ದಾವಣಗೆರೆ: ಇಲ್ಲಿನ ಭಾಷಾ ನಗರದ ಮುಖ್ಯ ರಸ್ತೆಯ ಮಿಲ್ಲತ್ ಶಾಲೆ ಬಳಿ ಇರುವ ಎಸ್ಡಿಪಿಐ ಕಚೇರಿ ಮೇಲೆ ದಾಳಿ ನಡೆಸಿದ ಪೊಲೀಸರು ಪರಿಶೀಲನೆ ನಡೆಸಿ ಸೀಲ್ ಮಾಡಿದ್ದಾರೆ. ಈ ದಾಳಿ ಎಸಿ ದುರ್ಗಾಶ್ರೀ ನೇತೃತ್ವದಲ್ಲಿ ನಡೆಸಲಾಗಿದ್ದು, ಈ ಹಿಂದೆ ಪಿಎಫ್ಐ ಕಚೇರಿಯಾಗಿದ್ದ ಎಸ್ಡಿಪಿಐ ಕಚೇರಿಯಲ್ಲಿ ಪಿಎಫ್ಐ ಕಾರ್ಯ ಚಟುವಟಿಕೆ ಮಾಡುತ್ತಿದ್ದ ಹಿನ್ನೆಲೆ ದಾಳಿ ನಡೆಸಲಾಗಿದೆ.
ಇಡೀ ಕಚೇರಿ ತಪಾಸಣೆ ಮಾಡಿದ ಪೊಲೀಸರು ಬಳಿಕ ಸೀಲ್ ಮಾಡಿದ್ದಾರೆ. ಇನ್ನು ಎಸ್ಡಿಪಿಐ ಕಾರ್ಯಕರ್ತ ನಗರ ಸಮಿತಿ ಸದಸ್ಯ ಮೆಹಬೂಬ್ ಸುಬಾನಿ ಮನೆ ಕೂಡಾ ತಪಾಸಣೆ ಮಾಡಲಾಗಿದ್ದು, ಆತನ ಮನೆಯಲ್ಲಿ ಪಿಎಫ್ಐಗೆ ಸಂಬಂಧಪಟ್ಟ ಕೆಲ ದಾಖಲೆಗಳು ಪತ್ತೆಯಾಗಿವೆ. ಎಸ್ಡಿಪಿಐನ ಕಚೇರಿಯನ್ನು ಸೀಲ್ ಮಾಡುವ ಮೂಲಕ ಅದರ ಚಾವಿಯನ್ನು ಎಸಿ ದುರ್ಗಾಶ್ರೀಗೆ ಪೊಲೀಸರು ಹಸ್ತಾಂತರ ಮಾಡಿದ್ದಾರೆ.
ಪಿಎಫ್ಐ ಹಾಗೂ ಎಸ್ಡಿಪಿಐ ಮುಖಂಡರ ಮನೆ ಮೇಲೆ ದಾಳಿ: ದಾವಣಗೆರೆಯಲ್ಲಿ ಮತ್ತೆ ಪಿಎಫ್ಐ ಹಾಗೂ ಎಸ್ಡಿಪಿಐ ಮುಖಂಡರ ಮನೆ ಮೇಲೆ ದಾಳಿ ಮಾಡಲಾಗಿದೆ. ದಾವಣಗೆರೆ ಜಿಲ್ಲೆಯ ಹರಿಹರ ಪಟ್ಟಣದ ಎಸ್ಡಿಪಿಐ ಮುಖಂಡರಾದ ಕಾಳಿದಾಸ ನಗರದ ಫಯಾಜ್ ಅಹ್ಮದ್, ಕೇಶವ ನಗರದ ಸೈಯದ್ ಅಶ್ಫಾಕ್ ಮನೆ ಮೇಲೆ ದಾಳಿ ನಡೆಸಿ ಪರಿಶೀಲನೆ ನಡೆಸಲಾಗಿದೆ.
ಗ್ರಾಮಾಂತರ ಡಿವೈಎಸ್ಪಿ ಕನ್ನಿಕಾ ಸಿಕ್ರಿವಾಲ್ ನೇತೃತ್ವದಲ್ಲಿ ದಾಳಿ ನಡೆಸಲಾಗಿದ್ದು, ಇಬ್ಬರ ಮನೆಗಳನ್ನು ಶೋಧ ಮಾಡಲಾಗಿದೆ. ಪೊಲೀಸರಿಗೆ ಸಿಗದೇ ಇಬ್ಬರು ಎಸ್ಡಿಪಿಐ ಮುಖಂಡರಾದ ಫಯಾಜ್ ಅಹ್ಮದ್ ಹಾಗೂ ಸೈಯದ್ ಅಶ್ಫಾಕ್ ನಾಪತ್ತೆಯಾಗಿದ್ದಾರೆ. ಕಳೆದ ವಾರ ಪಿಎಫ್ಐ ಮುಖಂಡ ತಾಹೀರ್ ಹುಸೇನ್ ನಾಪತ್ತೆಯಾಗಿದ್ದ. ಇದೀಗ ಮೂವರಿಗಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ.
