പാലക്കാട് ദമ്പതികളെ വെട്ടിക്കൊലപ്പെടുത്തി

author img

By

Published : Jan 10, 2022, 4:15 PM IST

ദമ്പതികളെ വെട്ടിക്കൊലപ്പെടുത്തി  Aged couple found dead  Palakkad murder  kerala latest news  പാലക്കാട് കൊലപാതകം  കേരളം പുതിയ വാർത്തകള്‍

വീട്ടിലുണ്ടായിരുന്ന ഇവരുടെ മകന്‍ സനലിനെ കാണാനില്ല

പാലക്കാട്: പുതുപ്പരിയാരം പ്രതീക്ഷ നഗറില്‍ ഭാര്യയെയും ഭര്‍ത്താവിനെയും വെട്ടിക്കൊലപ്പെടുത്തി. ഓട്ടൂര്‍ക്കാട് മയൂരത്തില്‍ ചന്ദ്രന്‍ (64), ദൈയ്‌വാന (ദേവി, 55) എന്നിവരാണ് കൊല്ലപ്പെട്ടത്. തിങ്കളാഴ്‌ച രാവിലെയാണ് സംഭവം.

ഇരുവരുടെയും ശരീരത്തില്‍ വെട്ടേറ്റതിന്‍റെ നിരവധി അടയാളങ്ങളുണ്ട്. വീട്ടിലുണ്ടായിരുന്ന ഇവരുടെ മകന്‍ സനലിനെ കാണാനില്ല. എറണാകുളത്തുള്ള മകള്‍ സൗമിനി തിങ്കളാഴ്‌ച രാവിലെ വീട്ടിലേക്ക് വിളിച്ചപ്പോള്‍ ഫോണില്‍ കിട്ടിയില്ല.

പലതവണ വിളിച്ചും കിട്ടാതായതോടെ അയല്‍വാസിയെ വിളിച്ചു. അയല്‍വാസിയായ സ്‌ത്രീ വീട്ടില്‍ ചെന്ന് വിളിച്ചിട്ടും കേള്‍ക്കാതായതോടെ അടുത്ത വീട്ടിലെ രാജന്‍ എന്നയാളെ വിളിച്ച് വരുത്തി. തുടർന്ന് ഇരുവരും നടത്തിയ പരിശോധനയിൽ പിന്‍ഭാഗത്തെ വാതില്‍ തുറന്ന് കിടക്കുന്നതായി കാണുകയും അകത്ത് കയറി നോക്കുകയുമായിരുന്നു.

രാജനാണ് ഇരുവരും മരിച്ച് കിടക്കുന്നത് കണ്ടത്. തുടര്‍ന്ന് പൊലീസിനെ വിവരമറിയിച്ചു. ചന്ദ്രന്‍ കിടപ്പുമുറിയിലെ കിടക്കയിലും ഭാര്യ ഹാളിലുമാണ് കിടന്നിരുന്നത്.

ALSO READ മുംബൈ വിമാനത്താവളത്തിൽ വൻ തീപിടിത്തം; ആളപായമില്ല

ദൈയ്‌വാനയുടെ മൃതദേഹം തുണികൊണ്ട് മൂടി വച്ച നിലയിലായിരുന്നു. ഇവരുടെ മൃതദേഹം കിടന്ന ഹാളില്‍ നിന്ന് കീടനാശിനിയുടെ കുപ്പിയും കണ്ടെത്തി. സ്ഥലത്ത് മോഷണം നടന്നതിന്‍റെ ലക്ഷങ്ങളൊന്നുമില്ലെന്നും പൊലീസ് അറിയിച്ചു.

മൂന്ന് മക്കളിൽ സനൽ എന്ന ആണ്‍ക്കുട്ടി മാത്രമാണ് ദമ്പതികള്‍ക്കൊപ്പം താമസിച്ചിരുന്നത്. സംഭവത്തിന് ശേഷം കാണാതായ ഇയാളെ ഇതുവരെ കണ്ടെത്താനായിട്ടില്ല. കൊലപാതക സ്ഥലത്ത് നിന്ന് ആയുധങ്ങളൊന്നും കണ്ടെത്തിയിട്ടില്ല.

സ്ഥലത്ത് ജില്ലാ പൊലീസ് മേധാവി ആര്‍ വിശ്വനാഥിന്‍റെ നേതൃത്വത്തില്‍ പരിശോധന നടത്തി. വിരലടയാള വിദഗ്‌ധരും സ്ഥലത്തെത്തി. കേസ് അന്വേഷിക്കാന്‍ മലമ്പുഴ സിഐ ബികെ സുനില്‍ കൃഷ്‌ണന്‍റെ നേതൃത്വത്തില്‍ പ്രത്യേക അന്വേഷണ സംഘത്തെ നിയോഗിച്ചു.

മൃതദേഹങ്ങള്‍ പോസ്‌റ്റ്‌മോര്‍ട്ടത്തിനായി ജില്ലാ ആശുപത്രിയിലേക്ക് മാറ്റി.

ALSO READ അട്ടപ്പാടിയിലെ ശിശുമരണം: മൃതദേഹത്തോട് അനാദരവ് കാണിച്ചെന്ന് ബന്ധുക്കൾ; പ്രതിഷേധം

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.