सोलापूर - जिल्ह्यातील जिल्हा दूध संघ वाचवण्यासाठी शेतकऱ्यांची एकच धडपड सुरू आहे. सोलापूर जिल्हा दूध संघामध्ये संचालक मंडळाच्या काळात कामकाजामध्ये अनियमितता व अपहार झाल्यामुळे शासनाने दूध संघाचे संचालक मंडळ बरखास्त करून 8 मार्च 2021 पासून प्रशासकीय मंडळाची नियुक्ती केली. प्रशासकीय मंडळाच्या कामकाजामुळे जिल्हा दूध संघात व व्यवस्थापनात सुधारणा होत आहे. शेतकऱ्यांच्या दुधाला प्रति लिटर 25 रुपये प्रमाणे भाव मिळत आहे. त्यामुळे जिल्ह्यातील दूध संघात काही उपद्रवी राजकीय लोक अडथळे निर्माण करत आहेत. त्यामुळे दूध संघातील प्रशासकीय अधिकारी ठेवूनच कामकाज करावा अन्यथा दूध संघ डबघाईला येऊन बंद पडेल, असे सांगत सोलापूर जिल्ह्यातील शेतकऱ्यांनी पत्रकार परिषद घेत दुध संघ वाचवण्याची जिल्हा प्रशासनाकडे विनंती केली आहे.
सोलापूर जिल्हा दूध संघाच्या टेम्भुर्णी येथील प्रकल्प एका खासगी दूध डेअरी कंपनीने भाडेतत्त्वावर मागितला आहे. प्रशासकीय अधिकाऱ्याने तो दिला नाही. तालुका स्तरावर तालुका संघ निर्मिती करून जिल्हा दूध संघ फोडण्याचा प्रयत्न केला जात असल्याचा आरोप शेतकऱ्यांनी केला आहे. जिल्ह्यातील प्रत्येक तालुक्यात जिल्हा दूध संघ स्थापनकरून तालुका पातळीवर जागा हडप करण्याचा प्रयत्न केला जात असल्याचा आरोप यावेळी शेतकऱ्यांनी केला आहे.
कोरोना काळात दूध संघाचा शेतकऱ्यांना आधार
जिल्हा दूध संघ बंद पडल्यावर खासगी दूध कंपन्या मनमानी दर देतील. कोरोना काळात शेतकऱ्यांचे कंबरडे मोडले असताना सोलापूर जिल्हा दूध संघाने शेतकऱ्यांच्या दुधाला प्रति लिटर 23 ते 25 रुपये भाव देत आधार दिला होता आणि खासगी कंपन्या मात्र प्रति लिटर 17 ते 18 रुपयांपर्यंतच भाव देत आहेत.
प्रशासकीय अधिकारी बदलण्याचा डाव
दूध संघावर डोळा ठेवून बसलेले डोम कावळे हे प्रशासकीय अधिकारी बदलण्याचा डाव आखत असल्याचा आरोप शेतकऱ्यांनी केला आहे. सद्यस्थितीत कामकाज पाहणारे प्रशासकीय अधिकारी पांढरे यांना बदलून डोके या अधिकाऱ्याची नियुक्ती करण्याचा प्रयत्न 31 मे 2021 रोजी करण्यात आला. त्यानंतर जुलै महिन्यात प्रत्येक तालुक्यात एक अशासकीय व्यक्तीचे मंडळ स्थापन करण्याचा प्रयत्न करण्यात आला होता, असा आरोप शेतकऱ्यांनी केला आहे.