Vaibhav Suryavanshi: ಸದ್ಯ ಎಲ್ಲರ ಬಾಯಲ್ಲಿ ಈಗ ವೈಭವ್ ಸೂರ್ಯವಂಶಿದ್ದೇ ಮಾತು. ನಿನ್ನೆ ಆಡಿದ ಆಕ್ರಮಣ ಆಟಕ್ಕೆ ಕ್ರಿಕೆಟ್ ದಿಗ್ಗಜರು ಮಾತ್ರವಲ್ಲದೇ ಇಡೀ ಕ್ರಿಕೆಟ್ ಅಭಿಮಾನಿಗಳೇ ಕಿರಿಯ ಕ್ರಿಕೆಟಿಗನನ್ನು ಕೊಂಡಾಡುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ವೈಭವ್ ಸೂರ್ಯವಂಶಿಗೆ ಭಾರತ ತಂಡದಲ್ಲಿ ಆಡುವ ಅವಕಾಶ ಸಿಗಬಹುದಾಗಿದೆ.
ರನ್ ಮಷಿನ್ ಆಗಬಹುದೇ ವೈಭವ್?: ಈ ಬಾರಿಯ ಐಪಿಎಲ್ನಲ್ಲಿ ಆಡಿರುವ ಮೂರು ಪಂದ್ಯಗಳಲ್ಲೇ ಇದು ಮೊದಲ ಸೆಂಚೂರಿ ಆಗಿದೆ. ಮೊದಲ ಬಾರಿಗೆ ಲಕ್ನೋ ಸೂಪರ್ ಜೆಂಟ್ಸ್ ವಿರುದ್ಧ ಕಣಕ್ಕಿಳಿದಿದ್ದ ವೈಭವ್ ಭರ್ಜರಿ ಬ್ಯಾಟ್ ಬೀಸಿದ್ದರು. ಪಾದಾರ್ಪಣೆ ಪಂದ್ಯದಲ್ಲೇ ಕೇವಲ 20 ಎಸೆತಗಳಲ್ಲಿ 34 ರನ್ ಗಳಿಸಿ ಎಲ್ಲರ ಮನ ಗೆದ್ದಿದ್ದರು.
ಬಳಿಕ ವೈಭವ್ ಆರ್ಸಿಬಿ ವಿರುದ್ಧ ತಮ್ಮ ಆಕ್ರಮಣಕಾರಿ ಬ್ಯಾಟಿಂಗ್ ಪ್ರದರ್ಶನ ಮಾಡಲಿಲ್ಲ. ಕೇವಲ 12 ಎಸೆತಕ್ಕೆ 16 ರನ್ ಗಳಿಸಿ ಪೆವಲಿಯನ್ ಹಾದಿ ಹಿಡಿದಿದ್ದರು. ಆದ್ರೆ ನಿನ್ನೆ ನಡೆದ ಪಂದ್ಯದಲ್ಲಿ ಕೇವಲ 17 ಎಸೆತಗಳಿಗೆ ಅರ್ಧ ಶತಕ ಗಳಿಸುವ ಮೂಲಕ ಈ ಬಾರಿಯ ಐಪಿಎಲ್ ನಲ್ಲಿ ಫಾಸ್ಟೆಸ್ಟ್ ಹಾಫ್ ಸೆಂಚೂರಿ ಗಳಿಸಿದರು.
ಇನ್ನು ಗುಜರಾತ್ ಟೈಟಾನ್ಸ್ ಬೌಲರ್ಗಳ ಬೆವರಿಳಿಸಿದ್ದ ಸೂರ್ಯವಂಶಿ ಕೇವಲ 35 ಎಸೆತಗಳಲ್ಲಿ 11 ಸಿಕ್ಸ್, 7 ಬೌಂಡರಿ ಬಾರಿಸುವ ಮೂಲಕ 101 ರನ್ ಗಳಿಸಿದ್ದಾರೆ. ಸೂರ್ಯವಂಶಿ ಆಟದ ಶೈಲಿ ನೆರೆದಿದ್ದ ಪ್ರೇಕ್ಷಕರಿಗೆ ಮಾತ್ರವಲ್ಲ ಕ್ರಿಕೆಟ್ ದಿಗ್ಗಜರಿಗೂ ಅಚ್ಚರಿ ಮೂಡಿಸಿತು. ಬೌಂಡರಿ, ಸಿಕ್ಸರ್ ಮೂಲಕ ಅಬ್ಬರಿಸಿ ಶತಕ ಗಳಿಸಿದ ಸೂರ್ಯವಂಶಿಗೆ ಅಭಿನಂದನೆಗಳ ಮಹಾಪೂರವೇ ಹರಿದು ಬರುತ್ತಿದೆ. ಸಾಮಾಜಿಕ ಜಾಲತಾಣದಲ್ಲಿ ಅವರ ಆಟದ ವಿಡಿಯೋಗಳು ವೈರಲ್ ಆಗ್ತಿದ್ದು, ಸಂಚಲನ ಮೂಡಿಸುತ್ತಿವೆ.
ಸದ್ಯ ನಮ್ಮ ಹೆಮ್ಮೆಯ ವಿರಾಟ್ ಕೊಹ್ಲಿಯನ್ನು ಎಲ್ಲರೂ ರನ್ ಮಷಿನ್ ಎಂದೇ ಕರೆಯುತ್ತಾರೆ. ಅವರ ಸಾಧನೆಗಳನ್ನು ಸರಿಗಟ್ಟುವುದು ಅಷ್ಟು ಸುಲಭದ ಮಾತಲ್ಲ. ಅವರು ಕ್ರೀಸ್ನಲ್ಲಿದ್ದಾಗ ಒಂದು ಕ್ಷಣ ಯೋಚಿಸಿ ಬೌಲರ್ಗಳನ್ನು ಬೌಲಿಂಗ್ ಮಾಡ್ತಾರೆ. ಕೊಹ್ಲಿ ಕೈಯಲ್ಲಿ ಬ್ಯಾಟ್ ಇದ್ರೆ ಸಾಕು ರನ್ಗಳ ಸುರಿ ಮಳೆಯೇ ನಡೆಯುತ್ತದೆ. ಈಗ ರನ್ ಮಷಿನ್ ರೂಪದಲ್ಲಿ ಸೂರ್ಯವಂಶಿ ಕಾಣುತ್ತಿದ್ದಾರೆ. ಕೇವಲ ಐಪಿಎಲ್ ನಲ್ಲಿ ಮೂರು ಪಂದ್ಯಗಳಾಡಿರುವ ಸೂರ್ಯವಂಶಿ ಒಟ್ಟು 147 ರನ್ ಗಳನ್ನು ಕಲೆ ಹಾಕಿದ್ದಾರೆ. ಇವರಿಗೆ ಮುಂದಿನ ದಿನಗಳಲ್ಲಿ ಭಾರತ ಕ್ರಿಕೆಟ್ ತಂಡದ 11 ರ ಬಳಗದಲ್ಲಿ ಆಡಲು ಅವಕಾಶ ಸಿಗಬಹುದಾಗಿದೆ.
ಓದಿ: ಪಠಾಣ್, ಹೆಡ್, ಮಿಲ್ಲರ್ ದಾಖಲೆ ಧೂಳಿಪಟ: 35 ಎಸೆತಗಳಲ್ಲಿ ಸೆಂಚೂರಿ ಬಾರಿಸಿದ 14ರ ಪೋರ!
