ಮೈಸೂರು: ಡೇಟಿಂಗ್ಗೆ ಹುಡುಗಿಯರು ಸಿಗುತ್ತಾರೆ ಅಂತ ಡೇಟಿಂಗ್ ಆ್ಯಪ್ ಮೂಲಕ ಜಾಹೀರಾತು ನೀಡಿ ವಂಚಿಸುತ್ತಿದ್ದ ಆರೋಪಿಯನ್ನು ನಗರದ ಸೈಬರ್ ಕ್ರೈಂ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿ ಲೋಕ್ಯಾಂಟೋ ಆ್ಯಪ್ನಲ್ಲಿ ಯುವತಿಯರ ಫೋಟೋಗಳನ್ನು ಹಾಕುತ್ತಿದ್ದನಂತೆ.
'ಸಿಂಗಲ್ ಕಾಲೇಜು ಹುಡುಗಿಯರು ಸಿಗುತ್ತಾರೆ. ನಗ್ನ ವಿಡಿಯೋ ಕಾಲ್ ಸರ್ವಿಸ್ ಇದೆ. ಹುಡುಗಿಯರೇ ನೇರವಾಗಿ ನಿಮ್ಮನ್ನು ಭೇಟಿ ಮಾಡುತ್ತಾರೆ' ಎಂದೆಲ್ಲಾ ಸುಳ್ಳು ಜಾಹೀರಾತು ಹಾಕುತ್ತಿದ್ದ. ಹೀಗೆ ಸುಮಾರು 80 ರಿಂದ 100 ಜನರ ಬಳಿ 8 ಲಕ್ಷಕ್ಕೂ ಅಧಿಕ ಹಣ ಪಡೆದು ವಂಚಿಸಿದ್ದ ಬಗ್ಗೆ ಮಾಹಿತಿ ದೊರೆತ ಹಿನ್ನೆಲೆಯಲ್ಲಿ ಕೂಡಲೇ ಕಾರ್ಯಪ್ರವೃತ್ತರಾದ ಸೈಬರ್ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.
ಈತ ತಾನು ಸರ್ವಿಸ್ ನೀಡುವ ಮೊದಲು ಶೇ 50 ಹಣ ಪಾವತಿಸಬೇಕು ಎಂದು ನಿರ್ಬಂಧ ವಿಧಿಸುತ್ತಿದ್ದನಂತೆ. ಯುವತಿಯರ ಫೋಟೋ ನೋಡಿ ಕಾಮದಾಸೆಗೆ ಅದೆಷ್ಟೋ ಜನರು 50 ಪರ್ಸೆಂಟ್ ಹಣವನ್ನು ಫೋನ್ ಪೇ, ಗೂಗಲ್ ಪೇ ಹಾಗೂ ಆನ್ಲೈನ್ ಪೇಮೆಂಟ್ ಪಾವತಿಸುತ್ತಿದ್ದರು. ಆರೋಪಿ ಹಣ ಬಂದ ಮೇಲೆ ಫೋನ್ ರಿಸೀವ್ ಮಾಡುತ್ತಿರಲಿಲ್ಲ.
ಪೊಲೀಸರು ಆರೋಪಿಯಿಂದ ಲ್ಯಾಪ್‌ಟಾಪ್, 4 ಮೊಬೈಲ್ ವಶಪಡಿಸಿಕೊಂಡಿದ್ದು ತನಿಖೆ ಚುರುಕುಗೊಳಿಸಿದ್ದಾರೆ. ಪೊಲೀಸರು ಆರೋಪಿಯ ಹೆಸರು ಬಹಿರಂಗಪಡಿಸಿಲ್ಲ.
ಇದನ್ನೂ ಓದಿ: ಬಳ್ಳಾರಿ: ಅಪರಿಚಿತ ವಾಹನ ಡಿಕ್ಕಿಯಾಗಿ ಇಬ್ಬರು ಹೂ ವ್ಯಾಪಾರಿಗಳು ಸಾವು
