ಹೈದರಾಬಾದ್: ಜಪಾನ್ ಮಾದರಿಯಲ್ಲಿ ಭಾರತದಲ್ಲಿ ಹೈಸ್ಪೀಡ್ ರೈಲು ಯೋಜನೆಯು ವೇಗ ಪಡೆದುಕೊಂಡಿದೆ. ಇದಕ್ಕಾಗಿ ಕೃತಕ ಬುದ್ಧಿಮತ್ತೆ (ಎಐ), ಯಂತ್ರ ಕಲಿಕೆ (ಎಂಎಲ್), ಲೈಟ್ ಡಿಟೆಕ್ಷನ್ ಅಂಡ್ ರೇಂಜಿಂಗ್ (LiDAR) ಆಗುಮೆಂಟೆಡ್ ರಿಯಾಲಿಟಿ (AR), ವರ್ಚುಯಲ್ ರಿಯಾಲಿಟಿ (VR), ರೊಬೊಟಿಕ್ಸ್, ಡ್ರೋನ್‌ಗಳು, ಇತರ ಆಧುನಿಕ ನಿರ್ಮಾಣ ವಿಧಾನಗಳು ಮತ್ತು ತಂತ್ರಜ್ಞಾನವನ್ನು ಬಳಸಿಕೊಳ್ಳಲಾಗುತ್ತಿದೆ.
ಭಾರತದ ಮೊದಲ ಬುಲೆಟ್ ರೈಲು ಯೋಜನೆಯನ್ನು ಮಹಾರಾಷ್ಟ್ರ ಮತ್ತು ಗುಜರಾತ್ ಮಧ್ಯೆ ಆರಂಭಿಸಲಾಗಿದೆ. ಇದು 508 ಕಿಮೀ ಉದ್ದ ಹೊಂದಿದೆ. ಮಹಾರಾಷ್ಟ್ರದ ಮುಂಬೈ ಮತ್ತು ಗುಜರಾತ್‌ನ ಅಹಮದಾಬಾದ್‌ಗೆ ಇದು ಸಂಪರ್ಕಿಸುತ್ತದೆ. ಈ ಯೋಜನೆಯಿಂದ ಈ ಎರಡೂ ನಗರಗಳ ನಡುವಿನ ಪ್ರಯಾಣ ಸಮಯ 7-8 ಗಂಟೆಗಳಿಂದ ಸುಮಾರು 2-3 ಗಂಟೆಗೆ ಇಳಿಯಲಿದೆ.
ಯೋಜನೆಯಲ್ಲಿ ಜಪಾನ್ನ ಪಾತ್ರ ಹಿರಿದು: ಭಾರತದಲ್ಲಿ ಚಾಲ್ತಿಯಲ್ಲಿರುವ ಬುಲೆಟ್ ರೈಲು ಯೋಜನೆಗೆ ಜಪಾನ್ ಬೆಂಗಾವಲಾಗಿ ನಿಂತಿದೆ. ಹಣಕಾಸು ಮತ್ತು ತಾಂತ್ರಿಕ ಬೆಂಬಲ ನೀಡುತ್ತಿದೆ. ಇತ್ತೀಚೆಗೆ ಪ್ರಕಟಿಸಿದಂತೆ ಭಾರತಕ್ಕೆ ಯಾವುದೇ ವೆಚ್ಚವಿಲ್ಲದೇ ಎರಡು ಶಿಂಕನ್ಸೆನ್ ರೈಲು ಎಂಜಿನ್ಗಳನ್ನು (E5 ಮತ್ತು E3 ಸರಣಿ) ನೀಡುವುದಾಗಿ ಜಪಾನ್ ಹೇಳಿದೆ. ಈ ಎರಡೂ ಎಂಜಿನ್ಗಳು ಸದ್ಯ ಜಪಾನ್ನಲ್ಲಿ ಪ್ರಯೋಗಕ್ಕೆ ಒಳಪಟ್ಟಿವೆ. 2026 ಕ್ಕೆ ಭಾರತಕ್ಕೆ ಬರಲಿರುವ ಈ ವಾಹನಗಳು MAHSR ಕಾರಿಡಾರ್ ನಲ್ಲಿ ಪ್ರಾಯೋಗಿಕ ಸಂಚಾರ ನಡೆಸಲಿವೆ.
ಈ ಪ್ರಯೋಗವು ಮೇಕ್ ಇನ್ ಇಂಡಿಯಾ ಅಡಿ ಮುಂದಿನ ಪೀಳಿಗೆಯ E10 ಸರಣಿಯ ಶಿಂಕನ್ಸೆನ್ ರೈಲುಗಳ ಉತ್ಪಾದನೆಗೆ ನೆರವಾಗಲಿವೆ. ಬೆಂಗಳೂರು ಮೂಲದ ಭಾರತ್ ಅರ್ಥ್ ಮೂವರ್ಸ್ ಲಿಮಿಟೆಡ್ (BEML) ಸೆಪ್ಟೆಂಬರ್ 2025 ರ ವೇಳೆಗೆ ಸ್ಥಳೀಯವಾಗಿ ರೈಲುಗಳನ್ನು ತಯಾರಿಸಲು ಸಜ್ಜಾಗಿದೆ. ಡಿಸೆಂಬರ್ 2026 ರ ವೇಳೆಗೆ ಮುಂಬೈ-ಅಹಮದಾಬಾದ್ ಕಾರಿಡಾರ್ನಲ್ಲಿ ಅವುಗಳ ವೇಗ ಪರೀಕ್ಷೆ ನಡೆಯಲಿದೆ.
ಭಾರತೀಯ ಸಂಸ್ಥೆಯಿಂದ ಹಳಿ ನಿರ್ಮಾಣ: ಭಾರತದ ಮೊದಲ ಹೈ-ಸ್ಪೀಡ್ ರೈಲು ಕಾರಿಡಾರ್ಗೆ ಲಾರ್ಸೆನ್ & ಟೂಬ್ರೊ (ಎಲ್ & ಟಿ) ಸಂಸ್ಥೆಯು ಹಳಿ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿದೆ. ಹೈ-ಸ್ಪೀಡ್ ರೈಲಿಗಾಗಿ ಪ್ರಿಕಾಸ್ಟ್ ಸ್ಲ್ಯಾಬ್ ಟ್ರ್ಯಾಕ್ ವ್ಯವಸ್ಥೆ ಸೇರಿದಂತೆ ಜಪಾನ್ನ ಶಿಂಕನ್ಸೆನ್ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿದೆ. ಮಹಾರಾಷ್ಟ್ರ, ಗುಜರಾತ್, ದಾದ್ರಾ ಮತ್ತು ನಗರ ಹವೇಲಿಯಲ್ಲಿ ವಿದ್ಯುದೀಕರಣ, ಹಳಿ ನಿರ್ಮಾಣ ಮತ್ತು ಡಿಪೋ ಸ್ಥಾಪನೆ ಸೇರಿದಂತೆ ಬಹು ಹಂತಗಳಲ್ಲಿ ತನ್ನನ್ನು ತೊಡಗಿಸಿಕೊಂಡಿದೆ.
ಯೋಜನೆಯಲ್ಲಿ ತಂತ್ರಜ್ಞಾನದ ಬಳಕೆ: ಯೋಜನೆಯ ದಕ್ಷತೆ, ನಿಖರತೆ ಮತ್ತು ಸುರಕ್ಷತೆಯಲ್ಲಿ AI, ML, LiDAR, AR, VR, ಡ್ರೋನ್‌ಗಳು, ರೋಬೋಟ್‌ಗಳು ಮತ್ತು IoT ತಂತ್ರಜ್ಞಾನವನ್ನು ಸಾಧ್ಯಂತವಾಗಿ ಬಳಸಲಾಗುತ್ತಿದೆ. ಈ ತಂತ್ರಜ್ಞಾನಗಳು ದಕ್ಷತೆಯನ್ನು ಹೆಚ್ಚಿಸುತ್ತವೆ. ವೆಚ್ಚ ಮತ್ತು ಸಮಯವನ್ನು ಕಡಿಮೆ ಮಾಡುತ್ತವೆ. ಯೋಜನೆಯಲ್ಲಿ ಕಂಡು ಬರುವ ದೋಷಗಳನ್ನು ಶೇಕಡಾ 99.99 ರಷ್ಟು ಕಡಿಮೆ ಮಾಡುತ್ತವೆ.
ಯೋಜನೆಯ ದೂರ, ವೆಚ್ಚ: 1,08,000 ಕೋಟಿ ರೂಪಾಯಿ ಅಂದಾಜು ವೆಚ್ಚದಲ್ಲಿ MAHSR ಯೋಜನೆಯ ಮಾರ್ಗದಲ್ಲಿ 12 ನಿಲ್ದಾಣಗಳಿವೆ. ಇದರಲ್ಲಿ ಮಹಾರಾಷ್ಟ್ರದಲ್ಲಿ ನಾಲ್ಕು ಮತ್ತು ಗುಜರಾತ್‌ನಲ್ಲಿ ಎಂಟು ನಿಲ್ದಾಣಗಳು ಹೊಂದಿವೆ. ಈ ಕಾರಿಡಾರ್ ಮಹಾರಾಷ್ಟ್ರದಲ್ಲಿ 155.76 ಕಿಮೀ, ದಾದ್ರಾ ಮತ್ತು ನಗರ ಹವೇಲಿಯಲ್ಲಿ 4.3 ಕಿಮೀ ಮತ್ತು ಗುಜರಾತ್‌ನಲ್ಲಿ 348.04 ಕಿಮೀ ವ್ಯಾಪಿಸಲಿದೆ.
ಈ ಮಾರ್ಗದಲ್ಲಿ ಬುಲೆಟ್ ರೈಲು ಗಂಟೆಗೆ 320 ಕಿಮೀ ವೇಗದಲ್ಲಿ ಕಾರ್ಯನಿರ್ವಹಿಸಲಿದೆ. ಆರಂಭ ನಿಲ್ದಾಣದಿಂದ ಕೊನೆಯ ನಿಲ್ದಾಣದವರೆಗಿನ ದೂರವನ್ನು 2 ಗಂಟೆ 58 ನಿಮಿಷಗಳಲ್ಲಿ ಕ್ರಮಿಸುತ್ತದೆ.
ಇತರ ಹೈಸ್ಪೀಡ್ ಕಾರಿಡಾರ್‌ಗಳು: ರೈಲ್ವೆ ಸಚಿವಾಲಯವು ದೇಶದಲ್ಲಿ ಏಳು ಹೈಸ್ಪೀಡ್ ರೈಲು ಕಾರಿಡಾರ್‌ಗಳನ್ನು ಗುರುತಿಸಿದೆ.
- ದೆಹಲಿ-ವಾರಾಣಸಿ: 813 ಕಿ.ಮೀ
- ದೆಹಲಿ-ಅಹಮದಾಬಾದ್: 872 ಕಿ.ಮೀ
- ಮುಂಬೈ-ನಾಗ್ಪುರ: 767 ಕಿ.ಮೀ
- ಮುಂಬೈ-ಹೈದರಾಬಾದ್: 671 ಕಿ.ಮೀ
- ಚೆನ್ನೈ-ಬೆಂಗಳೂರು- ಮೈಸೂರು: 464 ಕಿ.ಮೀ
- ದೆಹಲಿ- ಚಂಡೀಗಢ- ಅಮೃತಸರ: 476 ಕಿ.ಮೀ
- ವಾರಾಣಸಿ- ಹೌರಾ: 752 ಕಿ.ಮೀ
