सोलापूर - राष्ट्रवादी काँग्रेस कडून आपल्याला लक्ष केले जात आहे. याबाबत विरोधी पक्षनेते देवेंद्र फडणवीस, गृहमंत्री, मुख्यमंत्र्यांकडे तक्रार करणार आहे. राष्ट्रवादी काँग्रेसचे सर्वेसर्वा शरद पवार यांच्याकडून आपल्याला धोका असल्याचा खळबळजनक आरोप रयत क्रांती संघटनेचे नेते सदाभाऊ खोत यांनी केला ( Sadabhau Khot Allegation Sharad Pawar ) आहे.
सदाभाऊ खोत सांगोल्यात आल्यानंतर अशोक शिनगारे या हॉटेलचालकाने 'उधारी द्या आणि मगच पुढच्या दौऱ्यावर जावा' असे म्हणत हुज्जत घालण्याचा प्रयत्न ( Sadabhau Khot Hotel Bill Controversy ) केला. त्यानंतर सदाभाऊ खोत यांनी त्या हॉटेलचाकविरोधात गुन्हा दाखल केला आहे. त्या प्रकरणावर खोत यांनी आज ( 17 जून ) सोलापुरात पत्रकार परिषद घेत, राष्ट्रवादीवर निशाणा साधला.
'हॉटेलचालकावर अनेक गुन्हे' - सदाभाऊ खोत म्हणाले की, अशोक शिंगारे याच्यावर अनेक गुन्हे दाखल आहेत. तो वाळू माफिया आहे, त्याच्या मोबाईलची कसून तपासणी करणे गरजेचे आहे. त्याचे कोणाकोणाला फोनद्वारे संवाद साधला त्याची माहिती घ्यावी. त्यामधून त्याला शिकवणूक देणाऱ्याची खरी माहिती समोर येईल. हॉटेलमध्ये एकही कार्यकर्ता चहा पण पिला नाही. 2014 ते 2022 पर्यंत मी अनेकवेळा सांगोल्यात गेलो. पण, एकदाही हा हॉटेलचालक मला भेटला नाही. अशोक शिनगारे हा मोठा गुन्हेगार आहे. सोने तस्करीसह अनेक गुन्हे त्यावर दाखल आहेत, असा आरोपही सदाभाऊ खोत यांनी केला आहे.
'बगलबच्यांची नावे लवकरच समोर येतील' - या प्रकरणात कोणत्या राष्ट्रवादी नेत्याचे हात आहे, असे विचारले असता सदाभाऊ यांनी म्हटलं की, लवकरच बगलबच्यांची नावे समोर येतील. चिरेबंदीचा वाडा पाडल्याशिवाय राहणार नाही, असा इशारा खोत यांनी राष्ट्रवादीला दिला आहे.
