इंजिनमध्ये बिघाड झाल्यानंतर स्पाइसजेट विमानाचे दिल्लीत आपत्कालीन लँडिंग

नवी दिल्ली- स्पाइसजेटच्या एसजी 121 (दिल्ली-लेह) विमानाच्या तांत्रिक बिघाडामुळे उड्डाणानंतर काही वेळातच विमानाचं दिल्ली विमानतळावर आपत्कालीन लँडिंग करण्यात आलंय. प्राथमिक माहितीनुसार, विमानात सुमारे 150 प्रवासी होते. इंजिन क्रमांक 2 मध्ये तांत्रिक बिघाड झाल्यामुळे आपत्कालीन लँडिंग करण्यात आल्याचे वृत्त आहे. विमानाच्या आपत्कालीन लँडिंगची तांत्रिक चौकशी डीजीसीए आणि संबंधित एजन्सी करीत आहेत. विशेष म्हणजे विमान दिल्ली विमानतळावर सुरक्षितपणे उतरले आणि सर्व प्रवासी आणि कर्मचारी सुरक्षित आहेत.

विमानतळावर तात्काळ अलर्ट जारी : मिळालेल्या वृत्तानुसार, स्पाइसजेटचे विमान दिल्ली विमानतळावरून लेहसाठी वेळापत्रकानुसार रवाना झाले. उड्डाणानंतर काही वेळातच वैमानिकाला विमानाच्या यंत्रणेत तांत्रिक बिघाड आढळला. सुरक्षेच्या खबरदारीचे पालन करून वैमानिकाने हवाई वाहतूक नियंत्रणाशी संपर्क साधला. खबरदारी म्हणून विमान दिल्लीला उतरवण्याचा निर्णय घेण्यात आला. विमानतळावर तात्काळ अलर्ट जारी करण्यात आला आणि आपत्कालीन सेवांना स्टँडबायवर ठेवण्यात आले. विमान दिल्ली विमानतळावर काळजीपूर्वक उतरवले. लँडिंग केल्यानंतर प्रवाशांना सुरक्षितपणे बाहेर काढण्यात आले. विमानतळ अधिकाऱ्यांच्या मते, संपूर्ण प्रक्रिया मानक सुरक्षा प्रोटोकॉलनुसार पार पडली आणि कोणतीही भीती नव्हती.

स्पाइसजेटच्या विमानात तांत्रिक बिघाड : स्पाइसजेटच्या प्रवक्त्याने सांगितले की, 24 फेब्रुवारी रोजी दिल्लीहून लेहला जाणाऱ्या स्पाइसजेटच्या विमानात तांत्रिक बिघाड झाला आणि त्यानंतर ते दिल्लीला परत वळवण्यात आले. विमान दिल्लीत सुरक्षितपणे उतरले आणि सर्व प्रवाशांना सामान्यपणे उतरवण्यात आले. कॉकपिटमध्ये आगीची कोणतीही सूचना देण्यात आली नव्हती.

विमानात 150 प्रवासी होते : विमानात अंदाजे 150 प्रवासी होते. या घटनेनंतर विमान कंपनीने प्रवाशांच्या पुढील प्रवासासाठी पर्यायी व्यवस्था सुरू केल्यात. काही प्रवाशांना इतर विमानांमध्ये बसवण्यात आले, तर काहींना आवश्यक ती मदत पुरवण्यात आली. उड्डाणादरम्यान तांत्रिक सूचना येणे असामान्य नाही. अशा परिस्थितीत खबरदारी म्हणून विमान मागे वळवणे ही प्रवाशांची सुरक्षितता सुनिश्चित करण्यासाठी एक मानक प्रक्रिया आहे. देशात विमान प्रवास करणाऱ्यांची संख्या वाढत असल्याने विमान कंपन्या सुरक्षेबाबत अतिरिक्त खबरदारी घेत आहेत. या घटनेच्या पार्श्वभूमीवर भविष्यात अशा घटना टाळण्यासाठी या तांत्रिक बिघाडाची सविस्तर चौकशी सुरू आहे.

हेही वाचाः

एअर अ‍ॅम्ब्युलन्स विमान कोसळलं, सात जणांचा मृत्यू; रुग्णाला घेऊन दिल्लीला निघालं होतं विमान

वॉशरुममध्ये शिवाजी महाराजांचे फोटो लावल्याचा आरोप; बँक्वेट हॉलचा मालक असलेल्या आमदाराच्या भावानं काय दिली प्रतिक्रिया?