പത്തനംതിട്ട: ഇലവുംതിട്ടയിൽ ബാറിലുണ്ടായ സംഘര്‍ഷത്തിന് പിന്നാലെ വീട്ടിലെത്തിയ യുവാവ് ദേഹാസ്വാസ്ഥ്യം മൂലം മരിച്ചു. മേസ്‌തിരിപ്പണിക്കാരനായ നല്ലാനിക്കുന്ന് താന്നി നില്‍ക്കുന്നതില്‍ അജി രാജ് (46) ആണ് മരിച്ചത്. സംഭവത്തിൽ പന്നിക്കുഴി പനയ്ക്കല്‍ കോളനിയില്‍ മുരളിയെ പൊലീസ് കസ്റ്റഡിയില്‍ എടുത്തു.
ചൊവ്വാഴ്‌ച(29.11.2022) ഉച്ചയ്ക്ക് 12.30 ന് ഇലവുംതിട്ട ജങ്ഷനിലുള്ള ബാറില്‍ വച്ചാണ് മുരളിയും അജി രാജുമായി അടിപിടിയുണ്ടായത്. അടിയേറ്റ് തറയില്‍ തലയടിച്ചാണ് അജി വീണത്. തുടര്‍ന്ന് ഒന്നരയോടെ വീട്ടിലെത്തി കിടന്ന അജിയുടെ ആരോഗ്യനില പെട്ടെന്ന് വഷളാവുകയായിരുന്നു.
കണ്ണിനും മുഖത്തുമെല്ലാം നീര് വച്ചതിനെ തുടര്‍ന്ന് പത്തനംതിട്ട ജനറല്‍ ആശുപത്രിയിലേക്ക് കൊണ്ടു പോയെങ്കിലും മരണം സംഭവിക്കുകയായിരുന്നു. അതേസമയം ബാറിൽ ഉണ്ടായ മര്‍ദനമാണ് മരണ കാരണമെന്ന് അജിയുടെ ബന്ധുക്കള്‍ ആരോപിച്ചു.
സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്. ബാറില്‍ നടന്ന സംഘട്ടനത്തിന്‍റെ സിസിടിവി ദൃശ്യങ്ങള്‍ പരിശോധിക്കുമെന്ന് പൊലീസ് പറഞ്ഞു. മൃതദേഹം പത്തനംതിട്ട ജനറല്‍ ആശുപത്രി മോര്‍ച്ചറിയില്‍.
