ഈ രണ്ട് ബൈക്കുകൾ ഇനിയുണ്ടാവില്ല; ബിഎംഡബ്ല്യു വിപണിയിൽ നിന്നും പിൻവലിച്ച മോഡലുകൾ ഇവ

ബിഎംഡബ്ല്യു 310 സീരീസിലെ രണ്ട് മോഡലുകൾ നിർത്തലാക്കി. ബിഎംഡബ്ല്യു ജി 310 ജിഎസ്, ബിഎംഡബ്ല്യു ജി 310 ആർ എന്നിവയാണ് വിപണിയിൽ നിന്നും പിൻവലിച്ചത്.

ഹൈദരാബാദ്: പ്രീമിയം മോട്ടോർസൈക്കിൾ നിർമാതാക്കളായ ബിഎംഡബ്ല്യു മോട്ടോറാഡ് ഇന്ത്യ തങ്ങളുടെ രണ്ട് ബൈക്കുകൾ വിപണിയിൽ നിന്നും പിൻവലിച്ചു. കമ്പനിയുടെ ഏറ്റവും താങ്ങാനാവുന്ന വിലയിലുണ്ടായിരുന്ന ബിഎംഡബ്ല്യു 310 സീരീസിലെ രണ്ട് മോഡലുകളായ ബിഎംഡബ്ല്യു ജി 310 ജിഎസ്, ബിഎംഡബ്ല്യു ജി 310 ആർ എന്നിവയാണ് നിർത്തലാക്കിയത്. ഏഴ് വർഷത്തെ വിൽപ്പനയ്ക്ക് ശേഷമാണ് നിർത്താൻ കമ്പനി തീരുമാനിക്കുന്നത്. എന്നാൽ കമ്പനി ഇതുവരെ ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.

പുറത്തുവന്ന വിവരങ്ങൾ ശരിയാണെങ്കിൽ, രണ്ട് മോട്ടോർസൈക്കിളുകളുടെയും ജനപ്രീതി കുറയുന്നത് ഉൾപ്പെടെയുള്ള കാരണങ്ങളാകാം വിൽപ്പന നിർത്തലാക്കുന്നതിലേക്ക് നയിച്ചത്. ബിഎംഡബ്ല്യു 310 മോഡൽ നിർത്തലാക്കിയത് ഒരുപക്ഷേ പുതിയ പ്ലാറ്റ്‌ഫോമിന് വഴിയൊരുക്കാനാകുമെന്നും പ്രതീക്ഷിക്കാം. ബിഎംഡബ്ല്യുവിന്‍റെ താങ്ങാവുന്ന വിലയിലുള്ള രണ്ട് മോട്ടോർസൈക്കിളുകളാണ് നിർത്തലാക്കുന്നത്. 2018ലായിരുന്നു രണ്ട് മോട്ടോർസൈക്കിളുകളും പുറത്തിറക്കിയത്.

BMW G 310 GS (Photo - BMW Motorrad)

വലിപ്പത്തിന്‍റെ കാര്യത്തിൽ ബിഎംഡബ്ല്യു വാഗ്‌ദാനം ചെയ്യുന്ന ഏറ്റവും ചെറിയ മോട്ടോർസൈക്കിളുകളാണ് ഇവ രണ്ടും. പിന്നീട് ടിവിഎസ് മോട്ടോർസും ബിഎംഡബ്ല്യു മോട്ടോറാഡും ചേർന്ന് ടിവിഎസ് അപ്പാച്ചെ ആർആർ 310ഉം പുറത്തിറക്കിയിരുന്നു. ബിഎംഡബ്ല്യു ജി 310 ജിഎസ്, ബിഎംഡബ്ല്യു ജി 310 ആർ മോട്ടോർസൈക്കിളുകൾ ഇന്ത്യയിൽ തന്നെ നിർമ്മിച്ചതാണ്. ബെംഗളൂരുവിനടുത്തുള്ള ടിവിഎസ് മോട്ടോർ കമ്പനിയുടെ ഹൊസൂർ പ്ലാൻ്റിലാണ് ഇവ നിർമിച്ചത്. മാത്രമല്ല, ഈ ബൈക്കുകൾ വിദേശ വിപണികളിലേക്ക് കയറ്റുമതി ചെയ്‌തിട്ടുമുണ്ട്. 2018ൽ ബിഎംഡബ്ല്യു ഈ ബൈക്കുകളുടെ 1,640 യൂണിറ്റുകളാണ് രാജ്യത്ത് വിറ്റഴിച്ചത്.

BMW G 310 R (Photo - BMW Motorrad)

ബിഎംഡബ്ല്യു ജി 310 ജിഎസ്, ബിഎംഡബ്ല്യു ജി 310 ആർ: പവർട്രെയിൻ

9,500 ആർപിഎമ്മിൽ 34 ബിഎച്ച്പി പവറും 7,500 ആർപിഎമ്മിൽ 28 എൻഎം പരമാവധി ടോർക്കും നൽകുന്ന 313സിസി, സിംഗിൾ സിലിണ്ടർ, ലിക്വിഡ് കൂൾഡ് എഞ്ചിനാണ് രണ്ട് മോഡലുകളിലും നൽകിയിരിക്കുന്നത്. 6-സ്‌പീഡ് ഗിയർബോക്‌സുമായാണ് ഈ എഞ്ചിൻ ജോഡിയാക്കിയിരിക്കുന്നത്. ബിഎംഡബ്ല്യു ജി 310 ആറിൻ്റെ പരമാവധി വേഗത മണിക്കൂറിൽ 145 കിലോമീറ്ററാണ്. അതേസമയം ജിഎസ് പതിപ്പിൻ്റെ പരമാവധി വേഗത മണിക്കൂറിൽ 143 കിലോമീറ്ററാണ്.

BMW G 310 GS (Photo - BMW Motorrad)