नागपूर : नागपूर : मला नागपूरला येण्याची संधी मिळते, त्या प्रत्येक वेळी मी दीक्षाभूमी इथं जाऊन नतमस्तक होतो. त्यातून मला भाजपासारख्या बलाढ्य शक्तींविरोधात काम करण्याची प्रेरणा मिळते, असं उद्गार आमदार रोहित पवार यांनी काढलं आहे. राज्यात तीन इंजिनचं सरकार आहे. मात्र, या तीन इंजिन सरकारचं केंद्रातील मोठ्या इंजिनच्या सरकारपुढं काही चालते का? असा सवालही रोहित पवार यांनी यावेळी केला. बुधवारी राष्ट्रवादी काँग्रेसच्या शरद पवार गटानं विदर्भातील पदाधिकाऱ्यांची बैठक आयोजित केली होती. या बैठकीत सहभागी होण्यासाठी नागपूरला आले असता, रोहित पवार बोलत होते.

मराठा समाजाला आरक्षण मिळू नये म्हणून भाजपा न्यायालयात : ओबीसी राजकीय आरक्षणाचा प्रश्न उपस्थित झाला होता, तेंव्हा भाजपाचेचं लोकं कोर्टात गेले होते. आता मराठा समाजाला आरक्षण मिळू नये, म्हणून भाजपाचे लोकं कोर्टात गेल्याची टीका आमदार रोहित पवार यांनी केली. मराठा आरक्षणात भाजपा दुटप्पी भूमिका घेत असल्याचा आरोप रोहित पवार यांनी केला आहे.

व्हायरल व्हिडिओचा निषेध : बोलायचं आणि मोकळं व्हायचं, असा मुख्यमंत्री एकनाथ शिंदे यांचा पत्रकार परिषेदपूर्वीचा व्हिडिओ समोर आला आहे. त्यावर बोलताना आमदार रोहित पवार म्हणाले की, त्या व्हिडिओचा मी निषेध करतो. बोलायचं आणि मोकळं व्हायचं, म्हणजे त्यात राजकारण केलं जात आहे, असा आरोप रोहित पवार यांनी केला. जनतेच्या प्रश्नांवर सिरियस नसणारे नेते, हे फक्त पद मिळवण्यासाठी सिरियस असतात, असंही रोहित पवार यावेळी म्हणाले.

वारेमाप खर्चावर लगाम लावा : चाळीस आमदार शिंदे गटासोबत गेले. त्यांच्या सुरक्षेवर वर्षात दीडशे कोटी रुपये खर्च झाले आहेत. जाहिरातीवर 50 कोटी, शासन आपल्या दारी कार्यक्रमाच्या एका सभेला 10 कोटी खर्च येतो. हा खर्च कमी करुन वारेमाप खर्चावर आवर घाला, असंही आमदार रोहित पवार यांनी सांगितलं. नेते राज्य चालवायचा सक्षम नाहीत, तीस लाख तरुण नोकरीसाठी प्रयत्न करत आहेत. मात्र सरकार त्यांची चेष्टा करत असल्याचंही रोहित पवार यांनी यावेळी सांगितलं.

प्रफुल्ल पटेलांवर पलटवार : विदर्भाची जबाबदारी ज्या नेत्याकडं सोपवली होती, ते नेते स्वतःच्या जिल्हापुरतेचं मर्यादित राहिले. त्यांना शरद पवारांनी केंद्रात जबाबदारी दिली. मात्र त्यांनी शरद पवारांचे विचार लोकांपर्यंत पोहोचवले नाहीत, असा हल्लाबोल रोहित पवार यांनी प्रफुल्ल पटेल यांच्यावर केला.

विश्वास ठेवला त्यांनीच विश्वासघात केला : ज्यांनी विचार बदलला, जे नेते भाजपविरोधात बोलले ते आज भाषण करताना काहीही बोलत असतील, तर खरं समजायला नको. आमदारांच्या सह्या कागदांवर घेतल्या, तेव्हा आम्ही विश्वास केला. मात्र त्याचा हा वापर असा होईल असं, वाटलं नाही असंही रोहित पवार यावेळी म्हणाले.

हेही वाचा :

1. Rohit Pawar : भांडणं लावून भाजपाने आपला हेतू साध्य केला - रोहित पवार
2. Rohit Pawar Met Ajit Pawar : सरकारमध्ये फक्त अजित पवारच कार्यक्षम; रोहित पवारांकडून स्तुतीसुमने