ಆರೋಗ್ಯ ವಿಮೆ ಮತ್ತು ತುರ್ತು ನಿಧಿ: ಯಾವುದು ಬೆಸ್ಟ್? ನೀವು ತಿಳಿದಿರಲೇಬೇಕಾದ ವಿಚಾರಗಳು

ಯಾವುದೇ ಕುಟುಂಬದ ಆರ್ಥಿಕ ಯೋಜನೆಯಲ್ಲಿ ಆರೋಗ್ಯ ಬಹಳ ಮುಖ್ಯ ಅಂಶ. ಏಕೆಂದರೆ ಯಾರಾದರೂ ಅನಾರೋಗ್ಯಕ್ಕೆ ತುತ್ತಾದರೆ ಅದರ ವೆಚ್ಚವನ್ನು ಸಂಪೂರ್ಣವಾಗಿ ಅಂದಾಜಿಸಲು ಸಾಧ್ಯವಿಲ್ಲ. ಯಾವುದೇ ಸಂದರ್ಭದಲ್ಲಿ ಯಾರ ಬಳಿಯೂ ಒಂದೇ ಬಾರಿಗೆ ಹೆಚ್ಚಿನ ಪ್ರಮಾಣದ ನಗದು ಇರುವುದಿಲ್ಲ. ಆಗ ಆರೋಗ್ಯ ವಿಮೆ ದೊಡ್ಡ ರೀತಿಯಲ್ಲಿ ನೆರವಿಗೆ ಬರುತ್ತದೆ.

ಅನಿರೀಕ್ಷಿತ ವೈದ್ಯಕೀಯ ವೆಚ್ಚಗಳ ವಿರುದ್ಧ ಸಮಗ್ರ ಆರ್ಥಿಕ ರಕ್ಷಣೆಯನ್ನು ಒದಗಿಸಲು ಆರೋಗ್ಯ ವಿಮೆ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತದೆ. ಹೀಗಿದ್ದರೂ ಆರೋಗ್ಯ ವಿಮೆಯೊಂದಿಗೂ ಸಹ ಕೆಲವು ಖರ್ಚುಗಳನ್ನು ನೀವೇ ಭರಿಸಬೇಕಾಗಬಹುದು. ಅಂತಹ ಸಂದರ್ಭಗಳಲ್ಲಿ ನಾವು ಸಿದ್ಧಪಡಿಸಿರುವ ತುರ್ತು ನಿಧಿ ಆರ್ಥಿಕವಾಗಿಯೂ ಬಹಳ ಸಹಾಯ ಮಾಡುತ್ತದೆ. ಈ ಹಿನ್ನೆಲೆಯಲ್ಲಿ ಆರೋಗ್ಯ ವಿಮೆ ಮತ್ತು ತುರ್ತು ನಿಧಿಯ ಬಗ್ಗೆ ಕೆಲವು ಪ್ರಮುಖ ಸಂಗತಿಗಳನ್ನು ತಿಳಿದುಕೊಳ್ಳಬೇಕು.

ಆರೋಗ್ಯ ವಿಮೆ ಮತ್ತು ತುರ್ತು ನಿಧಿ? ವ್ಯತ್ಯಾಸವೇನು? ಯಾವುದು ಒಳ್ಳೆಯದು?: ಆರೋಗ್ಯ ವಿಮೆ ಸಾಮಾನ್ಯ, ಪ್ರಮುಖ ವೈದ್ಯಕೀಯ ವೆಚ್ಚಗಳ ವಿರುದ್ಧ ವಿಶಾಲ ರಕ್ಷಣೆ ನೀಡುತ್ತದೆ. ತುರ್ತು ನಿಧಿ ಅನಿರೀಕ್ಷಿತ ವೆಚ್ಚಗಳು ಅಥವಾ ವ್ಯಾಪ್ತಿಯಲ್ಲಿನ ಅಂತರಗಳಿಗೆ ಸುರಕ್ಷತಾ ಜಾಲವಾಗಿ ಕೆಲಸ ಮಾಡಬಲ್ಲದು. ಹಣಕಾಸು ತಜ್ಞರು ಸಾಮಾನ್ಯವಾಗಿ 3 ರಿಂದ 6 ತಿಂಗಳ ಜೀವನ ವೆಚ್ಚಗಳಿಗೆ ಸಾಕಷ್ಟು (ತುರ್ತು) ನಿಧಿಯನ್ನು ಉಳಿಸಲು ಸಲಹೆ ನೀಡುತ್ತಾರೆ. ಹಾಗಿದ್ದೂ ವೆಚ್ಚಗಳು, ವಿಶೇಷವಾಗಿ ಆರೋಗ್ಯ ರಕ್ಷಣೆಗಾಗಿ, ವಿಸ್ತಾರವಾಗಿವೆ. ಆದ್ದರಿಂದ, ಹೆಚ್ಚಿನ ಮೊತ್ತದ ಕೆಲವು ತುರ್ತು ವೆಚ್ಚಗಳನ್ನು ಸರಿದೂಗಿಸಲು ಈ ನಿಧಿಯನ್ನು ಹೆಚ್ಚಿಸುವುದೂ ಸಹ ಅಗತ್ಯ.

ತುರ್ತು ನಿಧಿಯೊಂದಿಗೆ ಹೆಚ್ಚುವರಿ ವೆಚ್ಚಗಳು: ಕೆಲವು ಕಾರ್ಯವಿಧಾನಗಳು ಅಥವಾ ಚಿಕಿತ್ಸೆಗಳು ಆರೋಗ್ಯ ವಿಮೆಯಿಂದ ಸಂಪೂರ್ಣವಾಗಿ ಒಳಗೊಳ್ಳದೇ ಇರಬಹುದು. ಇದು ಅನಿರೀಕ್ಷಿತ ವೆಚ್ಚಗಳಿಗೆ ಕಾರಣವಾಗುತ್ತದೆ. ನೀವು ನೆಟ್‌ವರ್ಕ್ ಆಸ್ಪತ್ರೆಗಳಿಂದ ಹೊರಗೆ ಚಿಕಿತ್ಸೆ ಪಡೆದರೆ, ಆಸ್ಪತ್ರೆಯ ಬಿಲ್‌ಗಳನ್ನು ನೀವೇ ಪಾವತಿಸಬೇಕಾಗುತ್ತದೆ. ಮತ್ತು ಕ್ಲೈಮ್ ಮರುಪಾವತಿಗಾಗಿ ಕಾಯಬೇಕಾಗುತ್ತದೆ. ವಿಮಾ ದಾಖಲೆಗಳು ಮತ್ತು ಕ್ಲೈಮ್‌ಗಳನ್ನು ನಿರ್ವಹಿಸುವುದು ಕೆಲವೊಮ್ಮೆ ಜಟಿಲ ಮತ್ತು ಸಮಯ ತೆಗೆದುಕೊಳ್ಳುತ್ತದೆ. ಇದಲ್ಲದೆ, ರೋಗಿ ಆಸ್ಪತ್ರೆಯಲ್ಲಿದ್ದಾಗ ಉಂಟಾಗುವ ಕೆಲವು ಹೆಚ್ಚುವರಿ ವೆಚ್ಚಗಳು ಆರ್ಥಿಕವಾಗಿ ಹೊರೆಯಾಗಿರುತ್ತವೆ. ಅಂತಹ ಸಂದರ್ಭಗಳಲ್ಲಿ ತುರ್ತು ನಿಧಿಯನ್ನು ಹೊಂದಿರುವುದು ಸ್ವಲ್ಪ ತಾತ್ಕಾಲಿಕ ಪರಿಹಾರ ನೀಡುತ್ತದೆ. ಔಷಧಗಳನ್ನು ಖರೀದಿಸುವುದು, ನಿಮ್ಮ ಪಾಲಿಸಿಯ ಅಡಿಯಲ್ಲಿ ಒಳಗೊಳ್ಳದ ಪರೀಕ್ಷೆಗಳಿಗೆ ಹಣ ಪಾವತಿಸುವುದು ಅಥವಾ ಪರ್ಯಾಯ ಚಿಕಿತ್ಸೆಗಳಂತಹ ವಿಮೆಯಿಂದ ಒಳಗೊಳ್ಳದ ಅನೇಕ ವೆಚ್ಚಗಳಿಗೆ ತುರ್ತು ನಿಧಿಯನ್ನು ನೀವು ಬಳಸಬಹುದು.

ಸಣ್ಣ ಕ್ಲೈಮ್‌ಗಳಿಂದಾಗುವ ಪರಿಣಾಮ: ಆರೋಗ್ಯ ವಿಮೆಯ ವಿಷಯಕ್ಕೆ ಬಂದಾಗ ಅನೇಕ ಜನರು ಪ್ರತಿ ಸಣ್ಣ ಕಾಯಿಲೆಗೂ ವಿಮೆಯನ್ನು ಅವಲಂಬಿಸಿರುತ್ತಾರೆ. ಆದರೆ, ಅಂತಹ ಕ್ಲೈಮ್‌ಗಳನ್ನು ಮಾಡಿದಾಗ ಒಬ್ಬರು ಪುನಃಸ್ಥಾಪನೆಯ ಸಮಯದಲ್ಲಿ ಹೆಚ್ಚುವರಿ ವಿಮಾ ರಕ್ಷಣೆ/ಪುನಃಸ್ಥಾಪನೆಯಂತಹ ಪ್ರಯೋಜನಗಳನ್ನು ಕಳೆದುಕೊಳ್ಳುತ್ತಾರೆ. ಆದ್ದರಿಂದ ಕಡಿಮೆ ವೆಚ್ಚದ ಕಾಯಿಲೆಗಳಿಗೆ ಕ್ಲೈಮ್ ಮಾಡದೆಯೇ ತುರ್ತು ನಿಧಿಯನ್ನು ಆ ವೆಚ್ಚಗಳಿಗೆ ಬಳಸಬಹುದು. ಈ ಕಾರಣದಿಂದಾಗಿ, ವಿಮಾ ನವೀಕರಣದ ಸಮಯದಲ್ಲಿ ಪ್ರೀಮಿಯಂ ಹೆಚ್ಚಾಗುವುದಿಲ್ಲ ಮತ್ತು ಹೆಚ್ಚುವರಿ ಪ್ರಯೋಜನಗಳನ್ನೂ ಸಹ ಒದಗಿಸುತ್ತದೆ.

ತುರ್ತು ನಿಧಿಯನ್ನೇ ಅವಲಂಬಿಸಿದರೆ?: ತುರ್ತು ನಿಧಿಯನ್ನು ಮಾತ್ರ ಅವಲಂಬಿಸುವುದರಿಂದ ಕೆಲವು ನಿರ್ಣಾಯಕ ಸಮಯಗಳಲ್ಲಿ ಬಹಳಷ್ಟು ಆರ್ಥಿಕ ತೊಂದರೆಗಳು ಉಂಟಾಗುವ ಸಾಧ್ಯತೆ ಇದೆ. ಆಸ್ಪತ್ರೆಗೆ ದಾಖಲಾಗುವುದರಿಂದ ನಿಧಿ ಖಾಲಿಯಾದರೆ, ಅದನ್ನು ತ್ವರಿತವಾಗಿ ಮರುಪೂರಣ ಮಾಡುವುದು ಕಷ್ಟವಾಗುತ್ತದೆ. ಹೆಚ್ಚುತ್ತಿರುವ ಆರೋಗ್ಯ ವೆಚ್ಚಗಳಿಂದಾಗಿ, ನಿಮ್ಮ ಪ್ರಸ್ತುತ ತುರ್ತು ನಿಧಿ ಕೆಲವು ವರ್ಷಗಳ ನಂತರ ಸಾಕಾಗದು. ನೀವು ತುರ್ತು ನಿಧಿಯನ್ನು ಲಿಕ್ವಿಡ್ (ಕ್ಯಾಶ್) ರೂಪದಲ್ಲಿ ಇಡುವುದರಿಂದ, ಅದನ್ನು ಇತರ ಅನಗತ್ಯ ಉದ್ದೇಶಗಳಿಗೂ ಬಳಸುವ ಸಾಧ್ಯತೆ ಇರುತ್ತದೆ. ಆ ಸಂದರ್ಭದಲ್ಲಿ ನಿಧಿ ಬಹಳವಾಗಿ ಕಡಿಮೆಯಾಗುವ/ಅಳಿದುಹೋಗುವ ಸಾಧ್ಯತೆಯಿದೆ.

ಹಿರಿಯ ನಾಗರಿಕರು ಪದೇ ಪದೇ ಆಸ್ಪತ್ರೆಗೆ ದಾಖಲಾಗುವ ಸಾಧ್ಯತೆ ಹೆಚ್ಚು ಇರುವುದರಿಂದ, ತುರ್ತು ನಿಧಿಯನ್ನು ಮಾತ್ರ ಅವಲಂಬಿಸುವುದು ಸೂಕ್ತವಲ್ಲ. ಹಿರಿಯ ನಾಗರಿಕರಿಗೆ ಆದಾಯವಿಲ್ಲದ ಕಾರಣ, ತುರ್ತು ನಿಧಿಯನ್ನು ನಿರ್ಮಿಸುವುದೂ ಸಹ ಕಷ್ಟ.

ಆರೋಗ್ಯ ವಿಮೆ: ಇದು ಆಸ್ಪತ್ರೆಗೆ ದಾಖಲಾಗುವುದು, ಶಸ್ತ್ರಚಿಕಿತ್ಸೆಗಳು, ಡೇ ಕೇರ್ ಕಾರ್ಯವಿಧಾನಗಳು, ಆಂಬ್ಯುಲೆನ್ಸ್ ವೆಚ್ಚಗಳು, ಕೆಲವೊಮ್ಮೆ ಪೂರ್ವ ಅಥವಾ ನಂತರದ ಆಸ್ಪತ್ರೆ ವೆಚ್ಚಗಳನ್ನು ಸಹ ಒಳಗೊಳ್ಳುತ್ತದೆ. ವಿಮೆಯು ನಿಮ್ಮ ವಿಮಾ ಮೊತ್ತವನ್ನು ಅವಲಂಬಿಸಿ 5 ಲಕ್ಷ ರೂ ಅಥವಾ ಅದಕ್ಕಿಂತ ಹೆಚ್ಚಿನ ವೈದ್ಯಕೀಯ ಬಿಲ್‌ಗಳನ್ನು ಸಹ ಒಳಗೊಳ್ಳುತ್ತದೆ. ಇದು 80 ಡಿ ತೆರಿಗೆ ಪ್ರಯೋಜನಗಳೊಂದಿಗೆ ಬರುತ್ತದೆ. ಅಂದರೆ, ನೀವು ಪ್ರತಿ ವರ್ಷ ಪ್ರೀಮಿಯಂ ಪಾವತಿಸಿದಾಗ ತೆರಿಗೆ ಕಡಿತಗಳನ್ನು ಪಡೆಯಬಹುದು. ಆರೋಗ್ಯ ವಿಮೆಯು ನಿಮ್ಮ ಮೊದಲ ರಕ್ಷಣಾ ಮಾರ್ಗವಾಗಿದೆ. ತುರ್ತು ನಿಧಿ ವಿಮೆಯಿಂದ ಒಳಗೊಳ್ಳದ ಸಣ್ಣ, ದಿನನಿತ್ಯದ ವೆಚ್ಚಗಳನ್ನು ನಿರ್ವಹಿಸಲು ಮಾತ್ರ ನಿಮಗೆ ಸಹಾಯ ಮಾಡುತ್ತದೆ. ಹೀಗಿದ್ದೂ ಆರೋಗ್ಯ ವಿಮೆಯೊಂದಿಗೆ, ತುರ್ತು ನಿಧಿ ಒಂದೇ ಆಗಿರುವುದಿಲ್ಲ. ಆದ್ಯತೆಗಳು ಒಂದೇ ಆಗಿರುತ್ತವೆ ಎಂದು ಹೇಳಬಹುದು.

ಇದು ಬಹಳ ಮುಖ್ಯ: ನಿಮ್ಮ ಅಗತ್ಯಗಳನ್ನು ಎಚ್ಚರಿಕೆಯಿಂದ ನಿರ್ಣಯಿಸುವ ಮೂಲಕ ಮತ್ತು ಆರೋಗ್ಯ ವಿಮೆ ಮತ್ತು ತುರ್ತು ನಿಧಿ ಎರಡನ್ನೂ ಹೊಂದುವುದೊಂದಿಗೆ ನೀವು ಅನಿರೀಕ್ಷಿತ ಆರೋಗ್ಯ ವೆಚ್ಚಗಳನ್ನು ಬುದ್ಧಿವಂತಿಕೆಯಿಂದ ನಿರ್ವಹಿಸಬಹುದು. ಈ ಮೂಲಕ ಹೆಚ್ಚು ಸುರಕ್ಷಿತ ಆರ್ಥಿಕ ಭವಿಷ್ಯವನ್ನು ರೂಪಿಸಿಕೊಳ್ಳಲು ಸಾಧ್ಯವಿದೆ.

ಇದನ್ನೂ ಓದಿ: ಮಕ್ಕಳಿಗಾಗಿ ಇದೆ ಅಂಚೆ ಕಚೇರಿಯ ಸೂಪರ್ ಯೋಜನೆ: ದಿನಕ್ಕೆ ಕೇವಲ​ 18 ರೂ. ಹೂಡಿಕೆ ಮಾಡಿ.. ಬರೋಬ್ಬರಿ 3 ಲಕ್ಷ ರೂ. ಲಾಭ ಪಡೆಯಿರಿ!