ಬೆಂಗಳೂರು: ಜಗತ್ತಿನ ಅತ್ಯಂತ ಸಣ್ಣ ಸೆಮಿಕಂಡಕ್ಟರ್ ಚಿಪ್ವೊಂದನ್ನು ಭಾರತೀಯ ವಿಜ್ಞಾನ ಸಂಸ್ಥೆ (IISC)ಯ 30 ವಿಜ್ಞಾನಿಗಳ ತಂಡ ಅಭಿವೃದ್ಧಿ ಪಡಿಸಲು ಮುಂದಾಗಿದೆ. ತಮ್ಮ ಈ ಮಹಾತ್ಮಕಾಂಕ್ಷೆಯ ಯೋಜನೆ ಯಶಸ್ವಿಯಾದಲ್ಲಿ ಸುಧಾರಿತ ಸೆಮಿಕಂಡಕ್ಟರ್ ತಂತ್ರಜ್ಞಾನದಲ್ಲಿ ಮುಂಚೂಣಿಗೆ ಬರುವುದರ ಜತೆ ಜತೆಗೆ ಜಾಗತಿಕ ಚಿಪ್ ಉತ್ಪಾದನೆಯಲ್ಲಿ ಭಾರತ ಮಹತ್ವದ ಮೈಲಿಗಲ್ಲು ಸಾಧಿಸಲಿದೆ.
ಯಾವ ವಸ್ತು ಬಳಕೆ ಮಾಡಿ ಈ ಚಿಪ್ ತಯಾರಿಕೆ: IISC ತಂಡ ಪ್ರಸ್ತಾಪಿಸಿದ ಈ ಚಿಪ್ ಸುಧಾರಿತ 2ಡಿ ಉತ್ಪನ್ನವಾದ ಗ್ರಾಫೆನ್ ಮತ್ತು ಟ್ರಾನ್ಸಿಷನ್ ಮೆಟಲ್ ಡಿಚಲ್ಗೊಗೆನಿಡಸ್ (ಡಿಎಂಡಿ) ರೀತಿಯ ವಸ್ತುಗಳನ್ನು ಬಳಕೆ ಮಾಡಲಿದೆ. ಇದು ಕೇವಲ ಒಂದು ಪರಮಾಣುವಿನಷ್ಟು ದಪ್ಪವಾಗಿರುತ್ತದೆ. ಈ ಚಿಪ್ ಒಂದು ಆಂಗ್‌ಸ್ಟ್ರೋಮ್ ಅಥವಾ ಒಂದು ನ್ಯಾನೊಮೀಟರ್‌ನ ಹತ್ತನೇ ಒಂದು ಭಾಗದಷ್ಟು ಇರುತ್ತದೆ. ಇದು ಪ್ರಸ್ತುತ ಉತ್ಪಾದನೆಯಲ್ಲಿರುವ ಚಿಕ್ಕ ಚಿಪ್‌ಗಳಿಗಿಂತ ಗಮನಾರ್ಹವಾಗಿ ಚಿಕ್ಕದಾಗಿದೆ.
ಸರ್ಕಾರಕ್ಕೆ ಡಿಪಿಆರ್ ಸಲ್ಲಿಕೆ ಮಾಡಿದ ಐಐಎಸ್ಸಿ: ಈ ಚಿಪ್ ಅಭಿವೃದ್ಧಿ ಮಾಡುವ ಕುರಿತು ಐಐಎಸ್ಸಿ ವಿಜ್ಞಾನಿಗಳ ತಂಡ ವಿವರವಾದ ಯೋಜನಾ ವರದಿಯನ್ನು (ಡಿಪಿಆರ್) ಏಪ್ರಿಲ್ 22ರಂದು ಸರ್ಕಾರದ ಮುಖ್ಯ ವಿಜ್ಞಾನಿಕ ಸಲಹೆಗಾರರಿಗೆ ಸಲ್ಲಿಸಿತು . ಈ ಕುರಿತು ಪರಿಷ್ಕೃತ ವರದಿಯನ್ನು 2024ರಲ್ಲಿ ಸಲ್ಲಿಸಿದೆ ಎಂದು ಐಐಎಸ್ಸಿ ಸಿಬ್ಬಂದಿ ಮಯಾಂಕ್ ಶ್ರೀವತ್ಸಾವ್ ತಿಳಿಸಿದ್ದಾರೆ. ಬಳಿಕ ಈ ವರದಿಯನ್ನು ಎಲೆಕ್ಟ್ರಾನಿಕ್ ಮತ್ತು ಐಟಿ ಸಚಿವಾಲಯಕ್ಕೆ ಹಂಚಿಕೆ ಮಾಡಲಾಗಿತ್ತು. ಈ ಯೋಜನೆಯಲ್ಲಿ ಸದ್ಯ ಉತ್ಪಾದಿಸುತ್ತಿರುವ ಚಿಪ್ಗಿಂತ ಸಣ್ಣ ಚಿಪ್ ತಯಾರಿಸುವ ಕುರಿತು ಭರವಸೆ ನೀಡಿದ್ದು, ಇದು ಆ್ಯಂಗಸ್ಟ್ರಾಮ್ನ ಅಳತೆ ಹೊಂದಿರಲಿದೆ ಎಂದು ತಿಳಿದು ಬಂದಿದೆ.
ಸಿಲಿಕಾನ್ ಗೆ ಪರ್ಯಾಯವಾಗಿ ಆವಿಷ್ಕಾರ: ಸಾಂಪ್ರದಾಯಿಕವಾಗಿ ಸೆಮಿಕಂಡಕ್ಟರ್ ಉತ್ಪಾದನೆಯಲ್ಲಿ ಸಿಲಿಕಾನ್ ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ಬಳಕೆ ಮಾಡಲಾಗುತ್ತದೆ. ಆದರೆ, ಇದೀಗ ಸಂಶೋಧಕರು ಇದಕ್ಕೆ ಪರ್ಯಾಯವಾಗಿ 2ಡಿ ಉತ್ಪನ್ನಗಳ ಕುರಿತು ಜಗತ್ತಿನಾದ್ಯಂತ ಅವಿಷ್ಕಾರಕ್ಕೆ ಮುಂದಾಗಿದ್ದಾರೆ. ಈ ಉತ್ಪನ್ನಗಳು ಶಕ್ತಿ ಸಾಮರ್ಥ್ಯದ ಮತ್ತು ಶಕ್ತಿಶಾಲಿ ಚಿಪ್ಗಳಾಗಿರುವುದರಿಂದ ಸಿಲಿಕಾನ್ ಗೆ ಪರ್ಯಾಯವಾಗಿ 2ಡಿ ಉತ್ಪನ್ನ ಬಳಕೆ ಮಾಡಲಾಗುತ್ತಿದೆ. ಉದ್ಯಮ ತಜ್ಞರ ಪ್ರಕಾರ, ಸ್ಯಾಮ್ಸಂಗ್, ಮಿಡಿಯಾ ಟೆಕ್ ಕಂಪನಿಗಳು ವಾಣಿಜ್ಯಾತ್ಮಕವಾಗಿ ಅತಿ ಸಣ್ಣ ಚಿಪ್ ಉತ್ಪಾದನೆ ಮಾಡುತ್ತಿದ್ದು, ಇದರ ಗಾತ್ರ 3 ನ್ಯಾನೋ ಮೀಟರ್ಗಳಷ್ಟಿದೆ ಎಂದಿದ್ದಾರೆ.
ವರದಿ ವೆಬ್ಸೈಟ್ ನಲ್ಲಿ ಲಭ್ಯ: ಈ ಚಿಪ್ ಅಭಿವೃದ್ಧಿ ಯೋಜನೆ ಕುರಿತು ಪ್ರಧಾನ ವೈಜ್ಞಾನಿಕ ಸಲಹೆಗಾರರಿಗೆ ಸಲ್ಲಿಸಲಾದ ವರದಿಯ ವಿವರಣೆ ವೆಬ್ಸೈಟ್ನಲ್ಲಿ ಲಭ್ಯವಿದ್ದು, ಸರ್ಕಾರ ಈ ಪ್ರಸ್ತಾಪದ ಬಗ್ಗೆ ಆಸಕ್ತಿ ಹೊಂದಿರುವುದನ್ನು ಸೂಚಿಸಲಾಗಿದೆ. ಈ ವಿಚಾರದ ಕುರಿತು ಈಗಾಗಲೇ ಎಲೆಕ್ಟ್ರಾನಿಕ್ ಮತ್ತು ಐಟಿ ಸಚಿವಾಲಯ ಅನೇಕ ಬಾರಿ ಸಭೆ ನಡೆಸಿದ್ದು, ಸಚಿವಾಲಯ ಹಾಗೂ ಪ್ರಧಾನ ವೈಜ್ಞಾನಿಕ ಸಲಹೆಗಾರರು ಹಲವು ಸಭೆ ಮತ್ತು ಚರ್ಚೆ ನಡೆಸಿದ್ದಾರೆ.
ಸಚಿವಾಲಯ ಕೂಡ ಇದರ ಅಳವಡಿಕೆ ಮೌಲ್ಯಮಾಪನ ನಡೆಸುತ್ತಿದ್ದು, ಚಿಪ್ ಅಭಿವೃದ್ಧಿಯಲ್ಲಿನ ಯಶಸ್ಸಿನ ಬೆಳವಣಿಗೆ, ಸಹಯೋಗ, ಹೂಡಿಕೆ ಮತ್ತು ಸುಸ್ಥಿರ ತಂತ್ರಜ್ಞಾನದ ಕುರಿತು ಅರ್ಥೈಸಿಕೊಳ್ಳುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಭಾರತ ಮಾತ್ರವಲ್ಲ ಈ ಎಲ್ಲ ದೇಶಗಳೂ ರೇಸ್ ನಲ್ಲಿವೆ: ಈ ಚಿಪ್ ತಯಾರಿಕೆ ರೇಸ್ನಲ್ಲಿ ಭಾರತ ಮಾತ್ರವಿಲ್ಲ. ಅಮೆರಿಕದ ಪ್ರಿನ್ಸ್‌ಟನ್ ವಿಶ್ವವಿದ್ಯಾಲಯ, ಜಪಾನ್ನ ಒಕಿನಾವಾ ವಿಜ್ಞಾನ ಮತ್ತು ತಂತ್ರಜ್ಞಾನ ಸಂಸ್ಥೆ , ಚೀನಾ ಸಾಂಗ್‌ಶಾನ್ ಲೇಕ್ ಮೆಟೀರಿಯಲ್ಸ್ ಪ್ರಯೋಗಾಲಯ ಹಾಗೂ ಯುಕೆಯ ಮ್ಯಾಂಚೆಸ್ಟರ್ ವಿಶ್ವವಿದ್ಯಾಲಯ ನಂತಹ ಪ್ರತಿಷ್ಠಿತ ಸಂಸ್ಥೆಗಳು ಸಹ ಈ ರೇಸ್ನಲ್ಲಿದೆ. 2ಡಿ ಸೆಮಿಕಂಡಕ್ಟರ್ ಉತ್ಪನ್ನಗಳ ಮೇಲೆ ದಕ್ಷಿಣ ಕೊರಿಯಾ ಮತ್ತು ಯುರೋಪಿಯನ್ ಒಕ್ಕೂಟವು ಪ್ರಮುಖ ಹೂಡಿಕೆಗಳನ್ನು ಮಾಡಿದೆ. ಅಮೆರಿಕ 1 ಬಿಲಿಯನ್ ಡಾಲರ್ ಹೂಡಿಕೆ ಮಾಡಿದ್ದು, ಚೀನಾ ಮತ್ತು ಜಪಾನ್ ಕೂಡ ಗಮನಾರ್ಹವಾಗಿ ಹೂಡಿಕೆ ಮಾಡುತ್ತಿವೆ.
ಭವಿಷ್ಯದ ವೈವಿಧ್ಯಮಯ ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುವಲ್ಲಿ 2ಡಿ ಉತ್ಪನ್ನಗಳು ಪ್ರಮುಖವಾಗಿದ್ದು, ಈ ಸ್ಪರ್ಧೆಯಲ್ಲಿ ಭಾರತ ವೇಗವಾಗಿ ಕಾರ್ಯ ನಿರ್ವಹಿಸಬೇಕಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
500 ಕೋಟಿ ಬಂಡವಾಳ ಕೇಳಿದ IISC: ಈ ಯೋಜನೆಗೆ ಐದು ವರ್ಷಗಳ ಕಾಲ 500 ಕೋಟಿ ಬಂಡವಾಳ ಹೂಡಿಕೆ ಮಾಡುವಂತೆ ಐಐಎಸ್ಸಿ ಕೋರಿದ್ದು, ಈ ಉಪಕ್ರಮದ ಕಲ್ಪನೆ 2021 ರಲ್ಲಿ ಉದಯವಾಗಿದ್ದು, ಸೆಪ್ಟೆಂಬರ್ 2022ರಲ್ಲಿ ನೀತಿ ಆಯೋಗದಿಂದ ಬೆಂಬಲ ಪಡೆದಿದೆ ಎಂದು ಅದು ಪ್ರಾಥಮಿಕ ವರದಿಯಲ್ಲಿ ತಿಳಿಸಿದೆ.
ಈ ಯೋಜನೆಗೆ ಹಣಕಾಸು ಒದಗಿಸಿ ಯಶಸ್ವಿಯಾದರೆ, ಎಲೆಕ್ಟ್ರಾನಿಕ್ ಗ್ಯಾಜೆಟ್‌ಗಳ ಗಾತ್ರ ಕಡಿಮೆ ಮಾಡಬಹುದಾಗಿದೆ. ಅಲ್ಲದೇ ಮುಂದಿನ ಪೀಳಿಗೆಯ ಧರಿಸಬಹುದಾದ ಮತ್ತು ಅಳವಡಿಕೆ ಸಾಧನಕ್ಕೆ ದಾರಿಯಾಗಲಿದೆ. ಹಾಗೇ ಜಾಗತಿಕ ಸೆಮಿಕಂಡಕ್ಟರ್ ಪೂರೈಕೆಯ ಸರಪಳಿ ಬಲಗೊಳ್ಳುತ್ತದೆ ಎಂದು ವರದಿಯಲ್ಲಿ ಐಐಎಸ್ಸಿ ತಜ್ಞರು ಹೇಳಿದ್ದಾರೆ.
ಇದನ್ನೂ ಓದಿ: ಚೀನಾದ ನೆರೆಯ ದೇಶಕ್ಕೆ ತೆರಳಿತು ಬ್ರಹ್ಮೋಸ್‌ ಮಿಸೈಲ್; ಹೇಗಿದೆ ಗೊತ್ತಾ ಇದರ ಸಾಮರ್ಥ್ಯ?
ಇದನ್ನೂ ಓದಿ: ಆರ್ಯಭಟಗೆ ಸುವರ್ಣ ಮಹೋತ್ಸವ: ಭಾರತದ ಮೊದಲ ಉಪಗ್ರಹದ ಬಗ್ಗೆ ನಿಮಗೆಷ್ಟು ಗೊತ್ತು?
