गुन्हे शाखेचे अधिकारी असल्याचा बनाव; पैसे भरायला निघालेल्या वकिलाला भामट्यांनी घातला गंडा - Mumbai Crime

Mumbai Crime : एटीएममध्ये पैसे भरायला गेलेल्या वकिलाला भामट्यांनी 5 लाखाला चुना लावला. भामट्यांनी मुंबई गुन्हे शाखेचे अधिकारी असल्याची थाप मारुन या वकिलाला गंडवलं. या प्रकरणी खार पोलीस ठाण्यात गुन्हा दाखल करण्यात आला आहे.

मुंबई Mumbai Crime : पैसे भरायला एटीएमवर गेलेल्या वकिलाला भामट्यांनी लाखो रुपयाचा गंडा घातल्यानं मोठी खळबळ उडाली. ही घटना खार परिसरातील एका एटीएमसमोर घडली. तौसीफ शेख असं भामट्यांनी गंडा घातलेल्या वकिलाचं नाव आहे. या प्रकरणी खार पोलिसांनी दोन भामट्याविरोधात गुन्हा दाखल केला असून आरोपीला लवकरच बेड्या ठोकण्यात येतील, अशी माहिती सूत्रांनी दिली आहे.

पैसे भरायला एटीएमवर गेलेले वकिलाला घातला गंडा : वांद्रे इथले अ‍ॅड. तौसीफ शेख (वय 37) यांनी याबाबत तक्रार दिली आहे. वकील असलेले शेख यांनी तक्रारीत नमूद केलं आहे की, त्यांचे नातेवाईक पर्यटन, विमान तिकीट, रेल्वे तिकीट, पैशांची देवाणघेवाण या व्यवसायात गुंतलेले आहेत. हस्तांतरणासाठी गोळा केलेला निधी कंपनीच्या खात्यात जमा केला जातो. शनिवारी रात्री 8 वाजताच्या सुमारास, तक्रारदाराच्या भावानं त्यांना दोन ग्राहकांच्या खात्यात 5.70 लाख जमा करण्यासाठी सोपवले होते. शेख यांनी दुसऱ्या दिवशी सकाळी पैसे जमा करण्याचा निर्णय घेतला. रविवारी सकाळी एका राष्ट्रीयीकृत बँकेच्या एटीएम मशीनद्वारे ग्राहकाच्या खात्यात 70 हजार जमा करण्यात आले. मात्र, उर्वरित 5 लाख रुपये दुसऱ्या बँकेत जमा करण्यासाठी शेख बाहेर पडले तेव्हा, दोन अज्ञात व्यक्तींनी एटीएमच्या प्रवेशद्वाराजवळ त्यांच्याशी संपर्क साधला.

गुन्हे शाखेचे अधिकारी असल्याची मारली थाप : या दोन भामट्यांनी क्राइम ब्रँचचे अधिकारी असल्याचा दावा केला. त्यांनी शेखला चौकशीसाठी सोबत येण्यास सांगितलं. त्यानंतर दोघांनी शेख यांना कारमध्ये बसवून त्यांची बॅग तपासली. यावेळी बॅगेत आढळलेल्या रोख रकमेबाबत विचारपूस सुरू केली. त्यांनी शेखला त्याच्याविरुद्ध केस करण्याची धमकी देऊन घाबरवलं आणि सांताक्रूझ परिसरात नेऊन रोख रक्कम काढून घेतली. या घटनेनं घाबरलेल्या शेख यांनी घराचा रस्ता धरला. यावेळी त्यांनी दोन जणांनी आपल्याकडून पैसे काढून घेतल्याची माहिती आपल्या भावाला दिली. हे कळताच शेखच्या भावानं तत्काळ खार पोलीस ठाणे गाठून तक्रार दाखल केली. या प्रकरणी खार पोलिसांनी दोन अज्ञात भामट्यांविरुद्ध गुन्हा दाखल केला आहे. पोलीस सध्या सीसीटीव्ही फुटेजच्या मदतीनं या प्रकरणाचा तपास करत आहेत.

हेही वाचा :