എറണാകുളം: സംഗീത ഗോവണിക്ക് പിന്നാലെ എം.ജി റോഡ് മെട്രോ സ്റ്റേഷനില് ചവിട്ടി പ്രവര്‍ത്തിപ്പിക്കാവുന്ന ചാര്‍ജിങ് കിയോസ്‌ക് സജ്ജമായി. യാത്രക്കാർക്ക് വ്യായാമത്തോടൊപ്പം മൊബൈല്‍ ഫോണ്‍, ലാപ്ടോപ്, പവര്‍ ബാങ്ക് തുടങ്ങിയവ ചാർജ് ചെയ്യാമെന്നതാണ് റൈഡ് ഓണ്‍ എന്ന് പേരിട്ടിരിക്കുന്ന ചാർജിങ് കിയോസ്‌കിന്‍റെ പ്രത്യേകത. പെഡല്‍ ചവിട്ടിക്കറക്കി ചാര്‍ജ് ചെയ്യാവുന്ന നെക്സ്റ്റ് ജനറേഷന്‍ ചാര്‍ജിങ് കിയോസ്‌കാണ് മെട്രോ സ്റ്റേഷനിലൊരുക്കിയത്.
സ്റ്റാര്‍ട് അപ്പ് സംരംഭമായ സ്‌മാഡോ ലാബ് പ്രൈവറ്റ് ലിമിറ്റഡ് വികസിപ്പിച്ച ഈ സംവിധാനത്തിലൂടെ സാധാരണ വൈദ്യുതിയിൽ ചാർജ് ചെയ്യാവുന്ന അതേ വേഗത്തിൽ തന്നെ ചാർജ് ചെയ്യാം. പെഡൽ ചവിട്ടുന്നതിന്‍റെ വേഗതയനുസരിച്ച് ചാർജിങ്ങിന്‍റെ വേഗതയും വർധിപ്പിക്കാൻ കഴിയും. യാത്രക്കാരില്‍ വ്യായാമ ശീലം വളര്‍ത്തുക എന്നതും കൂടി ഇത്തരം സംവിധാനം ഏര്‍പ്പെടുത്തുന്നതിലൂടെ കൊച്ചി മെട്രോ ലക്ഷ്യമിടുന്നു. ഒരേസമയം ഒന്നിലേറെ മൊബൈൽ ഫോണുകൾ ചാർജ് ചെയ്യാനും റൈഡ് ഓണിൽ സൗകര്യമുണ്ട്.
കേരളത്തിൽ ഇത്തരമൊരു സംവിധാനം ആദ്യമാണെന്ന് റൈഡ് ഓൺ നിർമിച്ച സ്‌മാഡോ ലാബ് പ്രൈവറ്റ് ലമിറ്റഡ് ഉടമകളായ അശ്വിനും ജിഷ്‌ണുവും പറയുന്നു. മെട്രോ സ്റ്റേഷനിലെത്തുന്ന യുവതി യുവാക്കാൾ ഈ പുതിയ സംവിധാനത്തെ ഏറ്റെടുക്കുമെന്നാണ് പ്രതീക്ഷിക്കുന്നത്. നഗര ജീവിതത്തിന്‍റെ തിരക്കുകൾക്കിടയിൽ വ്യായാമത്തിന്‍റെ പ്രാധാന്യം ഓർമപ്പെടുത്തുകയാണ് ഇത്തരം സംവിധാനങ്ങൾ ചെയ്യുന്നത്.
എസ്‌കലേറ്ററും ലിഫ്റ്റും ഉപയോഗിക്കുന്നതിന് പകരം ചവിട്ടുപടികള്‍ കയറുന്നതും ഇറങ്ങുന്നതും പ്രോല്‍സാഹിപ്പിക്കാന്‍ മ്യൂസിക്കല്‍ സ്റ്റെയറും എം.ജി റോഡ് സ്റ്റേഷനില് പ്രവര്‍ത്തിക്കുന്നുണ്ട്.
