ಮಂಗಳೂರಿನ ಶಾರಾದೆಗೆ ಸ್ವರ್ಣ ಲೇಪಿತ ಸೀರೆ.. ಸಾಮರಸ್ಯ ಮೂಡಿಸಿದ ವಾರಾಣಸಿಯ ನೂರುಲ್ಲಾ ಅಮೀನ್

ಮಂಗಳೂರು: ನವರಾತ್ರಿ ಆಚರಣೆಯ ವೇಳೆ ಮಂಗಳೂರಿನ ಶಾರದೆಗೆ ತೊಡಿಸಲು ವಾರಾಣಸಿಯ ನೂರುಲ್ಲಾ ಅಮೀನ್ ಅವರು ತಯಾರಿಸಿದ ಸೀರೆಯೊಂದು ಸಿದ್ದವಾಗಿದೆ.

ಮಂಗಳೂರಿನ ರಥಬೀದಿಯ ಶ್ರೀ ವೆಂಕಟರಮಣ ದೇವಸ್ಥಾನ ಆಚಾರ್ಯ ಮಠ ವಠಾರದಲ್ಲಿ ನಡೆಯುವ ಶಾರಾದೋತ್ಸವಕ್ಕೆ ಈ ಬಾರಿ ನೂರನೇ ವರುಷ ತುಂಬುತ್ತಿದೆ. ಶತಮಾನೋತ್ಸವ ಆಚರಣೆಯ ಶಾರದೋತ್ಸವವನ್ನು ವಿಜೃಂಭಣೆಯಿಂದ ಆಚರಿಸಲು ಸಿದ್ದತೆಗಳು ನಡೆಯುತ್ತಿದೆ. ಈ ಶಾರದೋತ್ಸವದಲ್ಲಿ ಕೊನೆಯ ದಿನ ಶಾರದೆಗೆ ತೊಡಿಸಲಾಗುವ ಸೀರೆ ಈ ಬಾರಿ ವಿಶೇಷ ಕಾರಣಕ್ಕೆ ಸುದ್ದಿಯಾಗಿದೆ. ಮಂಗಳೂರಿನ ಈ ಶಾರದೆಗೆ ಮಂಗಳೂರಿನ ಕುಲ್ಯಾಡಿಕರ್ ನೂತನ್ ಸಿಲ್ಕ್ ಮಾಲೀಕ ಸುಧೀರ್ ಪೈ ಪ್ರತಿ ವರ್ಷ ಸೀರೆಯನ್ನು ಕೊಡುಗೆಯಾಗಿ ನೀಡುತ್ತಾರೆ.

ಸುಧೀರ್ ಪೈ ಅವರ ತಾಯಿ ಅವರು 1988 ರಲ್ಲಿ ನಿಧನರಾಗಿದ್ದು, ಅವರ ನೆನಪಿಗೆ ಅಂದಿನಿಂದ ಪ್ರತಿ ವರ್ಷ ಶಾರದೆಗೆ ಇವರು ಸೀರೆಯನ್ನು ನೀಡುತ್ತಾರೆ. ಈ ಬಾರಿ ಶತಮಾನೋತ್ಸವವಾಗಿರುವುದರಿಂದ ಈ ಬಾರಿ ನೀಡಲಾಗುವ ಸೀರೆಯನ್ನು ಬಂಗಾರದ ಲೇಪನದೊಂದಿಗೆ ನೀಡಲಾಗಿದೆ. ಕಡುಹಸಿರು ಬಣ್ಣದ ಈ ಬನಾರಸ್ ಸೀರೆಗೆ ಬಂಗಾರದಿಂದ ಡಿಸೈನ್ ಮಾಡಲಾಗಿದೆ. ಸೀರೆಯ ಮೇಲೆ ಸುಮಾರು 2600 ಹೂವುಗಳ ಚಿತ್ರವನ್ನು ಬಂಗಾರದಿಂದ ಮಾಡಲಾಗಿದೆ.

ನಾಲ್ಕು ಜನರ ತಂಡದಿಂದ ಕೆಲಸ: ಇದರ ಜೊತೆಗೆ ಬೆಳ್ಳಿಯನ್ನು ಬಳಸಲಾಗಿದೆ. ಒಟ್ಟು ಈ ಸೀರೆಯಲ್ಲಿ 11 ಪವನ್ (88 ಗ್ರಾಂ) ಚಿನ್ನ, 700 ಗ್ರಾಂ ಬೆಳ್ಳಿಯನ್ನು ಹಾಕಲಾಗಿದೆ. ಈ ಸೀರೆಗೆ ಸುಮಾರು 8 ಲಕ್ಷ ರೂ ಖರ್ಚಾಗಿದೆ. ಈ ಬನಾರಸ್ ಸೀರೆಯನ್ನು ವಾರಾಣಸಿಯ ನುರಿತ ಸೀರೆ ತಯಾರಿಕರಿಂದ ಮಾಡಲಾಗಿದೆ. ವಾರಾಣಸಿಯ ನೂರುಲ್ಲಾ ಅಮೀನ್ ಎಂಬುವರು ಈ ಸೀರೆಯನ್ನು ತಯಾರಿಸಿದ್ದಾರೆ. ಈ ಸೀರೆಗೆ ನೂರಲ್ಲ ಅಮೀನ್ ಅವರ ನಾಲ್ಕು ಜನರ ತಂಡ ಕೆಲಸ ಮಾಡಿದೆ.

ಮೆಚ್ಚುಗೆಗೆ ಪಾತ್ರವಾದ ಕೆಲಸ: ಈ ಸೀರೆಗೆ ಚಿನ್ನವನ್ನು ಹಾಕುವ ಕಾರ್ಯವನ್ನು ನೂರುಲ್ಲಾ ಅಮೀನ್ ಅವರ ತಂಡ ಮಂಗಳೂರಿನಲ್ಲಿ ಎರಡು ದಿನಗಳ ಕಾಲ ಮಾಡಿ ತೆರಳಿದೆ. ಸಮುದಾಯಗಳ ನಡುವೆ ಸಾಮರಸ್ಯ ಕದಡುತ್ತಿರುವ ಘಟನೆಗಳು ಆತಂಕ ಸೃಷ್ಟಿಸುತ್ತಿರುವ ನಡುವೆ ಹಿಂದೂಗಳು ಆರಾಧಿಸುವ ಶಾರದೆಗೆ ತೊಡಿಸುವ ಸೀರೆಗೆ ಮುಸ್ಲಿಂ ಸಮುದಾಯದ ವ್ಯಕ್ತಿಯೊಬ್ಬರು ಸೀರೆ ತಯಾರಿಸಿದ್ದು ಮೆಚ್ಚುಗೆಗೆ ಪಾತ್ರವಾಗಿದೆ.

ಓದಿ: ಕೆಲವೇ ದಿನದಲ್ಲಿ ಹೈಕಮಾಂಡ್ ಅನುಮತಿ ಪಡೆದು ಸಂಪುಟ ವಿಸ್ತರಣೆ ಮಾಡುತ್ತೇವೆ: ಸಿಎಂ ಬೊಮ್ಮಾಯಿ‌