പ്രയാഗ്‌രാജ് (യുപി) : ഉത്തർപ്രദേശിലെ പ്രയാഗ്‌രാജിൽ മദ്യപിച്ചെത്തിയ ഭർത്താവ് ഭാര്യയെ കുത്തിക്കൊന്നു. ചൊവ്വാഴ്‌ച (നവംബർ 14) രാത്രിയാണ് സംഭവം. മദ്യപിച്ചെത്തിയ മന്നു ബൻസാൽ ഭാര്യ മംമ്തയുമായി (35) വഴക്കിടുകയും രോഷാകുലനായി കുത്തിക്കൊലപ്പെടുത്തുകയുമായിരുന്നുവെന്ന് കിദ്ഗഞ്ച് എസ്എച്ച്ഒ രജനി പറഞ്ഞു.

ഭാര്യയും ഭർത്താവും മദ്യപാനികളാണെന്നും ചൊവ്വാഴ്‌ച രാത്രി ഇരുവരും തമ്മിൽ ചില വിഷയങ്ങളിൽ തർക്കം ഉണ്ടാവുകയും ബൻസാൽ ആക്രമിക്കുകയും സംഭവസ്ഥലത്ത് തന്നെ അവര്‍ മരിക്കുകയുമായിരുന്നുവെന്നാണ് നാട്ടുകാർ പറയുന്നത്. ബുധനാഴ്‌ച രാവിലെയാണ് സംഭവത്തെക്കുറിച്ച് വിവരം ലഭിച്ചതെന്ന് പൊലീസ് പറഞ്ഞു. പ്രതിയെ അറസ്റ്റ് ചെയ്‌തതായും മൃതദേഹം പോസ്റ്റ്‌മോർട്ടത്തിന് അയച്ചതായും പൊലീസ് അറിയിച്ചു.