मुंबई Uday Samant On Uddhav Thackeray : केंद्रीय गृहमंत्री अमित शाह यांनी मध्य प्रदेश राज्यातील निवडणुकीदरम्यान मतदारांना आकर्षित करण्यासाठी अयोध्येत राम लल्लांचं मोफत दर्शन देण्याचं आश्वासन दिलं आहे. त्यावर राज्यात विरोधी पक्षांनी टीकास्त्र सोडलंय. तसंच माजी मुख्यमंत्री उद्धव ठाकरे यांनी पत्रकार परिषद घेत अमित शहांच्या आश्वासनावर आक्षेप घेतलाय. तर दुसरीकडं शिंदे गटाचे मंत्री उदय सामंत यांनी उद्धव ठाकरेंना जोरदार प्रत्युत्तर दिलं आहे.

नितीश कुमारांच्या वक्तव्यावर ठाकरे गप्प : उद्धव ठाकरे यांच्या पत्रकार परिषदेला उत्तर देताना मंत्री उदय सामंत म्हणाले की, उद्धव ठाकरे यांनी पत्रकार परिषद घेऊन गृहमंत्री अमित शाह यांच्या वक्तव्यावर आक्षेप घेतलाय. मात्र आठ दिवसांपूर्वी बिहारचे मुख्यमंत्री नितीश कुमार यांनी महिलांबाबत अश्लील वक्तव्य विधानसभेत केलं होतं. त्याबाबत उद्धव ठाकरेंनी कुठंही वक्तव्य केलेलं नाही. नितीश कुमार यांच्या वक्तव्यावर उद्धव ठाकरेंनी त्यांचं मत का? व्यक्त केलं नाही, असं उद्योगमंत्री सामंत यांनी म्हटंलय.

निवडणूक आयोग योग्य निर्णय घेईल : पुढं बोलताना सामंत म्हणाले की, इंडिया आघाडीसोबत असलेले नितीश कुमार यांच्या वक्तव्यावर उद्धव ठाकरे काय पत्रकार परिषदेत काय बोलणार? याबाबत आम्हाला आगोदरच माहीत होतं. त्यांनी गृहमंत्र्याच्या वक्तव्याबाबत निवडणूक आयोगाला पत्र लिहिल्यास निवडणूक आयोग योग्य तो निर्णय घेईल, असा विश्वास सामंत यांनी व्यक्त केला आहे. तसंच बिहारचे मुख्यमंत्री नितीश कुमार यांनी महिलांबाबत केलेल्या अश्लील वक्तव्याबाबत इंडिया आघाडीतील नेत्यांचं काय मत आहे? असा प्रश्न त्यांनी विचारला आहे.

देवांचं दर्शन घेऊन चांगल्या कार्याची सुरुवात : आजच्या पत्रकार परिषदेत उद्धव ठाकरे यांनी केंद्र सरकार देवाच्या नावावर राजकारण करत असल्याचा आरोप केलाय. या प्रश्नाला उत्तर देताना सामंत म्हणाले की, उमेदवारी अर्ज भरण्यासाठी जात असताना आपण देवांचं दर्शन घेतो. प्रत्येकजण आपापल्या जाती, धर्मातील देवांचं दर्शन घेऊन चांगल्या कार्याची सुरवात करतो. अशा प्रकारचं वक्तव्य अमित शाह यांनी आजच केलंय. मात्र अनेक नेत्यांच्या भाषणातूनही अशी विधाने आगोदर झाल्याचा दावा सामंत यांनी केलाय.

पुन्हा नरेंद्र मोदीच पंतप्रधान होणार : काँग्रेस सरकारच्या काळात बाळासाहेब ठाकरेंचा मतदानाचा हक्क हिरावून घेण्यात आला. मात्र, आता त्याच काँग्रेसशी काही लोकांनी युती केली आहे. पाच राज्यांच्या विधानसभा निवडणुकांपाठोपाठ लोकसभा निवडणुका होणार आहेत. लोकसभा निवडणुकीत पुन्हा एकदा नरेंद्र मोदी देशाच्या पंतप्रधानपदी विराजमान होणार, ही काळ्या दगडावरची रेघ आहे, असा ठाम विश्वास सामंत यांनी व्यक्त केला.

हेही वाचा -

1. Uddhav Thackeray News : धर्माच्या नावावर मत मागणं योग्य आहे का? उद्धव ठाकरे यांच निवडणूक आयोगाला पत्र
2. शिवसेना उपनेते अद्वय हिरे यांना 20 नोव्हेंबरपर्यंत पोलीस कोठडी, समर्थकांची न्यायालयाबाहेर घोषणाबाजी
3. Sanjay Raut News : 2024 ला पोलिसांचा हिशेब केला जाईल- अद्वय हिरे अटक प्रकरणावरून संजय राऊत यांचा इशारा