Airtel Fraud Detection: ಭಾರತದ ಅತ್ಯಂತ ಜನಪ್ರಿಯ ಟೆಲಿಕಾಂ ಕಂಪನಿಗಳಲ್ಲಿ ಒಂದಾದ ಏರ್ಟೆಲ್ ಸದ್ಯ ಹೊಸ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ಪ್ರಾರಂಭಿಸಿದೆ. ಇದು ಏರ್‌ಟೆಲ್‌ನ ಹೊಸ ವ್ಯವಸ್ಥೆ. ಇದು ಇಂಟರ್ನೆಟ್‌ನಲ್ಲಿ ಅಪಾಯಕಾರಿ ವೆಬ್‌ಸೈಟ್‌ಗಳಿಂದ ಗ್ರಾಹಕರನ್ನು ರಕ್ಷಿಸುತ್ತದೆ. ಇದರಲ್ಲಿ ಒಟಿಟಿ ಅಪ್ಲಿಕೇಶನ್‌ಗಳು, ಸಾಮಾಜಿಕ ಮಾಧ್ಯಮ ವೇದಿಕೆಗಳು ಮತ್ತು ಸಂದೇಶ ಕಳುಹಿಸುವ ಅಪ್ಲಿಕೇಶನ್‌ಗಳು ಸೇರಿವೆ. ಇದು ಎಐ ಆಧಾರಿತ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ಆಗಿದೆ ಎಂದು ಏರ್ಟೆಲ್ ತನ್ನ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
ಏರ್ಟೆಲ್ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ಎಂದರೇನು?: ಈ ಹೊಸ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ವ್ಯವಸ್ಥೆಯು ಬಹು ಹಂತಗಳಲ್ಲಿ ಕಾರ್ಯನಿರ್ವಹಿಸುತ್ತದೆ ಎಂದು ಏರ್ಟೆಲ್ ಹೇಳಿದೆ. ಈ ವ್ಯವಸ್ಥೆಯು ಗ್ರಾಹಕರನ್ನು ಆನ್‌ಲೈನ್ ಸ್ಕ್ಯಾಮ್ಸ್ ಮತ್ತು ವಂಚನೆಗಳಿಂದ ರಕ್ಷಿಸುತ್ತದೆ. ಇದು ಇಂಟರ್ನೆಟ್‌ನಲ್ಲಿ ಅಪಾಯಕಾರಿ ವೆಬ್‌ಸೈಟ್‌ಗಳನ್ನು ಪತ್ತೆ ಹಚ್ಚುತ್ತದೆ ಮತ್ತು ಅವುಗಳನ್ನು ನಿರ್ಬಂಧಿಸುತ್ತದೆ.
ಏರ್ಟೆಲ್ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ OTT ಅಪ್ಲಿಕೇಶನ್‌ಗಳು, ಇಮೇಲ್ ಪ್ಲಾಟ್‌ಫಾರ್ಮ್‌ಗಳು, ವೆಬ್ ಬ್ರೌಸರ್‌ಗಳು, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್‌ನಂತಹ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳು ಹಾಗೂ ವಾಟ್ಸಾಪ್ ಮತ್ತು ಟೆಲಿಗ್ರಾಮ್‌ನಂತಹ ಸಂದೇಶ ಕಳುಹಿಸುವ ಪ್ಲಾಟ್‌ಫಾರ್ಮ್‌ಗಳೊಂದಿಗೆ ಕಾರ್ಯನಿರ್ವಹಿಸುತ್ತದೆ. ಇದರೊಂದಿಗೆ ಇದು ರಿಯಲ್-ಟೈಂ ಎಸ್ಎಮ್ಎಸ್ನಲ್ಲಿಯೂ ಕಾರ್ಯನಿರ್ವಹಿಸುತ್ತದೆ.
ಇದು ಹೇಗೆ ಕೆಲಸ ಮಾಡುತ್ತೆ?: ಏರ್ಟೆಲ್ ಬಳಕೆದಾರರು ಯಾವುದೇ ಅಪಾಯಕಾರಿ ವೆಬ್‌ಸೈಟ್‌ಗಳಿಗೆ ಭೇಟಿ ನೀಡಲು ಪ್ರಯತ್ನಿಸಿದಾಗ ಈ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ಆ ವೆಬ್‌ಸೈಟ್ ಅವರ ಸಾಧನದಲ್ಲಿ ಲೋಡ್ ಆಗುವುದನ್ನು ನಿರ್ಬಂಧಿಸುತ್ತದೆ. ಇದು ಅಪಾಯಕಾರಿ ವೆಬ್‌ಸೈಟ್ ಅನ್ನು ಪತ್ತೆಹಚ್ಚಿ ಅದು ತೆರೆಯುವುದನ್ನು ತಡೆಯುವುದಲ್ಲದೆ, ಆ ವೆಬ್‌ಸೈಟ್ ಅನ್ನು ಏಕೆ ನಿರ್ಬಂಧಿಸುತ್ತಿದೆ ಎಂಬುದನ್ನು ವಿವರಿಸುವ ಹೊಸ ಪೇಜ್ಗೆ ನಿಮ್ಮನ್ನು ಕರೆದೊಯ್ಯುತ್ತದೆ. ಏರ್ಟೆಲ್ ಫ್ರಾಡ್ ಡಿಟೆಕ್ಷನ್ ಸೊಲ್ಯೂಷನ್ ವ್ಯವಸ್ಥೆಯು ಈ ಸಂಪೂರ್ಣ ಪ್ರಕ್ರಿಯೆಯನ್ನು ರಿಯಲ್ ಟೈಂನಲ್ಲಿ ಮಾಡುತ್ತದೆ.
ಆ್ಯಕ್ಟಿವ್ ಮಾಡುವುದು ಹೇಗೆ?: ತನ್ನ ಹೊಸ ಎಐ ಭದ್ರತಾ ವ್ಯವಸ್ಥೆಯ ಕುರಿತು ಮಾತನಾಡಿದ ಏರ್ಟೆಲ್, ಇದು ಪ್ರಸ್ತುತ ಹರಿಯಾಣ ಪ್ರದೇಶದಲ್ಲಿ ವಾಸಿಸುವ ಬಳಕೆದಾರರಿಗೆ ಮಾತ್ರ ಲಭ್ಯವಿದೆ ಎಂದು ಹೇಳಿದೆ. ಆದರೂ, ಇದು ಶೀಘ್ರದಲ್ಲೇ ದೇಶಾದ್ಯಂತ ಬಿಡುಗಡೆಯಾಗಲಿದೆ ಎಂದು ತಿಳಿದುಬಂದಿದೆ. ಈ ವ್ಯವಸ್ಥೆಯು ಎಲ್ಲಾ ಏರ್ಟೆಲ್ ಮೊಬೈಲ್ ಮತ್ತು ಬ್ರಾಡ್‌ಬ್ಯಾಂಡ್ ಗ್ರಾಹಕರಿಗೆ ಯಾವುದೇ ಹೆಚ್ಚುವರಿ ಶುಲ್ಕವಿಲ್ಲದೆ ಲಭ್ಯವಿರುತ್ತದೆ ಎಂದು ಕಂಪನಿ ವಿವರಿಸಿದೆ. ಇದು ಲಭ್ಯವಾದಂತೆ ನಂತರದ ಬಳಕೆದಾರರಿಗೆ ಆಟೋಮೆಟಿಕ್ ಆಗಿ ಸಕ್ರಿಯಗೊಳ್ಳುತ್ತದೆ.
