Aamir Khan is taking a break from acting: നീണ്ട 35 വര്‍ഷത്തെ അഭിനയ ജീവിതത്തില്‍ നിന്നും ഇടവേള എടുക്കാനൊരുങ്ങി ബോളിവുഡ്‌ സൂപ്പര്‍ താരം ആമിര്‍ ഖാന്‍. സിനിമയില്‍ നിന്നും ഇടവേള എടുത്ത് തനിക്ക് കുടുംബത്തിനൊപ്പം സമയം ചെലവിടണമെന്നാണ് താരം പറയുന്നത്. ആമിറിന്‍റെ ഏറ്റവും ഒടുവിലായി തിയേറ്ററുകളിലെത്തിയ 'ലാല്‍ സിങ്‌ ഛദ്ദ'യുടെ പരാജയത്തിന് ശേഷമാണ് താരത്തിന്‍റെ ഈ തീരുമാനം.
അടുത്ത കുറച്ച് വര്‍ഷങ്ങള്‍ അമ്മയ്‌ക്കും മക്കള്‍ക്കുമൊപ്പം ചെലവഴിക്കാനാണ് ആഗ്രഹിക്കുന്നതെന്ന് താരം പറയുന്നു. അതിനൊപ്പം നല്ല സിനിമകള്‍ നിര്‍മിക്കുമെന്നും താരം വ്യക്തമാക്കി. 'ലാല്‍ സിങ്‌ ഛദ്ദയ്‌ക്ക് ശേഷം ഞാന്‍ ചെയ്യാന്‍ ആഗ്രഹിച്ച സിനിമയാണ് 'ചാംപ്യന്‍സ്'. വളരെ നല്ല കഥയും തിരക്കഥയുമാണ് ചിത്രത്തിന്‍റേത്. പക്ഷേ എനിക്ക് ഇപ്പോള്‍ വിശ്രമം ആവശ്യമാണ്. കുടുംബത്തിന്‍റെ കൂടെ സമയം ചെലവഴിക്കാന്‍ ഞാന്‍ ആഗ്രഹിക്കുന്നു. ഞാന്‍ 35 വര്‍ഷമായി ജോലി ചെയ്യുന്നു. മറ്റൊന്നിനെ കുറിച്ചും ചിന്തിക്കാതെ എന്‍റെ ജോലിയില്‍ മാത്രമായിരുന്നു ഫോക്കസ് ചെയ്‌തിരുന്നത്.
എന്നാല്‍ ഉറ്റവരെ സംബന്ധിച്ചിടത്തോളം അത് ഒട്ടും പ്രായോഗികമായിരുന്നില്ല. അവരുമായി ഒന്നിച്ചു നില്‍ക്കേണ്ട സമയം വന്നു കഴിഞ്ഞു. ഇനിയുള്ള കുറച്ച് വര്‍ഷങ്ങള്‍ നടന്‍ എന്ന നിലയില്‍ എന്നെ കാണില്ല. എന്നെ സ്‌നേഹിക്കുന്നവര്‍ക്ക് ഇത് വിഷമകരമാവാം. എങ്കിലും 'ചാംപ്യന്‍സ്' എന്ന ചിത്രം ഞാന്‍ നിര്‍മിക്കും. കാരണം എനിക്ക് ഈ സിനിമയില്‍ വിശ്വാസമുണ്ട്.
എന്‍റെ മകള്‍ക്ക് 23 വയസായി. കുട്ടിക്കാലം മുതലേ അവളുടെ ജീവിതത്തില്‍ എന്‍റെ സാന്നിധ്യം ഉണ്ടായിട്ടില്ല എന്നത് എനിക്കറിയാം. അവള്‍ക്ക് അവളുടേതായ ആകുലതകളും വിഷമങ്ങളും സ്വപ്‌നങ്ങളും ആഗ്രഹങ്ങളുമുണ്ടാകും. അപ്പോഴൊന്നും അവള്‍ക്ക് ഞാന്‍ ഉണ്ടായില്ല. എനിക്കിപ്പോള്‍ അതെല്ലാം മനസിലാകുന്നു. എനിക്ക് അവളുടെ സ്വപ്‌നങ്ങളെ കുറിച്ചോ ഭയത്തെ കുറിച്ചോ അറിയില്ല. എന്നാല്‍ എന്‍റെ സംവിധായകരുടെ സ്വപ്‌നങ്ങളെ കുറിച്ചും ആഗ്രഹങ്ങളെ കുറിച്ചും എനിക്ക് അറിയാമായിരുന്നു.' -ആമിര്‍ ഖാന്‍ പറഞ്ഞു.
Also Read: ആമിര്‍ ഖാന്‍റെ അമ്മയ്‌ക്ക് ഹൃദയാഘാതം
