മലപ്പുറം: പെരിന്തല്‍മണ്ണയില്‍ അരക്കോടി രൂപ വിലമതിക്കുന്ന ഹാഷിഷ് ഓയിലുമായി രണ്ട് പേര്‍ അറസ്റ്റില്‍. വയനാട് മേപ്പാടി സ്വദേശി പാമ്പനാല്‍ സെബാസ്റ്റ്യന്‍ (51), അങ്ങാടിപ്പുറം വലമ്പൂര്‍ സ്വദേശി കൂരിമണ്ണില്‍ സിദ്ദീഖ് (52) എന്നിവരാണ് പിടിയിലായത്. ഇവരില്‍ നിന്ന് ഒന്നര കിലോ ഹാഷിഷ് പൊലീസ് കണ്ടെടുത്തു.
മലപ്പുറം ജില്ലാ പൊലീസ് മേധാവി എസ്.സുജിത്ത് ദാസിന് ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ പൊലീസും ആന്‍റി നര്‍ക്കോട്ടിക്‌ സ്‌ക്വാഡും നടത്തിയ അന്വേഷണത്തിലാണ് ഇരുവരും അറസ്റ്റിലായത്. ആന്ധ്രയില്‍ നിന്ന് കേരളത്തിലേക്ക് ഹാഷിഷ് ഓയില്‍ കടത്തുന്ന സംഘത്തിലെ കണികളാണ് ഇരുവരും.
പെരിന്തല്‍മണ്ണ ഡിവൈ.എസ്.പി എം.സന്തോഷ് കുമാറിന്‍റ നേതൃത്വത്തില്‍ സി.ഐ സി.അലവി, എസ്.ഐ സി.കെ. നൗഷാദ് എന്നിവരടങ്ങുന്ന സംഘമാണ് പ്രതികളെ പിടികൂടിയത്.
also read: പൊലീസ് പിടിച്ചെടുത്ത ലഹരി വസ്‌തുക്കള്‍ തീയിട്ട് നശിപ്പിച്ചു ; കത്തിച്ചത് എംഡിഎംഎ ഉള്‍പ്പെടെയുള്ളവ
