ಚೆನ್ನೈ: ಜುಲೈ-ಆಗಸ್ಟ್‌ನಲ್ಲಿ ನಡೆಯಲಿರುವ 44ನೇ ಚೆಸ್ ಒಲಿಂಪಿಯಾಡ್‌ಗೂ ಮುನ್ನ ಇದೇ ಮೊದಲ ಬಾರಿಗೆ ಒಲಿಂಪಿಕ್ ಮಾದರಿಯ ಟಾರ್ಚ್ ರಿಲೇಯನ್ನು ನಡೆಸಲಾಗುವುದು. ಇನ್ನು ಮುಂದೆ ಈ ಪ್ರತಿಷ್ಠಿತ ಚೆಸ್ ಒಲಿಂಪಿಯಾಡ್ ಸಮಾರಂಭದಲ್ಲಿ ಟಾರ್ಚ್ ರಿಲೇ ಯಾವಾಗಲೂ ಇರಲಿದೆ. ಇದು ಇನ್ಮುಂದೆ ಚೆಸ್‌ನ ಜನ್ಮಸ್ಥಳವಾದ ಭಾರತದಿಂದ ಪ್ರಾರಂಭವಾಗಿ ಎಲ್ಲ ದೇಶಗಳಲ್ಲಿ ಪ್ರಯಾಣಿಸಿ ಬಳಿಕ ಸಮಾರಂಭ ನಡೆಯುವ ಸ್ಥಳಕ್ಕೆ ತಲುಪುತ್ತದೆ ಎಂದು ಕ್ರೀಡೆಯ ವಿಶ್ವ ಆಡಳಿತ ಮಂಡಳಿ FIDE ಘೋಷಿಸಿದೆ.
ಸಮಯದ ಕೊರತೆಯಿಂದಾಗಿ ಈ ಬಾರಿ ಟಾರ್ಚ್ ರಿಲೇಯನ್ನು ಭಾರತದಲ್ಲಿ ಮಾತ್ರ ನಡೆಸಲಾಗುವುದು. ದಿಗ್ಗಜ ವಿಶ್ವನಾಥನ್ ಆನಂದ್ ಇದರಲ್ಲಿ ಭಾಗವಹಿಸುವವರಲ್ಲಿ ಒಬ್ಬರಾಗಿದ್ದಾರೆ. ಈ ಕ್ರಮದಿಂದ ಚೆಸ್ ಆಟವನ್ನು ಜನಪ್ರಿಯಗೊಳಿಸಲು ಮತ್ತು ಪ್ರಪಂಚದಾದ್ಯಂತದ ಅಭಿಮಾನಿಗಳ ಬೆಂಬಲ ಹೆಚ್ಚಿಸಲು ಸಹಾಯ ಮಾಡುತ್ತದೆ ಎಂದು FIDE ಅಧ್ಯಕ್ಷ ಅರ್ಕಾಡಿ ಡ್ವೊರ್ಕೊವಿಚ್ ಹೇಳಿದ್ದಾರೆ.
ಇದನ್ನೂ ಓದಿ: ಸಿಡಬ್ಲ್ಯುಜಿ ತಂಡಕ್ಕೆ ಮತ್ತೆ ಸೇರ್ಪಡೆಗೊಂಡ ಟೇಬಲ್‌ ಟೆನಿಸ್ ಆಟಗಾರ್ತಿ ದಿಯಾ ಚಿತಾಲೆ
ಟಾರ್ಚ್ ರಿಲೇಯ ದಿನಾಂಕ ಮತ್ತು ಮಾರ್ಗಗಳನ್ನು ಸರ್ಕಾರ, FIDE ಮತ್ತು ಇತರ ಮಧ್ಯಸ್ಥಗಾರರೊಂದಿಗೆ ಸಮಾಲೋಚಿಸಿದ ನಂತರ ಶೀಘ್ರದಲ್ಲೇ ಪ್ರಕಟಿಸಲಾಗುವುದು ಎಂದು ಒಲಿಂಪಿಯಾಡ್ ಈವೆಂಟ್ ನಿರ್ದೇಶಕ ಭರತ್ ಸಿಂಗ್ ಚೌಹಾಣ್ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಚೆನ್ನೈ ಒಲಿಂಪಿಯಾಡ್‌ಗೆ ಇನ್ನೂ ಕೇವಲ 50 ದಿನಗಳು ಬಾಕಿ ಇವೆ. ಒಲಿಂಪಿಯಾಡ್ ಟಾರ್ಚ್ ರಿಲೇಯಲ್ಲಿ ವೀಕ್ಷಿಸಿ, ಹುರಿದುಂಬಿಸಿ ಮತ್ತು ನನ್ನೊಂದಿಗೆ ಸೇರಿಕೊಳ್ಳಿ ಎಂದು ಆನಂದ್ ಟ್ವೀಟ್ ಮಾಡಿದ್ದಾರೆ.
44ನೇ ಚೆಸ್ ಒಲಿಂಪಿಯಾಡ್ ಮಹಾಬಲಿಪುರಂನಲ್ಲಿ ಜುಲೈ 28 ರಿಂದ ಆಗಸ್ಟ್ 10 ರವರೆಗೆ ನಡೆಯಲಿದೆ. 187 ದೇಶಗಳ ದಾಖಲೆಯ 343 ತಂಡಗಳು ಈಗಾಗಲೇ ಓಪನ್ ಮತ್ತು ಮಹಿಳಾ ವಿಭಾಗದಲ್ಲಿ ಪಂದ್ಯಾವಳಿಗೆ ಪ್ರವೇಶಿಸಿವೆ.
