अंधश्रद्धेचा कळस! 22 दिवसांच्या चिमुकलीच्या पोटावर दिले गरम विळ्याचे चटके, उपचाराच्या नावाखाली केलं संतापजनक कृत्य

अमरावती : मेळघाटातून एक अतिशय संतापजनक बातमी समोर आली आहे. चिखलदरा तालुक्यातील दहेंद्री गावात 22 दिवसांच्या चिमुकलीला उपचाराच्या नावाखाली विळा गरम करून चटके देण्यात आल्याचा प्रकार घडला आहे. अंधश्रद्धेच्या आहारी जाऊन घरातील सदस्यांनीच हे कृत्य केल्याचं समोर आलं आहे. या प्रकरणी नात्यातीलच एका महिलेवर गुन्हा दाखल करण्यात आला आहे.

उपचाराच्या नावाखाली चिमुकलीला दिले चटके : वास्तविक दहेंद्री गावातील धोंडू शेलुकर यांच्या 22 दिवसांच्या चिमुकलीच्या पोटाला सूज आली होती. यामुळे चिमुकली सतत रडत होती. यावर उपचार म्हणून चिमुकलीच्या काकूनं चिमुकलीच्या पोटावर गरम विळ्यांनं चटके दिले. या क्रूर आणि संताप आणणाऱ्या घटनेची माहिती मिळताच आरोग्य सेविकेनं शेलूकर यांच्या घरी धाव घेतली आणि बाळाला काटकुंभ येथील प्रथमिक आरोग्य केंद्रात उपचारासाठी दाखल केलं. या ठिकाणी प्राथमिक उपचार केल्यावर बाळाला अचलूर येथील महिला आणि बाल रुग्णालयात दाखल करण्यात आलं.

उपचारामुळं बचावलं बाळ : दरम्यान, या 22 दिवसांच्या चिमुकलीला वेळेवर आणि योग्य उपचार मिळाल्यानं ती बचावली आहे. आता चिमुकलीची प्रकृती धोक्याबाहेर असून, आई आणि चिमुकली दोघींना सुट्टी देण्यात आल्याची माहिती अचलपूर येथील महिला आणि बाल रुग्णालयाचे वैद्यकीय अधिकारी डॉ. दीपक अग्रवाल यांनी दिली. विशेष म्हणजे या चिमुकलीच्या आईला आणखी एक दीड वर्षाचं बाळ आहे.

60 वर्षीय महिलेविरुद्ध गुन्हा दाखल : अंधश्रद्धेच्या या गंभीर प्रकरणात चिखलदरा पोलिसांनी भारतीय दंड संहिता आणि महाराष्ट्र जादूटोणा कायद्याच्या विविध कलमांतर्गत मेजो कसदेकर या 60 वर्षीय महिलेवरोधात गुन्हा दाखल केलाय. तसेच पुढील तपास सुरू असल्याची माहिती स्थानिक गुन्हे शाखेचे पोलीस निरीक्षक किरण वानखडे यांनी दिली.

हेही वाचा

• अंधश्रद्धेचा कळस! करणी-भानामतीचा अघोरी प्रकार; दारात लटकवले बोकडाचे मुंडके, पाय आणि टोचलेले लिंबू
• गुजरातने जादूटोणा विरोधी कायदा पास करणे स्वागतार्ह, राष्ट्रीय पातळीवरही कायदा करा - महाराष्ट्र अंधश्रद्धा निर्मूलन समितीची मागणी - Anti Witchcraft Act
• पोलीसच अंधश्रद्धेच्या आहारी; पोलीस ठाण्याच्या गेटवरच बोकडाचा बळी देऊन बनवली बिर्याणी, घटनेवर काय म्हणाले गृहमंत्री?