नवी मुंबई : नवी मुंबई महानगरपालिकेकडे मालमत्ताकर, पाणीपट्टी, बांधकाम परवानगी प्रस्ताव, परवाना शुल्क अशा विविध गोष्टींमधून जमा होणाऱ्या महसूलातूनच नागरी सेवासुविधांची परिपूर्ती केली जात असते. याकरता नवी मुंबईकर नागरिकांनी सहकार्य केल्यामुळे करवसूलीची उद्दीष्टपूर्ती झाली आहे. त्याबद्दल महापालिका आयुक्त डॉ. कैलास शिंदे यांनी नवी मुंबईकर नागरिकांचे आभार व्यक्त केले आहेत.
मालमत्ता कर विभागाकडे 826.12 कोटी कर जमा : यामध्ये मालमत्ता कर विभागाने 826.12 कोटी इतका मालमत्ता कर जमा केला असून त्यामध्ये अभय योजनेव्दारे थकीत मालमत्ताकरावरील शास्ती रकमेवर 50 टक्क्यांच्या सूटीचा लाभ घेत 20.97 कोटी इतकी रक्कम जमा झालेली आहे. तितक्याच रकमेची सवलत थकबाकीदारांना दिली आहे. त्याचप्रमाणे पाणीपुरवठा विभागामार्फत 105.93 कोटी इतकी रक्कम जल देयकांमार्फत जमा झालेली आहे. पाणी पुरवठा विभागामार्फत देण्यात आलेल्या अभय योजनेचा लाभही नागरिकांनी मोठ्या प्रमाणावर घेतला.
नगररचना विभागामार्फत बांधकाम परवानगीचे 381.90 कोटी इतके शुल्क जमा झाले असून यामध्ये पुनर्विकास प्रकल्प प्रस्तावांच्या मंजूरीचा मोठा भाग आहे. परवाना विभागानेही विविध परवानग्या विहित वेळेत दिल्याने 14.60 कोटी इतकं प्रत्यक्ष शुल्क जमा झालं आहे. स्थानिक संस्था करापोटीही 28.04 कोटी रक्कम जमा झालेली आहे. तसंच इतरही विभागांमध्ये महसूल जमा होण्याचं प्रमाण लक्षणीय आहे.
सर्व विभागांची 100 टक्के उद्दिष्टपूर्ती : सर्व विभागांनी 100 टक्के उद्दिष्टपूर्ती साध्य केली असून हे उद्दीष्ट पूर्ण करण्यासाठी संबंधित विभागप्रमुख व त्या त्या विभागांचे अधिकारी कर्मचारी यांचे सातत्यपूर्ण प्रयत्न महत्वाचे आहेत. या सर्वच अधिकारी कर्मचारी यांच्या उल्लेखनीय कामाची आयुक्तांनी प्रशंसा केली आहे. ही उद्दीष्टपूर्ती होण्यामागे महापालिका आयुक्त तथा प्रशासक डॉ. कैलास शिंदे यांच्यामार्फत घेण्यात येणाऱ्या प्रत्येक विभागाच्या पाठपुराव्याची मेहनत आहे. नागरिकांना सहजपणे आपली देयके भरता यावीत याकरता आयुक्तांच्या संकल्पनेतून ऑनलाईन प्रणालीवर विशेष भर देण्यात आला. ऑनलाईन देयके भरताना येणाऱ्या अडचणी दूर करण्यासाठी नविन ऑनलाईन मालमत्ता संकलन प्रणाली सुरू करण्यात आली. येणारा महसूल अत्यंत महत्वाचा असून सामाजिक जबाबदारीच्या भावनेने विहित वेळेत करभरणा करणाऱ्या व इतरही बाबींमध्ये महानगरपालिकेच्या महसूल वाढीला सहकार्य करणाऱ्या जागरुक नवी मुंबईकर नागरिकांचे आयुक्त डॉ. कैलास शिंदे यांनी आभार व्यक्त केले आहेत. 2024-25 या वर्षात सुरू असलेल्या ऑनलाईन पेमेंट सुविधांमध्ये लवकरच भारत बिल पेमंट सिस्टीमची भर घालण्यात येत असून नागरिकांना अत्यंत सुलभ सुविधा उपलब्ध करून देण्यात येत आहेत.
