ISRO and NASA Joint Mission: ಭಾರತದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಮತ್ತು ಯುನೈಟೆಡ್ ಸ್ಟೇಟ್ಸ್‌ನ ನ್ಯಾಶನಲ್ ಏರೋನಾಟಿಕ್ಸ್ ಮತ್ತು ಸ್ಪೇಸ್ ಅಡ್ಮನಿಸ್ಟ್ರೇಷನ್ (ನಾಸಾ) ನಾಸಾ-ಇಸ್ರೋ ಸಿಂಥೆಟಿಕ್ ಅಪರ್ಚರ್ ರಾಡಾರ್ (NISAR) ಮಿಷನ್ನ ಬಹುನಿರೀಕ್ಷಿತ ಉಡಾವಣೆಗೆ ಸಿದ್ಧತೆಗಳನ್ನು ಪೂರ್ಣಗೊಳಿಸಿವೆ. ಒಡಿಶಾದ ಮಹೀಂದ್ರಗಿರಿಯ ಇಸ್ರೋ ಪ್ರೊಪಲ್ಷನ್ ಕಾಂಪ್ಲೆಕ್ಸ್ (ಐಪಿಆರ್‌ಸಿ) ನಲ್ಲಿ ಇಸ್ರೋ ತನ್ನ ಅರೆ-ಕ್ರಯೋಜೆನಿಕ್ ಎಂಜಿನ್‌ನ ಶಾರ್ಟ್ ಹೀಟ್ ಟೆಸ್ಟ್ ಅನ್ನು ಯಶಸ್ವಿಯಾಗಿ ನಡೆಸಿದೆ. ಈ ಉಡಾವಣೆಯು ಈ ಜೂನ್‌ನಲ್ಲಿ ಶ್ರೀಹರಿಕೋಟಾದಿಂದ ನಡೆಯಲಿದ್ದು, ಇದು ಭೂಮಿಯ ವೀಕ್ಷಣೆ ಮತ್ತು ಎರಡೂ ರಾಷ್ಟ್ರಗಳ ನಡುವಿನ ಬಾಹ್ಯಾಕಾಶ ಸಹಕಾರದಲ್ಲಿ ಮಹತ್ವದ ಪಾತ್ರ ವಹಿಸಲಿದೆ.
ವಿಶ್ವದ ಅತಿದೊಡ್ಡ ಮತ್ತು ಅತ್ಯಂತ ಮುಂದುವರೆದ ರಾಡಾರ್ ಇಮೇಜಿಂಗ್ ಸಿಸ್ಟಮ್ಗಳಲ್ಲೊಂದನ್ನು ಹೊತ್ತ GSLV-F16 ಮಿಷನ್ ಭೂಮಿಯ ಮೇಲ್ಮೈಯಲ್ಲಿನ ಮಾಹಿತಿಯನ್ನು ತರಲಿದೆ. ಭೂಮಿ, ಸಸ್ಯವರ್ಗ ಮತ್ತು ಮಂಜುಗಡ್ಡೆಯ ಮೇಲಿನ ಬದಲಾವಣೆ ಪತ್ತೆಹಚ್ಚಲು ಈ ಮಿಷನ್ ಸಹಾಯ ಮಾಡಲಿದೆ. ಇಸ್ರೋ ಔಪಚಾರಿಕವಾಗಿ ಉಡಾವಣಾ ಅಭಿಯಾನವನ್ನು ಪ್ರಾರಂಭಿಸಿದೆ. ಜಿಎಸ್ಎಲ್ವಿ ಲಾಂಚ್ ವೆಹಿಕಲ್ ಎರಡನೇ ಹಂತ (ಜಿಎಸ್2) ಇಸ್ರೋ ಪ್ರೊಪಲ್ಷನ್ ಕಾಂಪ್ಲೆಕ್ಸ್‌ನಿಂದ ಶ್ರೀಹರಿಕೋಟಾ ಲಾಂಚ್ ಪ್ಯಾಡ್ಗೆ ಸ್ಥಳಾಂತರಗೊಂಡಿದೆ.
ನಿಸಾರ್ ಮಿಷನ್ ಉದ್ದೇಶವೇನು?: NISAR ಉಡಾವಣಾ ದಿನಾಂಕ ಇನ್ನೂ ನಿರ್ಧಾರವಾಗಿಲ್ಲ. ಆದರೆ, ಇದು ನಾಸಾ ಮತ್ತು ಇಸ್ರೋದ ಮೊದಲ ಜಂಟಿ ಕಾರ್ಯಾಚರಣೆಯಾಗಿದೆ. ಭೂಮಿಯ ಅತ್ಯಂತ ವಿವರವಾದ ಅವಲೋಕನಗಳನ್ನು ನಿಯಮಿತವಾಗಿ ಕೈಗೊಳ್ಳಲು NISAR ಅನ್ನು ಬಾಹ್ಯಾಕಾಶಕ್ಕೆ ಕಳುಹಿಸಲಾಗುತ್ತಿದೆ. ಈ ಉಪಗ್ರಹವು ಒಂದು ನಿರ್ದಿಷ್ಟ ಸ್ಥಳದಲ್ಲಿ ಒಂದು ಸೆಂಟಿಮೀಟರ್‌ಗಳಷ್ಟು ಸಣ್ಣ ಬದಲಾವಣೆಗಳನ್ನು ಸೆರೆಹಿಡಿಯಬಹುದಾಗಿದೆ.
ಸುಮಾರು ಒಂದು ದಶಕದಿಂದ ಅಭಿವೃದ್ಧಿ ಹಂತದಲ್ಲಿರುವ NISAR ಉಪಗ್ರಹವು ಎರಡು ಅಸಾಧಾರಣ ರಾಡಾರ್ ಪೇಲೋಡ್‌ಗಳನ್ನು ಹೊಂದಿದೆ. NASAದ L-ಬ್ಯಾಂಡ್ ರಾಡಾರ್ ಮತ್ತು ಅಹಮದಾಬಾದ್ ಅಭಿವೃದ್ಧಿಪಡಿಸಿದ S-ಬ್ಯಾಂಡ್ ರಾಡಾರ್. ಎರಡೂ ರಾಡಾರ್ ಸೆನ್ಸಾರ್ಗಳು ಮೋಡದ ಹೊದಿಕೆಯನ್ನು ಭೇದಿಸುವ ಮತ್ತು ಹಗಲು ಅಥವಾ ರಾತ್ರಿ ನಿರಂತರವಾಗಿ ಕಾರ್ಯ ನಿರ್ವಹಿಸುವ ಸಾಮರ್ಥ್ಯ ಹೊಂದಿವೆ.
ನಿಸಾರ್ನ ಅಧಿಕೃತ ವೆಬ್‌ಸೈಟ್ ಪ್ರಕಾರ, 'ನಾಸಾ-ಇಸ್ರೋ SAR (NISAR) ಮಿಷನ್ ಭೂಮಿಯ ಬದಲಾಗುತ್ತಿರುವ ಪರಿಸರ ವ್ಯವಸ್ಥೆಗಳು, ಕ್ರಿಯಾತ್ಮಕ ಮೇಲ್ಮೈಗಳು ಮತ್ತು ಮಂಜುಗಡ್ಡೆಯ ರಾಶಿಗಳನ್ನು ಅಳೆಯುತ್ತದೆ. ಇದು ಜೀವರಾಶಿ, ನೈಸರ್ಗಿಕ ಅಪಾಯಗಳು, ಸಮುದ್ರ ಮಟ್ಟ ಏರಿಕೆ ಮತ್ತು ಅಂತರ್ಜಲದ ಬಗ್ಗೆ ಮಾಹಿತಿಯನ್ನು ಒದಗಿಸುತ್ತದೆ. ಇದು ಇತರ ಅನ್ವಯಿಕೆಗಳಲ್ಲಿಯೂ ಸಹಾಯ ಮಾಡುತ್ತದೆ' ಎಂದು ಉಲ್ಲೇಖಿಸಲಾಗಿದೆ.
ಸರಳವಾಗಿ ಹೇಳುವುದಾದರೆ, ಈ ಉಪಗ್ರಹವು ಭೂಮಿಯ ಮೇಲ್ಮೈಯಲ್ಲಿ ನಡೆಯುತ್ತಿರುವ ಹಲವು ಪ್ರಮುಖ ಬದಲಾವಣೆಗಳ ಮೇಲ್ವಿಚಾರಣೆ ಮಾಡಲಿದೆ. ಉದಾಹರಣೆಗೆ, ಇದು ಹಿಮನದಿಗಳು ಮತ್ತು ಕಾಡುಗಳು ಕಡಿಮೆಯಾಗುದು ಹಾಗೂ ಭೂಕಂಪಗಳು ಮತ್ತು ಜ್ವಾಲಾಮುಖಿ ಚಟುವಟಿಕೆಗಳಲ್ಲಿನ ಬದಲಾವಣೆಗಳನ್ನು ಗಮನಿಸಲಿದೆ. ಈ ಉಪಗ್ರಹವು ಹವಾಮಾನ ಬದಲಾವಣೆ ಅಥವಾ ಯಾವುದೇ ಇತರ ನೈಸರ್ಗಿಕ ವಿಕೋಪದ ಬಗ್ಗೆ ಮಾನವನ ತಿಳುವಳಿಕೆಯನ್ನು ಹೆಚ್ಚಿಸಲಿದೆ ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ. ಅಷ್ಟೇ ಅಲ್ಲದೆ, ದಿನದ 24 ಗಂಟೆಯೂ ಭೂಮಿಯ ಭೂಮಿ ಮತ್ತು ಮಂಜುಗಡ್ಡೆಯ ಮೇಲ್ಮೈಗಳ ಮೇಲ್ವಿಚಾರಣೆ ಮಾಡಲಿದೆ. ಪ್ರತಿ 12 ದಿನಗಳಲ್ಲಿ ಎರಡು ಬಾರಿ ಉಪಗ್ರಹವು ಬಹುತೇಕ ಇಡೀ ಪ್ರಪಂಚವನ್ನು ಸ್ಕ್ಯಾನ್ ಮಾಡುತ್ತದೆ.
ಈ ಮಿಷನ್ ವಿಳಂಬವೇಕೆ?: ಕಳೆದ ವರ್ಷದ ಮೊದಲ ಆರು ತಿಂಗಳಲ್ಲಿ ನಿಸಾರ್ ಬಿಡುಗಡೆಯಾಗಬೇಕಿತ್ತು. ಈ ಉಪಗ್ರಹವನ್ನು ಪ್ರಾಥಮಿಕವಾಗಿ ಅಮೆರಿಕದಲ್ಲಿ ನಿರ್ಮಿಸಲಾಯಿತು. ಆದರೆ ಅದರ ಕೆಲವು ಭಾಗಗಳನ್ನು ಭಾರತದಿಂದ ಅಲ್ಲಿಗೆ ಕಳುಹಿಸಲಾಯಿತು. ಅಂತಿಮ ಪರೀಕ್ಷೆಗಾಗಿ ಉಪಗ್ರಹವನ್ನು 2023ರಲ್ಲಿ ಬೆಂಗಳೂರಿಗೆ ತರಲಾಯಿತು. ಈ ಪರೀಕ್ಷೆಯ ಸಮಯದಲ್ಲಿ 12 ಮೀಟರ್ ಆಂಟೆನಾವನ್ನು ಸುಧಾರಿಸುವ ಅಗತ್ಯವಿದೆ ಎಂದು ಕಂಡುಬಂದಿತ್ತು.
ಈ ಕಾರಣದಿಂದಾಗಿ ಉಪಗ್ರಹವನ್ನು ಮತ್ತೆ ಅಮೆರಿಕಕ್ಕೆ ಕಳುಹಿಸಬೇಕಾಯಿತು. ಅಗತ್ಯ ತಿದ್ದುಪಡಿಗಳ ನಂತರ ಈ ವರ್ಷ ನಿಸಾರ್ ಅನ್ನು ಇಸ್ರೋ ಕ್ಯಾಲೆಂಡರ್‌ನಲ್ಲಿ ಸೇರಿಸಲಾಯಿತು. ಆದರೂ ಉಡಾವಣೆಗೆ ಯಾವುದೇ ದಿನಾಂಕ ನಿಗದಿಪಡಿಸಿಲ್ಲ. ನಿಸಾರ್ಗಿಂತ ಮುನ್ನ ಮೇ ತಿಂಗಳಲ್ಲಿ ಎರಡು ಪ್ರಮುಖ ಕಾರ್ಯಾಚರಣೆಗಳು ಇಸ್ರೋ ಮುಂದಿವೆ. ವೀಕ್ಷಣಾ ಉಪಗ್ರಹ EOS-09 ಉಡಾವಣೆ ಜೊತೆಗೆ, ಗಗನಯಾನದ ಪರೀಕ್ಷಾ ವಾಹನ D2 ಅನ್ನು ಸಹ ಉಡಾವಣೆ ಮಾಡಲು ಇಸ್ರೋ ಸಜ್ಜಾಗಿದೆ.
ಓದಿ: ಬಾಹ್ಯಾಕಾಶಕ್ಕೆ ನುಗ್ಗಿದ ಪ್ರಾಜೆಕ್ಟ್ ಕೈಪರ್ ಸ್ಯಾಟಲೈಟ್ಸ್: ಸ್ಟಾರ್‌ಲಿಂಕ್‌ಗೆ ಕಠಿಣ ಸ್ಪರ್ಧೆ?
