ലണ്ടന്‍: യുവേഫ ചാമ്പ്യൻസ് ലീഗ് സെമിഫൈനലിന്‍റെ ആദ്യപാദത്തിൽ ആഴ്‌സനലിനെ ഞെട്ടിച്ച് പാരീസ് സെന്‍റ് ജെർമെയ്ൻ. എമിറേറ്റ്സ് സ്റ്റേഡിയത്തിൽ നടന്ന പോരാട്ടത്തിൽ സ്ട്രൈക്കർ ഒസ്‌മാനെ ഡെംബലെയുടെ ഗോളിലാണ് പിഎസ്ജിയുടെ ജയം. കളിയുടെ തുടക്കത്തിൽ നാലാം മിനിറ്റിൽ തന്നെയായിരുന്നു ഗോൾ പിറന്നത്. ആഴ്‌സനൽ തിരിച്ചുവരവ് നടത്താൻ ശ്രമിച്ചെങ്കിലും ഒന്നും ഗോളാക്കി മാറ്റാന്‍ അവര്‍ക്ക് കഴിഞ്ഞില്ല. ഇനി ഫ്രാൻസിൽ നടക്കുന്ന രണ്ടാം പാദത്തിൽ ഈ കുറവ് നികത്തുക എന്ന വെല്ലുവിളിയാണ് ഗണ്ണേഴ്‌സ് നേരിടുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ആദ്യ പകുതിയുടെ അവസാനത്തിൽ ആഴ്‌സനൽ ക്രമേണ ഗോള്‍ കണ്ടെത്താന്‍ ശ്രമിച്ചിരുന്നു. ഗബ്രിയേൽ മാർട്ടിനെല്ലിക്ക് സ്കോർ സമനിലയിലാക്കാനുള്ള അവസരം ലഭിച്ചെങ്കിലും പിഎസ്ജിയുടെ പ്രതിരോധം തകർത്ത് ഡൊണാറുമ്മയെ തോൽപ്പിക്കാൻ ഗണ്ണേഴ്‌സിന് കഴിഞ്ഞില്ല. രണ്ടാം പകുതിയുടെ തുടക്കത്തിൽ മൈക്കൽ മെറിനോ ഡെക്ലാൻ റൈസിന്റെ ഫ്രീ-കിക്ക് ഹെഡ് ചെയ്ത് വലയിലേക്ക് കൊണ്ടുപോയപ്പോൾ ഗണ്ണേഴ്‌സ് സമനില ഗോൾ നേടിയെന്ന് കരുതി.
എന്നിരുന്നാലും, ഒരു നീണ്ട അവലോകനത്തിന് ശേഷം അദ്ദേഹത്തെ ഓഫ്സൈഡ് ആയി വിധിക്കുകയായിരുന്നു. പകുതി സമയത്തിനുശേഷം ആഴ്‌സനൽ മെച്ചപ്പെട്ട പ്രകടനം കാഴ്ചവച്ചെങ്കിലും, പിഎസ്ജിയുടെ ലീഡ് നിലനിർത്താൻ ഡൊണാറുമ്മ അഞ്ച് നിർണായക സേവുകൾ നടത്തി.
മറ്റൊരു സെമി ഫൈനലിന്‍റെ ആദ്യ പാദത്തിൽ ബാഴ്‌സലോണ വ്യാഴാഴ്ച്ച പുലർച്ചെ 12.30 ന് ഇറ്റാലിയൻ ക്ലബ് ഇന്‍റര്‍ മിലാനെ നേരിടും. ഇന്‍റര്‍ മിലാന്‍റെ ഹോം മൈതാനത്താണ് മത്സരം. ക്വാർട്ടറിൽ ഡോർട്മുണ്ടിനെതോൽപ്പിച്ചാണ് ബാഴ്‌സ എത്തുന്നത്.
Also Read: വൈഭവ താണ്ഡവം; ഗുജറാത്തിനെ വീഴ്‌ത്തി, പ്ലേഓഫ് പ്രതീക്ഷകൾ സജീവമാക്കി രാജസ്ഥാൻ റോയല്‍സ് - IPL 2025
ബയേൺ മ്യൂണിക്കിനെ കീഴടക്കിയാണ് ഇന്‍റര്‍ മിലാൻ സെമിയില്‍ കടന്നത്. മത്സരം സോണി എൽഐവി ആപ്പിലും വെബ്‌സൈറ്റിലും ലൈവ് സ്ട്രീമിംഗ് ലഭ്യമാകും. സോണി സ്‌പോർട്‌സ് നെറ്റ്‌വർക്ക് - സോണി സ്‌പോർട്‌സ് ടെൻ 2, സോണി സ്‌പോർട്‌സ് ടെൻ 3 (ഹിന്ദി), സോണി സ്‌പോർട്‌സ് ടെൻ 4 (തമിഴ്/തെലുങ്ക്) ചാനലുകളിലും സംപ്രേഷണം ചെയ്യും.
