ರಾಯಚೂರು: ಹೋಟೆಲ್ವೊಂದರಲ್ಲಿ ಮದ್ಯ ಮತ್ತು ಧೂಮಪಾನಕ್ಕೆ ಅವಕಾಶ ನೀಡಿಲ್ಲವೆಂಬ ಕಾರಣಕ್ಕೆ ವ್ಯಕ್ತಿಯೋರ್ವ ಸಿಟ್ಟಿಗೆದ್ದು ಗಾಳಿಯಲ್ಲಿ ಗುಂಡು ಹಾರಿಸಿರುವ ಘಟನೆ ಜಿಲ್ಲೆಯ ಸಿಂಧನೂರಿನ ಶ್ರೀಪುರಂ ಜಂಕ್ಷನ್ ಹತ್ತಿರದ ಸಿರಿ ಫ್ಯಾಮಿಲಿ ರೆಸ್ಟೋರೆಂಟ್ನಲ್ಲಿ ನಡೆದಿದೆ.
ಕಲಬುರಗಿ ಮೂಲದ ಗುಂಡಪ್ಪ ಅಲಿಯಾಸ್ ಹನುಮಂತಪ್ಪ ಜೇಮಶೆಟ್ಟಿ ಎಂಬುವರು ಗಾಳಿಯಲ್ಲಿ ಗುಂಡು ಹಾರಿಸಿರುವ ಆರೋಪಿ. ಹನುಮಂತಪ್ಪ ತನ್ನ ಸಂಬಂಧಿಕರೊಂದಿಗೆ ಕೊಪ್ಪಳದ ಸಿದ್ದಾಪುರದಲ್ಲಿನ ಸಮಾರಂಭವೊಂದಕ್ಕೆ ತೆರಳಿದ್ದರು. ಸಮಾರಂಭ ಮುಗಿಸಿಕೊಂಡು ವಾಪಸಾಗುವ ವೇಳೆ ಸಿಂಧನೂರಿನ ಸಿರಿ ಫ್ಯಾಮಿಲಿ ರೆಸ್ಟೋರೆಂಟ್ಗೆ ತೆರಳಿದ್ದು, ಮದ್ಯ ಬಾಟಲಿಯನ್ನು ಟೇಬಲ್ನಲ್ಲಿರಿಸಿ, ಧೂಮಪಾನ ಮಾಡುತ್ತಿದ್ದರು ಎನ್ನಲಾಗ್ತಿದೆ. ಇದನ್ನು ಕಂಡ ಮಾಣಿ ಹನುಮಂತಪ್ಪ ಅವರಿಗೆ ಇದೆಲ್ಲಾ ಹೋಟೆಲ್ನಲ್ಲಿ ನಿಷೇಧ ಎಂದು ಹೇಳಿದ್ದಾನೆ. ಕೋಪಗೊಂಡ ಹನುಮಂತಪ್ಪ ಮಾಣಿಗೆ ಬೈದಿದ್ದು, ಹೋಟೆಲ್ ಮಾಲೀಕರೊಂದಿಗೂ ಜಗಳವಾಡಿದ್ದಾರಂತೆ. ಬಳಿಕ ರಿವಾಲ್ವಾರಿನಿಂದ ಗುಂಡು ಹಾರಿಸುವುದಾಗಿ ಬೆದರಿಕೆ ಹಾಕಿದ್ದು, ಕಾರಿನಿಂದ ರಿವಾಲ್ವರ್ ತೆಗೆದು ಗಾಳಿಯಲ್ಲಿ ಗುಂಡು ಹಾರಿಸಿದ್ದಾರೆ ಎಂದು ತಿಳಿದುಬಂದಿದೆ.
ಈ ವೇಳೆ ಹೆದರಿದ ಕೆಲವರು ಅಲ್ಲಿಂದ ಓಡಿ ಹೋಗಿದ್ದಾರೆ. ವಿಷಯ ತಿಳಿದ ಪೊಲೀಸರು ಸ್ಥಳಕ್ಕಾಗಮಿಸಿ ಹನುಮಂತಪ್ಪ ಅವರನ್ನು ಬಂಧಿಸಿದ್ದಾರೆ. ಸಿಂಧನೂರು ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿಯ ವಿರುದ್ಧ ಶಸ್ತ್ರಾಸ್ತ್ರ ಅಧಿನಿಯಮ ಉಲ್ಲಂಘನೆ 286, 504 ಐಪಿಸಿ ಸೇರಿದಂತೆ ಮೊಕದ್ದಮೆ ದಾಖಲಿಸಲಾಗಿದೆ. ಈ ವೇಳೆ ಆರೋಪಿ ಸಹ ಹೋಟೆಲ್ ಮಾಲೀಕರ ವಿರುದ್ಧ ಪ್ರತಿದೂರು ನೀಡಿದ್ದಾರೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: ಕಳಪೆ ಅಂಕ ಗಳಿಸಿದ್ದಾರೆ ಎಂದು ಪೋಷಕರಿಗೆ ದೂರು.. ಗರ್ಭಿಣಿ ಶಿಕ್ಷಕಿಯನ್ನು ಥಳಿಸಿದ ವಿದ್ಯಾರ್ಥಿಗಳು!
