पुण्यातील नामांकित हॉटेलला दहशतवाद्यांपासून धोका? स्वत: पोलीस आयुक्तांनी दिलं पत्र - Terrorist Attack Possibility Pune

पुणे Terrorist Attack Possibility Pune : देशभरात सुरक्षेच्या दृष्टीनं कारवाई केली जात असून विविध संघटनेत राहून दहशतवादी संघटनांसाठी काम करणाऱ्या लोकांना अटक देखील केली जात आहे. असं असताना पुण्यातील एका नामांकित हॉटेलला दहशतवाद्यांपासून धोका असल्याचं सांगत या हॉटेलला पुणे पोलीस आयुक्तांनी पत्र लिहून हा धोका कळवला आहे.

पोलिसांकडून सुरक्षेचा मुद्दा उपस्थित : पुणे पोलीस आयुक्त अमितेश कुमार यांनी पत्राद्वारे ही भीती व्यक्त केली आहे. सतत गर्दी होत असल्यामुळे "या" हॉटेलला पुणे पोलिसांनी अनेक नोटीस बजावल्या होत्या; पण हॉटेल व्यवस्थापन कोणत्याही नोटीसला उत्तर देत नव्हतं. परिणामी, हॉटेलमधील 'डिस्को थेक' बंद करण्याबाबत 'कारणे दाखवा' नोटीस देत सुरक्षेचा मुद्दा आता पोलिसांनी उपस्थित केला आहे.

गर्दीचं ठिकाण दहशतवाद्यांचं लक्ष्य : याबाबत मिळालेल्या माहितीनुसार, पुण्यातील कल्याणी नगर भागात असलेल्या एका नामांकित हॉटेलला पुणे पोलिसांनी त्या ठिकाणी असलेले 'डिस्को थेक' बंद करण्याबाबत कारणे दाखवा नोटीस बजावली आहे. दरम्यान, पुणे पोलिसांनी दिलेल्या या पत्रामध्ये सुरक्षेचा मुद्दा उपस्थित केला आहे. या हॉटेलमध्ये लोक दारू पिऊन धिंगाणा करीत असतात. सध्या दहशतवादी कारवायाबाबत अलर्ट जारी करण्यात आला आहे. एखादी दहशतवादी संघटना गर्दीचं ठिकाण लक्ष्य करून बॉम्बस्फोटासारखी दुर्घटना घडवून आणू शकतात. यातून मोठ्या प्रमाणात जीवितहानी होण्याची शक्यता नाकारता येत नाही, असा स्पष्ट इशारा पोलिसांनी यातून दिला आहे.

डिस्कोचा आजुबाजूच्या रहिवाश्यांना त्रास : संबंधित पत्र स्वतः पोलीस आयुक्त अमितेश कुमार यांच्या सहीनं संबंधित हॉटेलला पाठवण्यात आलं आहे. या हॉटेलनं आतापर्यंत अनेकवेळा नियमांचं उल्लंघन केलं असून त्या ठिकाणी असलेल्या 'डिस्को थेक'मुळे आजूबाजूला राहत असलेल्या रहिवाशांनाही त्रास सहन करावा लागला आहे, असं नमूद करण्यात आलं आहे. याशिवाय संबंधित हॉटेलवर याआधीसुद्धा अनेक गुन्हे दाखल करण्यात आले आहेत, याचा देखील उल्लेख पत्रात आहे.

सुरक्षेचा मुद्दा उपस्थित : "'त्या' हॉटेल आस्थापनेनं वेळोवेळी नियम तसंच कायदे, अटी व शर्तींचा भंग केला आहे, असं नमूद केलं आहे." पुढे याच पत्रात पोलिसांनी थेट सुरक्षेचा मुद्दा उपस्थित केला आहे. या ठिकाणी कोणतीही चोख सुरक्षा व्यवस्था नसून एखादी आपत्कालीन घटना झाल्यास कोणत्याही प्रकारची पर्यायी प्रभावी सुरक्षा यंत्रणा नाही, असं देखील म्हटलं आहे.

हेही वाचा:

1. कसाबला तुरुंगात खरंच बिर्याणी देण्यात आली होती का? अमित शाह यांच्या वक्तव्यानंतर पुन्हा मुंबईवरील दहशतवादी हल्ला चर्चेत! विरोधक म्हणाले.... - Ajamal Kasab Biryani Controversy
2. जम्मूच्या राजौरीमध्ये लष्कराच्या कॅम्पवर दहशतवादी हल्ला; एक जवान जखमी, सैन्यदलाकडून चोख प्रत्युत्तर - Terrorist Attack In Jammu Kashmir
3. जम्मू-काश्मीरमध्ये झालेल्या हल्ल्यातील दहशतवाद्यांचे स्केच जारी, माहिती दिल्यास मिळणार 20 लाखांचं बक्षीस - Terrorists sketch