ഉണ്ണി മുകുന്ദന്‍ വീല്‍ ചെയറില്‍; ജയ് ഗണേഷ് ഫസ്‌റ്റ് ലുക്ക് ശ്രദ്ധേയം
ഉണ്ണി മുകുന്ദന്‍ വീല്‍ ചെയറില്‍; ജയ് ഗണേഷ് ഫസ്‌റ്റ് ലുക്ക് ശ്രദ്ധേയം
Unni Mukundan Jai Ganesh First Look Poster: ജയ് ഗണേഷിന്‍റെ ഫസ്‌റ്റ് ലുക്ക് പോസ്‌റ്റര്‍ റിലീസ് ചെയ്‌തു. ചിത്രത്തിലെ ഉണ്ണി മുകുന്ദന്‍റെ പോസ്‌റ്ററാണ് അണിയറപ്രവര്‍ത്തകര്‍ പുറത്തുവിട്ടത്.
ഉണ്ണി മുകുന്ദന്‍റേതായി (Unni Mukundan) അണിയറയില്‍ ഒരുങ്ങുന്ന ഏറ്റവും പുതിയ ചിത്രമാണ് 'ജയ് ഗണേഷ്' (Jai Ganesh). 'ജയ് ഗണേഷി'ന്‍റെ ഫസ്‌റ്റ് ലുക്ക് പോസ്‌റ്റര്‍ പുറത്തിറങ്ങി (Jai Ganesh First Look Poster). വീല്‍ ചെയറില്‍ ഇരിക്കുന്ന ഉണ്ണി മുകുന്ദനെയാണ് ഫസ്‌റ്റ് ലുക്കില്‍ കാണാനാവുക.
സിനിമയുടെ ഔദ്യോഗിക ഫേസ്‌ബുക്ക് പേജിലൂടെയാണ് 'ജയ് ഗണേഷി'ന്‍റെ ഫസ്‌റ്റ് പുറത്തുവിട്ടത്. 'ജയ് ഗണേഷി'ന്‍റെ ഫസ്‌റ്റ് ലുക്ക് അവതരിപ്പിക്കുന്നു! 2024ല്‍ തിയേറ്ററുകളില്‍ എത്തും' -എന്ന അടിക്കുറിപ്പോടെയാണ് 'ജയ് ഗണേഷ്' ടീം ഫസ്‌റ്റ് ലുക്ക് റിലീസ് ചെയ്‌തത്. ഉണ്ണി മുകുന്ദനും ഫസ്‌റ്റ് ലുക്ക് ഫേസ്‌ബുക്കില്‍ പങ്കുവച്ചിട്ടുണ്ട്.
രഞ്ജിത് ശങ്കര്‍ (Ranjith Sankar) സംവിധാനം ചെയ്യുന്ന സിനിമയുടെ ചിത്രീകരണം അടുത്തിടെയാണ് ആരംഭിച്ചത്. നവംബര്‍ 11ന് ആരംഭിച്ച ചിത്രീകരണം എറണാകുളത്തും പരിസര പ്രദേശങ്ങളിലുമായി പുരോഗമിക്കുകയാണ്. കൊച്ചിയിലെ തൃക്കാക്കര അമ്പലത്തില്‍ വച്ചാണ് സിനിമയുടെ പൂജ നടന്നത് (Jai Ganesh Pooja). ഉണ്ണി മുകുന്ദന്‍റെ അച്ഛന്‍ എം മുകുന്ദനാണ് സിനിമയ്‌ക്ക് ഫസ്‌റ്റ് ക്ലാപ്പ് അടിച്ചത്.
ഉണ്ണി മുകുന്ദനും സംവിധായകന്‍ രഞ്ജിത് ശങ്കറും ചേര്‍ന്നാണ് സിനിമയുടെ നിര്‍മാണം (Unni Mukundan Ranjith Sankar movie). ഉണ്ണിമുകുന്ദന്‍ ഫിലിംസിന്‍റെ മൂന്നാമത്തെ നിര്‍മാണ സംരംഭം കൂടിയാണ് ചിത്രം. സിനിമയില്‍ ടൈറ്റില്‍ റോളില്‍ ഗണപതിയായാണ് ഉണ്ണി മുകുന്ദന്‍ എത്തുന്നത് (Unni Mukundan as Ganesh). തന്‍റെ കരിയറിലെ വ്യത്യസ്‌തമായ വേഷമാകും ചിത്രത്തിലേതെന്നാണ് ഉണ്ണി മുകുന്ദന്‍ പറയുന്നത്. 'ജയ് ഗണേഷി'ലെ കഥാപാത്രത്തിനായി അനുയോജ്യനായ ഒരു നടനെ കണ്ടെത്താന്‍ താന്‍ ഒരുപാട് അലഞ്ഞിരുന്നതായി സിനിമയുടെ പ്രഖ്യാപന വേളയില്‍ സംവിധായകന്‍ പറഞ്ഞിരുന്നു.
'ജയ് ഗണേഷ് രചിച്ച ശേഷം ഞാന്‍ ഒരു നടനെ തെരയുകയായിരുന്നു. 'മാളികപ്പുറം' എന്ന സിനിമയ്‌ക്ക് ശേഷം ഏഴ് മാസത്തോളം ചിത്രീകരണം ഒന്നും ഇല്ലാതിരുന്ന ഉണ്ണി മുകുന്ദന്‍ ശരിയായൊരു തിരക്കഥയ്‌ക്കായി കാത്തിരിക്കുകയായിരുന്നു. ഞങ്ങൾ 'ജയ് ഗണേഷി'നെ കുറിച്ച് ചർച്ച ചെയ്‌തു. അദ്ദേഹത്തിന് തിരക്കഥ ഇഷ്‌ടമായി. ഞാൻ എന്‍റെ നടനെ കണ്ടെത്തി. ഞങ്ങൾ ഇരുവരും ചേര്‍ന്നാണ് ജയ് ഗണേഷ് നിര്‍മിക്കുക. ആവേശകരവും വെല്ലുവിളി നിറഞ്ഞതുമായ ഒരു യാത്ര ആയിരിക്കും ഇത്. ഈ യാത്രയുടെ ഓരോ ഘട്ടവും ഞങ്ങൾ ആസ്വദിക്കുമെന്ന് പ്രതീക്ഷിക്കുന്നു' - ഇപ്രകാരമായിരുന്നു സംവിധായകന്‍ രഞ്ജിത് ശങ്കറിന്‍റെ വാക്കുകള്‍.
മിഹമ നമ്പ്യാര്‍ ആണ് സിനിമയില്‍ ഉണ്ണി മുകുന്ദന്‍റെ നായികയായി എത്തുന്നത്. 'ജയ് ഗണേഷില്‍' ജോമോളും സുപ്രധാന വേഷം അവതരിപ്പിക്കും. ഒരിടവേളയ്‌ക്ക് ശേഷം ജോമോള്‍ മലയാള സിനിമയിലേയ്‌ക്ക് തിരികെ എത്തുന്നു എന്ന പ്രത്യേകതയും 'ജയ് ഗണേഷി'നുണ്ട്. ഒരു ക്രിമിനല്‍ ലോയറുടെ വേഷമാണ് സിനിമയില്‍ ജോമോള്‍ക്ക്.
അതേസമയം 'മാളികപ്പുറം' ആണ് ഉണ്ണി മുകുന്ദന്‍റേതായി ഏറ്റവും ഒടുവില്‍ റിലീസായ ചിത്രം. അയ്യപ്പ വേഷത്തിലാണ് ചിത്രത്തില്‍ ഉണ്ണി മുകുന്ദന്‍ എത്തിയത്. തിയേറ്ററുകളില്‍ മികച്ച വിജയം നേടിയ ചിത്രം ഒടിടിയിലും റിലീസ് ചെയ്‌തിരുന്നു. ഡിസ്‌നി പ്ലസ്‌ ഹോട്‌സ്‌റ്റാറിലാണ് 'മാളികപ്പുറം' സ്‌ട്രീമിങ് നടത്തിവരുന്നത്.
