मुंबई- न्यू इंडिया को ऑपरेटिव्ह बँकेतील घोटाळा प्रकरणी मोठी अपडेट समोर आली आहे. बँक घोटाळा प्रकरणातील ( new india cooperative bank scam) पाच आरोपींच्या मालमत्तेवर टाच आणण्यात आली आहे. तर २१ स्थावर मालमत्ता जप्त करण्यात आली आहे. देशात नवीन लागू झालेल्या बीएनएसएस कलम १०७ अंतर्गत मुंबईत ही पहिली कारवाईच आहे.
पाच आरोपींनी बँकेतील घोटाळ्यातून मिळवलेल्या पैशांचा वापर करून मालमत्तांमध्ये गुंतवणूक केल्याचा पोलिसांना संशय आहे. त्यामुळे या पाच आरोपींच्या १६८ कोटींच्या मालमत्तेवर जप्ती आणली आहे. भारतीय नागरीक सुरक्षा संहिता (बीएनएसएस) कलम १०७ अंतर्गत करण्यात आलेली मुंबईतील ही पहिलीच कारवाई आहे. या घोटाळा प्रकरणाचा तपास मुंबई पोलिसांच्या आर्थिक गुन्हे शाखेतर्फे करण्यात येत आहे.
- आरोपींची मालमत्ता जप्त करण्याची परवानगी अतिरिक्त मुख्य महानगर दंडाधिकारी न्यायालयानं दिल्यानंतर पोलिसांनी मालमत्ता जप्त करण्याची प्रक्रिया सुरू केली आहे. मुंबई पोलिसांच्या आर्थिक गुन्हे शाखेतर्फे ही माहिती देण्यात आली.
पोलिसांनी ही जप्त केली मालमत्ता- जप्त करण्यात येत असलेल्या मालमत्तांमध्ये बँकेचा माजी महाव्यवस्थापक हितेश मेहता याच्या सात सदनिका, दुकान आणि बंगल्याचादेखील समावेश आहे. त्याशिवाय कपिल देडियाची एक सदनिका, उन्नहलथन अरुणाचलमचे दुकान, जावेद आझमची बिहारमधील मधुबनी येथील दुकान, सदनिका तसेच पाटणा येथील सदनिका यांचा समावेश आहे. बॅंकेच्या १२२ कोटी रुपयांचा घोटाळा केल्याप्रकरणी या प्रकरणात आर्थिक गुन्हे शाखेने ८ आरोपींना अटक केली आहे.
कलम १०७ नुसार कशी होते कारवाई?- कलम १०७ अंतर्गत गुन्ह्यातून मिळवलेल्या उत्पन्नातून मिळवलेली संपत्ती, मालमत्ता जप्त करण्याचे अधिकार देण्यात आले आहेत. आरोपींनी गुन्ह्यातून मिळवलेली मालमत्ता आहे, असा संशय तपास अधिकाऱ्यांना असल्यास पोलीस आयुक्तांच्या परवानगीनं त्याबाबत संबंधित न्यायालयाकडे आरोपींच्या मालमत्तेच्या जप्तीची मागणी केली जाते. न्यायालयानं परवानगी दिल्यानंतर आरोपीची मालमत्ता जप्त केली जाते.
काय आहे बँकेतील घोटाळा?- भारतीय रिझर्व्ह बँकेनं न्यू इंडिया को-ऑपरेटिव्ह बँकेच्या व्यवहारात अनियमितता आढळून आल्यानं व्यवहारावर निर्बंध लाधले आहेत. त्यामुळे बँकेतील खातेदारांसह ठेवीदारांच्या आर्थिक व्यवहारांवर निर्बंध लागू झाले आहेत. १२२ कोटींच्या घोटाळा प्रकरणी पोलिसांनी बँकेचा जनरल मॅनेजर आणि अकाउंट विभागाचा प्रमुख हितेश मेहता आणि धर्मेश पौन या बांधकाम व्यवसाय‍िकाला अटक केली. बँकेचा माजी अध्यक्ष हिरेन भानू, त्याची पत्नी आणि माजी उपाध्यक्ष गौरी भानू हे दोन आरोपी घोटाळा उघडकीस येण्यापूर्वीच विदेशात फरार झाले आहेत.
हेही वाचा-
