സഞ്ജുവും ബുംറയും തിരിച്ചെത്തുന്നു; അഫ്‌ഗാനെ നേരിടാൻ കരുത്തുറ്റ യുവനിരയുമായി ടീം ഇന്ത്യ!

ഹെെദരാബാദ്: അഫ്‌ഗാനിസ്ഥാനെതിരായ മൂന്ന് മത്സരങ്ങളുടെ ടി20 പരമ്പരയ്ക്കുള്ള ഇന്ത്യൻ ടീമിനെ ബിസിസിഐ പ്രഖ്യാപിച്ചു. ഏഷ്യൻ ഗെയിംസിന് മുന്നോടിയായി സെപ്റ്റംബർ 13-ന് ന്യൂഡൽഹിയിലാണ് ഈ പരമ്പര ആരംഭിക്കുന്നത്. പരിക്കിനെത്തുടർന്ന് വിശ്രമത്തിലായിരുന്ന പ്രമുഖ താരങ്ങൾ ടീമിലേക്ക് തിരിച്ചെത്തിയപ്പോള്‍ സൂപ്പർ ഓൾറൗണ്ടർ ഹാർദിക് പാണ്ഡ്യയെ ടീമിൽ ഉൾപ്പെടുത്തിയിട്ടില്ല.

കഴിഞ്ഞ ജൂലൈ 16-ന് ഇംഗ്ലണ്ടിനെതിരായ ഏകദിന മത്സരത്തിനിടെ ഇടത് കാൽമുട്ടിന് പരിക്കേറ്റ ജസ്പ്രീത് ബുംറ നീണ്ട ഇടവേളയ്ക്ക് ശേഷം ടീമിലേക്ക് തിരിച്ചെത്തുന്നു. പരിക്കുമൂലം ശ്രീലങ്കയ്‌ക്കെതിരായ ടെസ്റ്റ് പരമ്പര അദ്ദേഹത്തിന് നഷ്‌ടമായിരുന്നു. സഞ്ജു സാംസൺ പ്രധാന വിക്കറ്റ് കീപ്പറായി മടങ്ങിയെത്തി. സിംബാബ്‌വെയ്‌ക്കെതിരായ പരമ്പരയിൽനിന്ന് സഞ്ജുവിനെ ഒഴിവാക്കിയിരുന്നു. ബുംറയ്‌ക്കൊപ്പം പരിക്കിന്‍റെ പിടിയിലായിരുന്ന നിതീഷ് കുമാർ റെഡ്ഡി, വാഷിംഗ്ടൺ സുന്ദർ, ഹർഷിത് റാണ എന്നിവരും ടീമിലിടം നേടിയിട്ടുണ്ട്. എന്നാൽ ഇവരുടെ പങ്കാളിത്തം കായികക്ഷമത തെളിയിക്കുന്നതിന് വിധേയമായിരിക്കുമെന്ന് ബിസിസിഐ അറിയിച്ചു.

ഹാംസ്ട്രിങ് ഇഞ്ചുറി കാരണം ശ്രീലങ്കൻ പരമ്പര നഷ്‌ടമായ വാഷിംഗ്ടൺ സുന്ദറും, കാൽമുട്ടിനേറ്റ പരിക്ക് മാറി ടി20 ലോകകപ്പിന് ശേഷം ടീമിലേക്ക് തിരിച്ചെത്തുന്ന ഹർഷിത് റാണയും ഇന്ത്യൻ നിരയ്ക്ക് കരുത്താകും. ജപ്പാനിലെ ഐച്ചി-നാഗോയയിൽ നടക്കാനിരിക്കുന്ന ഏഷ്യൻ ഗെയിംസിനുള്ള ഇന്ത്യൻ ടീമിന് സമാനമായ ടീമിനെയാണ് അഫ്‌ഗാന്‍ പരമ്പരയ്ക്കായും തെരഞ്ഞെടുത്തിരിക്കുന്നത്.

യുവനിരയും വിക്കറ്റ് കീപ്പർമാരും

സിംബാബ്‌വെക്കെതിരെ മികച്ച പ്രകടനം പുറത്തെടുത്ത കൗമാര താരം വൈഭവ് സൂര്യവംശി ടീമിൽ ഇടംപിടിച്ചു. അഭിഷേക് ശർമ്മ, സഞ്ജു സാംസൺ, ഇഷാൻ കിഷൻ എന്നിവർക്കൊപ്പം ടോപ്പ് ഓർഡറിൽ സ്ഫോടനാത്മക ബാറ്റിങ് പുറത്തെടുക്കാൻ വൈഭവിന് സാധിക്കും. ശ്രേയസ് അയ്യർ നയിക്കുന്ന ടീമിന്‍റെ വൈസ് ക്യാപ്റ്റൻ തിലക് വർമ്മയാണ്. ശിവം ദുബെയും മധ്യനിരയിലുണ്ട്.

നിതീഷ് കുമാർ റെഡ്ഡി, അക്‌സര്‍ പട്ടേൽ, വാഷിംഗ്ടൺ സുന്ദർ എന്നിവരാണ് ടീമിലെ ഓൾറൗണ്ടർമാർ. രവി ബിഷ്‌ണോയ്‌ക്കൊപ്പം വരുൺ ചക്രവർത്തി സ്പിൻ ആക്രമണം നയിക്കും. പേസ് ബൗളിങ്ങിൽ ജസ്പ്രീത് ബുംറ, അർഷ്ദീപ് സിങ് എന്നിവർക്കൊപ്പം ഹർഷിത് റാണയും ചേരുന്നതോടെ ഇന്ത്യൻ ബൗളിങ് നിര ശക്തമാകും.

ഇന്ത്യൻ ടീം:

ശ്രേയസ് അയ്യർ (ക്യാപ്റ്റൻ), അഭിഷേക് ശർമ്മ, വൈഭവ് സൂര്യവംശി, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), തിലക് വർമ്മ (വൈസ് ക്യാപ്റ്റൻ), ശിവം ദുബെ, നിതീഷ് കുമാർ റെഡ്ഡി*, അക്സർ പട്ടേൽ, വാഷിംഗ്ടൺ സുന്ദർ*, വരുൺ ചക്രവർത്തി, രവി ബിഷ്ണോയ്, ജസ്പ്രീത് ബുംറ*, അർഷ്ദീപ് സിങ്, ഹർഷിത് റാണ*.

Also Read: മെസ്സിയുടെ റെക്കോർഡും വഴിമാറി; 50 ഗോളുകൾ തികയ്ക്കുന്ന പ്രായം കുറഞ്ഞ താരമായി യമാൽ