नवी दिल्ली - राजधानी नवी दिल्लीतील अति सुरक्षित मानल्या जाणाऱ्या रोहिणी न्यायालय परिसरात पुन्हा गोळीबार झाल्याची घटना उघडकीस आली आहे. शुक्रवारी दुपारी कुख्यात गुन्हेगार जितेंद्र उर्फ गोगी याला न्यायालयात आणण्यात आले होते. यावेळी वकीलाच्या वेशामध्ये आलेल्या दोन जणांनी त्याच्यावर गोळीबार केला. याला प्रत्युत्तर देताना विशेष पथकाच्या अधिकाऱ्यांनीही गोळीबार केला. यामध्ये दोन हल्लेखोरांसोबत गुन्हेगार गोगी याचाही मृत्यू झाला आहे.
जितेंद्र उर्फ गोगीवर होते 8 लाखांचे बक्षिस -
मिळालेल्या माहितीनुसार, दिल्ली पोलिसाच्या विशेष पथकाने जितेंद्र उर्फ गोगी याला 2020मध्ये ताब्यात घेतले होते. काउंटर इंटेलिजन्स टीमने त्याला गुरुग्राम येथून त्याच्या तीन साथीदारांसह ताब्यात घेतले होते. ताब्यात घेण्यापूर्वी त्याच्यावर दिल्ली पोलिसांकडून 8 लाखांचे बक्षिस ठेवलेले होते. तो हत्या, अपहरण, पोलिसांवर हल्ला यासारख्या कुख्यात गुन्ह्यात सामील होता. ताब्यात घेतल्यानंतर त्याला कारगृहात ठेवण्यात आले होते.
वकीलाच्या वेशात आलेल्या हल्लेखोरांनी केला गोळीबार -
शुक्रवारी तिसऱ्या बटालियनचे पोलीस आणि काउंटर इंटेलिजन्सची टीम त्याला रोहिणी न्यायालयासमोर दाखल करण्यासाठी घेऊन आली होती. यावेळी वकीलाचा वेष परिधान करून आलेल्या दोन हल्लेखोरांनी त्याच्यावर गोळीबार केला.
हल्लेखोरांसह गुन्हेगार गोगीचा जागीच मृत्यू -
त्याला वाचवण्याच्या प्रयत्नात काउंटर इंटेलिजेंसच्या टीमने हल्लेखोरांवर गोळीबार केला. यात दोन्ही हल्लेखोरांचा मृत्यू झाला. रोहिणी न्यायालयात दोन हल्लेखोरांनी वकीलाचा वेश परिधान करून न्यायालयात प्रवेश केला होता. या घटनेत मारल्या केलेल्या दोन हल्लेखोरांची ओळख अद्याप पटली नाही आहे. तर या घटनेत जखमी झालेल्या जितेंद्र उर्फ गोगी याचा जागीच मृत्यू झाला.
दिल्ली पोलिसांनी सांगितले की, या घटनेत एकूण तीन जणांचा मृत्यू झाला आहे. या सर्व प्रकरणाची तपासणी सुरू आहे.
दहा वर्षापासून होते सुरू गॅंगवॉर -
उल्लेखनीय बाब अशी आहे, जितेंद्र उर्फ गोगी आणि अलीपूर येथील ताजपुरीया परिसरात राहणाऱ्या सुनिल उर्फ टिल्लू यांच्यात मागील दहा वर्षांपासून वाद गॅंगवॉर सुरू होते. यामध्ये आतापर्यंत 20 पेक्षा अधिक लोकांचा मृत्यू झालेला आहे. पोलीस सुत्रांचे असे म्हणणे आहे की, या हत्येमागेही सुनिल उर्फ टिल्लू याचा हात असावा. या प्रकरणाचा पुढील तपास पोलीस करत आहेत.
हेही वाचा - उरी: रामपूर सेक्टरमध्ये तीन दहशतवाद्यांना कंठस्नान; पाच एके-47, 70 हँड ग्रेनेडसह शस्त्रसाठा जप्त
