ହାଇଦ୍ରାବାଦ: ପୁଣି ଥରେ ଚର୍ଚ୍ଚାରେ ପ୍ରସିଦ୍ଧ ବାଂଲାଦେଶୀ ଲେଖିକା ତସଲିମା ନସରିନ । ଏବେ ଚର୍ଚ୍ଚା ତାଙ୍କ ଚିନ୍ତାଙ୍କୁ ନେଇ । ନିଜ ଜୀବନ ବିପଦରେ ଥିବା କହିଛନ୍ତି ତସଲିମା । ସେ ବାଂଲାଦେଶରୁ ବିତାଡିତ ହେବା ପରେ ୟୁରୋପ ଓ ପରେ ପରେ ଭାରତରେ ରହି ଆସୁଥିଲେ । ଦେଢ ମାସରୁ ଉର୍ଦ୍ଧ୍ବ ସମୟ ହେଲାଣି ଭାରତରୁ ମିଳିଥିବା ବାସ କରିବା ଅନୁମତି ଅବଧି ଶେଷ ହୋଇଯାଇଛି ।
ଭାରତ ଶରଣରେ ତସଲିମା:
ପ୍ରସିଦ୍ଧ ଲେଖିକା ତସଲିମା ନସରିନ ବର୍ତ୍ତମାନ ଭାରତରେ ଅଛନ୍ତି । ସେ ୨୦୧୧ରୁ ଭାରତରେ ରହି ଆସୁଛନ୍ତି । ହେଲେ ତାଙ୍କୁ ମିଳିଥିବା ଅନୁମତି ଅବଧି ଗତ ଜୁଲାଇରୁ ଶେଷ ହୋଇଯାଇଛି । ଗୋଟିଏ ପଟେ ଅବଧି ସରିଛି, ଅନ୍ୟପଟେ ଭିସା ରିନ୍ୟୁ ମଧ୍ୟ ହୋଇ ପାରୁନାହିଁ । ତସଲିମାଙ୍କ କହିବା ଅନୁଯାୟୀ, ଏନେଇ ପୁନର୍ବାର ଆବେଦନ କରିଥିଲେ ମଧ୍ୟ କୌଣସି ସରକାରୀ ଅଧିକାରୀଙ୍କ ଏନେଇ ନିଘା ନାହିଁ ।
'ମୋତେ ଭାରତରେ ରହିବା ପସନ୍ଦ'
ଏକ ଜାତୀୟ ଗଣମାଧ୍ୟମରେ ସାକ୍ଷାତକାର ବେଳେ ତସଲିମା କହିଛନ୍ତି, "ମୁଁ ଭାରତରେ ରହିବାକୁ ଚାହେଁ । ହେଲେ ପାଖାପାଖି ଦେଢ ମାସ ହେଲାଣି ମୁଁ ପରମିଟ୍ ରିନ୍ୟୁ କରିବାକୁ ଚାହୁଁଥିଲେ ବି ତାହା ହୋଇପାରୁନାହିଁ । ସବୁବେଳେ ମୁଁ ଅନଲାଇନ ଆପ୍ଲିକେସନ ଚେକ୍ କରୁଛି । ହେଲେ ଏପର୍ଯ୍ୟନ୍ତ କୌଣସି ଅପଡେଟ୍ ନାହିଁ । ଏମତି ଆଗରୁ କେବେ ହୋଇନାହିଁ ।"
'ପରମିଟ୍ ନମିଳିଲେ ମରିଯିବି'
ଯଦି ମୋତେ ଭାରତରେ ରହିବାକୁ ସରକାର ଅନୁମତି ପ୍ରଦାନ ନକରନ୍ତି ତେବେ ହୁଏତ ମୋ ଜୀବନ ଚାଲିଯାଇପାରେ । ମୋ ଜୀବନ ନିଶ୍ଚିତ ଯାଇପାରେ । କାରଣ ଆଉ କେଉଁଠିକୁ ଯିବାକୁ ମୋ ପାଖରେ ରାସ୍ତା ନାହିଁ । ଏହାସହ ପୂର୍ବ ପ୍ରଧାନମନ୍ତ୍ରୀ ଶେଖ ହସିନା ଓ ଖାଲିଦା ଜିୟାଙ୍କ ପାଇଁ ସେ ଦେଶରୁ ବିତାଡିତ ହୋଇଥିବା କଥା କହିଛନ୍ତି ।
ବାଂଲାଦେଶ ହିଂସା ସହ ରହିଛି କି ସମ୍ପର୍କ ?
ସେପଟେ ବାଂଲାଦେଶ ହିଂସା ସମ୍ପର୍କରେ ତସଲିମା କହିଛନ୍ତି,' ମୋର ବାଂଲାଦେଶର ବର୍ତ୍ତମାନ ସ୍ଥିତି ସହ କିଛି ସମ୍ପର୍କ ନାହିଁ । କି ରାଜନୀତି ସହ ଜଡିତ ନାହିଁ । ମୋର ପରମିଟ୍ ବାଲଂଦେଶ ବିବାଦ ପୂର୍ବରୁ ଶେଷ ହୋଇଯାଇଥିଲା ।'
୧୯୯୪ରେ ବାଂଲାଦେଶ ଛାଡିଥିଲେ ତସଲିମା:
ପ୍ରସିଦ୍ଧ ଲେଖିକା ତସଲିମା ନସରିନଙ୍କ ଯାତ୍ରା ଏତେ ସହଜ ନଥିଲା । ତାଙ୍କ ଦ୍ବାରା ଲିଖିତ ପୁସ୍ତକ ବା ଆର୍ଟିକିଲକୁ ନେଇ ସେ ସବୁବେଳେ ବିବାଦରେ ରହିଆସୁଥିଲେ । ୧୯୯୪ ମସିହାରେ ମୁସଲିମ ଲ ଅନୁସାରେ ତାଙ୍କ ବିରୋଧରେ ଫତୱା ଜାରି ହୋଇଥିଲା । ତେଣୁ ସେ ଦେଶ ଛାଡି ୟୁରୋପ ଚାଲିଯାଇଥିଲେ । ସେଠାରେ କିଛି ବର୍ଷ ରହିବା ପରେ ସେ ଭାରତରେ ରହିଆସୁଛନ୍ତି । ବର୍ତ୍ତମାନ ପ୍ରଶ୍ନ ଉଠୁଛି, ବାଂଲାଦେଶରେ ରାଜନୈତିକ ଅସ୍ଥିରତା ଜାରି ରହିବା ଏବଂ ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନା ଦେଶ ଛାଡ଼ି ଭାରତରେ ଶରଣ ପଶିଥିବା ବେଳେ, ଏବେ କଣ କରିବେ ଲେଖିକା ନସରିନଷ ଯଦି ଭାରତରୁ ଅନୁମତି ନମିଳେ, ତେବେ ସେ କୁଆଡ଼େ ଯିବେ ?
