नाशिक Nashik Crime : आक्षेपार्ह व्हिडिओ व्हायरल करण्याची धमकी देऊन दिंडोरी इथल्या श्री स्वामी समर्थ अध्यात्मिक पिठाच्या विश्वस्ताकडून एक कोटी उकळणाऱ्या कृषी सहाय्यक महिलेसह तिच्या मुलाला अटक करण्यात आली होती. या दोघांना न्यायालयात हजर केलं असता त्यांना बुधवारपर्यंत पोलीस कोठडी ठोठावण्यात आली आहे. सारिका सोनवणे असं त्या खंडणीखोर कृषी सहाय्यक महिलेचं नाव आहे. तर मोहित सोनवणे असं तिच्या मुलाचं नाव आहे. या दोघांनी दिंडोरी इथल्या श्री स्वामी समर्थ अध्यात्मिक पिठाचे विश्वस्त निंबा शिरसाट यांच्याकडून वेगवेगळे कारण देत आतापर्यंत एक कोटी पाच लाख रुपये लुटले आहेत. सारिका सोनवणेनं बलात्काराचा गुन्हा दाखल करुन व्हिडिओ व्हायरल करण्याची धमकी देत 20 कोटी रुपयांची खंडणी मागितली. त्यानंतर याप्रकरणी शिरसाट यांनी गंगापूर पोलीस ठाण्यात तक्रार दाखल केली.

काय काय आहे प्रकरण : सारिका आणि शिरसाट यांची 2014 मध्ये ओळख झाली, दोघंही देवळा तालुक्यातीलच रहिवासी आहेत. संबंधित महिलेनं आजारपण, शेती, मुलाचं शिक्षण अशी कारणं सांगून 2019 मध्ये प्रथम शिरसाट यांच्याकडून 25 लाख रुपये घेतले. जानेवारी 2023 मध्ये महिलेनं शिरसाट यांना भेटून मोबाईलमधील काही व्हिडिओ दाखवले अन् पुन्हा 20 कोटी रुपयांची मागणी करत व्हिडिओ व्हायरल करण्याची धमकी दिली. बदनामीला घाबरुन शिरसाट यांनी 50 लाख रुपये दिले, मात्र त्यानंतरही तिनं 10 कोटींची मागणी केली असता निंबा शिरसाठ यांनी पोलिसांकडे धाव घेतली.

घराच्या झडतीत आढळले लाखो रुपये : दरम्यान, आरोपी महिलेच्या घराची झडती घेतली असता, यात दहा लाख रुपये रोख, एक लॅपटॉप, तीन ॲपल मोबाईल, बँक पासबुक आणि काही कागदपत्रं जप्त करण्यात आल्याचं पोलिसांनी सांगितलं. तसंच खंडणी प्रकरणातील महिला सारिका सोनवणेचं बँकेचं विवरण तपासलं जाणार असून तिनं एक कोटी रुपयांचं काय केलं, याचीही चौकशी होणार आहे. शेतीतील उत्पनातून तसंच उसनवारीतून महिलेस पैसे दिल्याची माहिती तक्रारदार निंबा शिरसाट यांनी दिलीय. त्याचीही आम्ही खात्री करू, अशी माहिती पोलीस उपायुक्त किरण कुमार चव्हाण यांनी दिलीय. तसंच या प्रकरणी गंगापूर पोलीस ठाण्यात खंडणीचा गुन्हा दाखल करण्यात आला असून सारिका आणि मोहित सोनवणे या दाेघांनाही न्यायालयानं तीन दिवसांची पोलीस कोठडी सुनावली आहे.

हेही वाचा -

1. Nashik Crime : ड्रग्ज प्रकरणातील मुंबई पोलिसांच्या कारवाईनंतर पोलिसांना जाग, १३ कॉफी शॉपला ठोकलं टाळं
2. Nashik Crime : कांद्याच्या गोणीत आढळला महिलेचा कुजलेला मृतदेह; खून करुन मृतदेह फेकल्याचा पोलिसांना संशय
3. Nashik Crime News : दारुच्या पार्टीत जिगरी मित्रांनीच केला मित्राचा खून; शहरात एका महिन्यात पाच खून