വെടിക്കെട്ടിന് രോഹിത്, നങ്കൂരമിടാന്‍ കോലി, എറിഞ്ഞിടാന്‍ ബുംറയും ഷമിയും; 2011 ആവര്‍ത്തിക്കാന്‍ ഇന്ത്യ
വെടിക്കെട്ടിന് രോഹിത്, നങ്കൂരമിടാന്‍ കോലി, എറിഞ്ഞിടാന്‍ ബുംറയും ഷമിയും; 2011 ആവര്‍ത്തിക്കാന്‍ ഇന്ത്യ
India vs Australia Cricket World Cup 2023 final: ഏകദിന ലോകകപ്പ് ഫൈനലില്‍ ഇന്ത്യയും ഓസ്‌ട്രേലിയയും നേര്‍ക്കുനേര്‍.
അഹമ്മദാബാദ്: ഏകദിന ലോകകപ്പില്‍ മൂന്നാം കിരീടം തേടി ഇന്ത്യ വീണ്ടും കളത്തിലിറങ്ങുകയാണ്. ഞായറാഴ്‌ച അഹമ്മദാബാദിലെ നരേന്ദ്രമോദി സ്റ്റേഡിയത്തില്‍ നടക്കുന്ന ഏകദിന ലോകകപ്പിന്‍റെ (Cricket World Cup 2023) ഫൈനലില്‍ അഞ്ച് തവണ ചാമ്പ്യന്മാരായ ഓസ്‌ട്രേലിയയാണ് ആതിഥേയര്‍ക്ക് എതിരാളി (India vs Australia Cricket World Cup 2023 final). 2011-ല്‍ സ്വന്തം മണ്ണില്‍ തന്നെയായിരുന്നു ഇന്ത്യ അവസാനമായി ഏകദിന ലോകകപ്പ് ഉയര്‍ത്തിയത്.
അന്ന് ക്വാര്‍ട്ടര്‍ ഫൈനലില്‍ ഓസീസിനെ കീഴടക്കിക്കൊണ്ടായിരുന്നു എംഎസ്‌ ധോണിയുടെ കീഴിലിറങ്ങിയ ആതിഥേയര്‍ കിരീടത്തിലേക്ക് അടുത്തത്. സച്ചിനും സെവാഗും യുവരാജും സുരേഷ് റെയ്‌നയും സഹീര്‍ ഖാനുമൊക്കെ അണിനിരന്നുവെങ്കിലും ടീം എല്ലാ നിലയിലും മികച്ച ഒന്നായിരുന്നില്ല. റിക്കി പോണ്ടിങ്ങിന്‍റെ നേതൃത്വത്തില്‍ കളിച്ച ഓസീസാവട്ടെ ടീം ഇന്ത്യയെ അപേക്ഷിച്ച് ഏറെ മുന്നിലായിരുന്നു.
എന്നാല്‍ അങ്ങേയറ്റം വരെ പോരാടാനുള്ള ഉശിര്‍ പകര്‍ന്ന ഉര്‍ജ്ജമായിരുന്നു ഇന്ത്യയെ കിരീടത്തിലേക്ക് നയിച്ചത്. ഇതേ അഹമ്മദാബാദില്‍ തന്നെയായിരുന്നു 2011-ലെ ക്വാര്‍ട്ടര്‍ ഫൈനല്‍ മത്സരവും അരങ്ങേറിയത്. ഓസീസ് ആറ് വിക്കറ്റ് നഷ്‌ടത്തില്‍ ഉയര്‍ത്തിയ 261 റണ്‍സിന്‍റെ വിജയ ലക്ഷ്യം 14 പന്തുകള്‍ ബാക്കി നില്‍ക്കെ അഞ്ച് വിക്കറ്റുകള്‍ മാത്രം നഷ്‌ടപ്പെടുത്തിയായിരുന്നു ഇന്ത്യ നേടിയെടുത്തത്.
ഇക്കുറി രോഹിത് ശര്‍മ (Rohit Sharma) നേതൃത്വം നല്‍കുന്ന ടീമിന് വിജയിക്കാനുള്ള ദാഹം ഏറെയാണ്. വെടിക്കെട്ട് തുടക്കം നല്‍കുന്ന ക്യാപ്റ്റന്‍ രോഹിത്തിന് ഓപ്പണിങ്ങില്‍ പിന്തുണ നല്‍കുന്ന ശുഭ്‌മാന്‍ ഗില്‍, തുടര്‍ന്ന് നങ്കൂരമിട്ട് കളിക്കുന്ന വിരാട് കോലിയും (Virat Kohli) ശ്രേയസും കെഎല്‍ രാഹുലും ബാറ്റിങ് യൂണിറ്റിന്‍റെ നട്ടെല്ലാവുമ്പോള്‍ പന്തുകൊണ്ടും ബാറ്റുകൊണ്ടും തിങ്ങളാന്‍ രവീന്ദ്ര ജഡേജ, ബോളിങ് യൂണിറ്റിലേക്ക് എത്തുമ്പോള്‍ എതിരാളികളെ കറക്കി വീഴ്‌ത്താന്‍ കുല്‍ദീപ് യാദവ്, പേസ് യൂണിറ്റില്‍ മരണ കോംബോയായ മുഹമ്മദ് സിറാജ്, മുഹമ്മദ് ഷമി, ജസ്‌പ്രീത് ബുംറ സഖ്യം (Indian Cricket Team In Cricket World Cup 2023).
മൂന്ന് യൂണിറ്റിലും ഏറെ മികച്ച പ്രകടനം നടത്തുന്ന ഈ സംഘത്തിന് ഏതൊരു എതിരാളിയേയും തകര്‍ത്തെറിയാനുള്ള കരുത്തുണ്ട്. എന്നാല്‍ റിക്കി പോണ്ടിങ്ങിന്‍റെ നേതൃത്വത്തില്‍ കളിച്ച അന്നത്തെ ഓസീസിനെ അപേക്ഷിച്ച് പാറ്റ് കമ്മിന്‍സിന്‍റെ നേതൃത്വത്തിലുള്ള ഇപ്പോഴത്തെ ടീം പിന്നിലാണെന്ന് തന്നെ പറയാം.
ഗ്രൂപ്പ് ഘട്ടത്തില്‍ നേരത്തെ നേര്‍ക്കുനേര്‍ എത്തിയപ്പോള്‍ ഓസീസിനെ തോല്‍പ്പിക്കാന്‍ ഇന്ത്യയ്‌ക്ക് കഴിഞ്ഞിരുന്നു. ഈ ലോകകപ്പില്‍ ഇരു ടീമുകളുടേയും ആദ്യ മത്സരം കൂടിയായിരുന്നുവത്. ചെന്നൈയിലെ ചെപ്പോക്കില്‍ നടന്ന മത്സരത്തില്‍ ആറ് വിക്കറ്റുകള്‍ക്കായിരുന്നു ആതിഥേയര്‍ ജയിച്ച് കയറിയത്.
ആദ്യം ബാറ്റ് ചെയ്‌ത ഓസീസിനെ 199 റണ്‍സില്‍ എറിഞ്ഞൊതുക്കാന്‍ ഇന്ത്യയ്‌ക്ക് കഴിഞ്ഞിരുന്നു. ചെറിയ ലക്ഷ്യം പിന്തുടരാന്‍ ഇറങ്ങിയ ആതിഥേയര്‍ക്ക് തുടക്കം തന്നെ തിരിച്ചടിയേറ്റു. സ്‌കോര്‍ ബോര്‍ഡില്‍ വെറും രണ്ട് റണ്‍സ് മാത്രം നില്‍ക്കെ മൂന്ന് വിക്കറ്റുകളായിരുന്നു ടീമിന് നഷ്‌ടമായത്. എന്നാല്‍ തുടര്‍ന്ന് ഒന്നിച്ച വിരാട് കോലിയും കെഎല്‍ രാഹുലും ചേര്‍ന്നായിരുന്നു ടീമിനെ വിജയത്തിലേക്ക് എത്തിച്ചത്.
ഇനി നവംബര്‍ 19-ന് ഇരു ടീമികളും നേര്‍ക്കുനേര്‍ എത്തുമ്പോള്‍ വിജയം ആര്‍ക്കൊപ്പമെന്നാണ് ആരാധകര്‍ ഉറ്റുനോക്കുന്നത്. ഇന്ത്യയ്‌ക്ക് 2011 ആവര്‍ത്തിക്കാന്‍ കഴിയുമെന്ന് തന്നെ പ്രതീക്ഷിക്കാം..
