଳ ପୂର୍ବତନ ରାଷ୍ଟ୍ରପତି ନୁହେଁ ଭିଏତନାମର ଏକ ପ୍ରତିନିଧି ଦଳ ମଧ୍ୟ ତାଙ୍କ କାମକୁ ପ୍ରୋତ୍ସାହିତ କରିବା ସହ ବୈଶ୍ବିକ ସମର୍ଥନ ମିଳୁଥିବାରୁ ଖୁସି ପ୍ରକାଶ କରିଛନ୍ତି ବିବେକ ।
- କେମିତି କରନ୍ତି ବୋରିଂ
ଗ୍ରାମାଞ୍ଚଳରେ ବିଭିନ୍ନ ପ୍ରକାରର ଭୂମି ଥିବାରୁ ବିବେକଙ୍କ ଟିମ ତିନୋଟି ଭିନ୍ନ ବୋରିଂ ଟେକନିକର ବ୍ୟବହାର କରିଥାନ୍ତି । ପ୍ରଥମଟି ଡାଇମଣ୍ଡ ବୋରିଂ,ଦ୍ବିତୀୟରେ ଡିଜେଲ ବୋରିଂ ଓ ଶେଷରେ ହାତ ବୋରିଂ । ପ୍ରତି ନଳକୂପର ମୂଲ୍ୟ 50 ହଜାର ଟଙ୍କା ପଡିଥାଏ । କୋଭିଡ 19 ମହାମାରୀ ସମୟରେ‘ଟୀକା ବଦଳରେ ପାଣି’ ଅଭିଯାନ ଆରମ୍ଭ କରିଥିଲେ ବିବେକ । ଗ୍ରାମାଞ୍ଚଳରେ ପରିବାରର ପ୍ରତି ସଦସ୍ୟ ଟୀକା ନେଲେ ପ୍ରତିବଦଳରେ ସେମାନଙ୍କ ଗାଁରେ ନଳକୂପ ବ୍ୟବସ୍ଥା କରିବାକୁ ପ୍ରତିଶ୍ରୁତି ଦେଇଥିଲେ ବିବେକ । ତାଙ୍କର ଏହି ଅଭିଯାନ ଯୋଗୁଁ ଗାଁରେ ଜଳକଷ୍ଟ ଦୂର ସହ ଗ୍ରାମାଞ୍ଚଳ ଲୋକେ ଅଧିକରୁ ଅଧିକ ସଂଖ୍ୟାରେ ଟୀକା ନେଇଥିଲେ ।
ଦୁଇ ଦଶନ୍ଧି ଧରି ନିସ୍ବାର୍ଥପର ଭାବେ କାମ କରି ଆସୁଥିବା ବିବେକଙ୍କ ଉତ୍ସାହ ଆଜି ଯାଏଁ କମିନାହିଁ । ସେ କହିଛନ୍ତି ଯେ‘ଯେପର୍ଯ୍ୟନ୍ତ ମୁଁ ବଞ୍ଚିଛି, ମୁଁ ନଳକୂପ ଲଗାଇ ଚାଲିଥିବି ’। “ ଅଞ୍ଚଳରେ କିମ୍ବା ଗ୍ରାମରେ ଏକ ନଳକୂପ ଲଗାଯିବା ପରେ ଗ୍ରାମବାସୀଙ୍କ ମୁହଁରେ ଥିବା ହସ ଫୁଟାଇବା ପାଇଁ ସମସ୍ତେ ଯୋଗ୍ୟ ନୁହନ୍ତି । ବିବେକ ତାଙ୍କର ଫୋନ ନମ୍ବର ଜାରି କରିଛନ୍ତି । ଯେଉଁ ଅଞ୍ଚଳରେ ପାନୀୟ ଜଳର ସମସ୍ୟା ରହୁଛି ସେମାନେ ଦିଆଯାଇଥିବା ନମ୍ବରରେ ବିବେକଙ୍କୁ କଲ୍ କରିବା ସହ ଫେସବୁକ୍ରେ ମେସେଜ ମଧ୍ୟ କରିପାରିବେ ।
ଏହା ମଧ୍ୟ ପଢନ୍ତୁ ଦୁଷ୍କର୍ମକୁ ନେଇ ଆହ୍ଲାବାଦ ହାଇକୋର୍ଟଙ୍କ ରାୟ ଉପରେ ସୁପ୍ରିମ ପ୍ରହାର, କହିଲେ ପର୍ଯ୍ୟବେକ୍ଷଣ ‘ସମ୍ପୂର୍ଣ୍ଣ ଅସମ୍ବେଦନଶୀଳ’
ଏହା ମଧ୍ୟ ପଢନ୍ତୁ ମହାଦେବ ଆପ୍ ମାମଲା: ଛତିଶଗଡ଼ ପୂର୍ବତନ ମୁଖ୍ୟମନ୍ତ୍ରୀ ବଘେଲଙ୍କ ଘରେ ସିବିଆଇ ରେଡ୍
