ಭುವನೇಶ್ವರ(ಒಡಿಶಾ): ಎಫ್‌ಐಎಚ್ ಪುರುಷರ ಹಾಕಿ ವಿಶ್ವಕಪ್‌ನಲ್ಲಿ ಭಾರತ ತಂಡ ಇಂದು ನ್ಯೂಜಿಲೆಂಡ್ ವಿರುದ್ಧ ಸೆಣಸಿದೆ. ಕಳಿಂಗ ಕ್ರೀಡಾಂಗಣದಲ್ಲಿ ನಡೆದ ಪೂಲ್ ಡಿ ಪಂದ್ಯದಲ್ಲಿ ಉಭಯ ತಂಡಗಳು ನಿಗದಿತ ಅವಧಿಯ ಅಂತ್ಯಕ್ಕೆ 3-3 ಗೋಲುಗಳಿಂದ ಸಮಬಲ ಸಾಧಿಸಿದ್ದವು. ಆ ಬಳಿಕ ಪಂದ್ಯ ಪೆನಾಲ್ಟಿ ಶೂಟೌಟ್ ತಲುಪಿತು. ಅಲ್ಲಿ ನ್ಯೂಜಿಲೆಂಡ್ ಭಾರತವನ್ನು 5-4 ಅಂತರದಿಂದ ಸೋಲಿಸಿತು. ಜನವರಿ 24 ರಂದು ನಡೆಯಲಿರುವ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ನ್ಯೂಜಿಲೆಂಡ್ ಹಾಲಿ ಚಾಂಪಿಯನ್ ಬೆಲ್ಜಿಯಂ ತಂಡವನ್ನು ಎದುರಿಸಲಿದೆ.

ಮೊದಲ ಕ್ವಾರ್ಟರ್‌ ಮುಗಿದ ನಂತರ ಉಭಯ ತಂಡಗಳು 0-0 ಗೋಲುಗಳ ಸಮಬಲದಲ್ಲಿದ್ದವು. ಮೊದಲ ಕ್ವಾರ್ಟರ್‌ನಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಸಿಕ್ಕರೂ ಅದನ್ನು ಗೋಲಾಗಿ ಪರಿವರ್ತಿಸಲು ತಂಡಕ್ಕೆ ಸಾಧ್ಯವಾಗಲಿಲ್ಲ. ಟ್ಯಾಕಲ್ ಸಮಯದಲ್ಲಿ ಆಕ್ರಮಣಕಾರಿ ನಡೆಯನ್ನು ತೋರಿಸಿದ ಮನ್‌ಪ್ರೀತ್ ಸಿಂಗ್‌ಗೆ ರೆಫರಿ ಗ್ರೀನ್ ಕಾರ್ಡ್ ತೋರಿಸಿದರು. ಇದಕ್ಕೂ ಮೊದಲು 7ನೇ ನಿಮಿಷದಲ್ಲಿ ನ್ಯೂಜಿಲೆಂಡ್​ನ ವುಡ್ ಅವರ ಆಕ್ರಮಣಕಾರಿ ಆಟಕ್ಕೆ ಗ್ರೀನ್​ ಕಾರ್ಡ್​ ಪ್ರದರ್ಶಿಸಲಾಗಿತ್ತು.

ಎರಡನೇ 15 ನಿಮಿಷದ ಆಟ ಆರಂಭವಾಗುತ್ತಿದ್ದಂತೆ ಭಾರತ ಆಕ್ರಮಣಕಾರಿ ಆಟಕ್ಕೆ ಮುಂದಾಯಿತು. ಎರಡನೇ ಕ್ವಾರ್ಟರ್​ನ 2ನೇ ನಿಮಿಷದಲ್ಲಿ ಶಂಶೇರ್ ನೀಡಿದ ಪಾಸ್​ನ್ನು ಉಪಾದ್ಯಯ ಲಲಿತ್​ ಕುಮಾರ್​ ಗೋಲ್​ ಮಾಡಿದರು. 17ನೇ ನಿಮಿಷದಲ್ಲಿ ಭಾರತ ಮುನ್ನಡೆ ಸಾಧಿಸಿತು. ಮೊದಲ ಗೋಲ್​ಗಳಿಸಿದ 7ನೇ (24) ನಿಮಿಷದಲ್ಲಿ ಭಾರತಕ್ಕೆ ಪೆನಾಲ್ಟಿ ಕಾರ್ನರ್ ಸುಖಜಿತ್ ಸಿಂಗ್ ಗೋಲ್​ ಆಗಿ ಪರಿವರ್ತಿಸಿದರು. ಈ ಪಂದ್ಯದಲ್ಲಿ ಟೀಂ ಇಂಡಿಯಾ 2-0 ಮುನ್ನಡೆಸಾಧಿಸಿತು. ನ್ಯೂಜಿಲೆಂಡ್ ಪರ ಸ್ಯಾಮ್ ಲೇನ್ 28 ನೇ ನಿಮಿಷದಲ್ಲಿ ಮೊದಲ ಗೋಲು ದಾಖಲಿಸಿದರು. ಮೊದಲಾರ್ಧ ಮುಗಿಯುವಾಗ ಭಾರತ 2-1ರ ಮುನ್ನಡೆ ಗಳಿಸಿತ್ತು.

ಮೂರನೇ ಕ್ವಾರ್ಟರ್​ನಲ್ಲಿ ಉಭಯ ತಂಡಗಳು ತಲಾ ಒಂದು ಗೋಲ್ ದಾಖಲಿಸಿದವು. ​40ನೇ ನಿಮಿಷದಲ್ಲಿ ಭಾರತಕ್ಕೆ ಮತ್ತೊಂದು ಪೆನಾಲ್ಟಿ ಕಾರ್ನರ್ ಸಿಕ್ಕಿತು. ಈ ಮೂಲಕ ಟೀಂ ಇಂಡಿಯಾ ಭರ್ಜರಿ ಗೋಲು ದಾಖಲಿಸಿತು. ಈ ಪೆನಾಲ್ಟಿ ಕಾರ್ನರ್​ನಲ್ಲಿ ವರುಣ್ ಕುಮಾರ್ ಅದ್ಭುತ ಗೋಲು ದಾಖಲಿಸಿದರು. 43 ನೇ ನಿಮಿಷದಲ್ಲಿ ಕಿವೀಸ್​ನ ಕೆನ್ ರಸೆಲ್​ ಪೆನಾಲ್ಟಿಯನ್ನು ಗೋಲ್​ ಮಾಡಿದರು. ಈ ಪಂದ್ಯದಲ್ಲಿ ಟೀಂ ಇಂಡಿಯಾ 3-2 ಮುನ್ನಡೆ ಸಾಧಿಸಿತು.

ಕೊನೆಯ ಕ್ವಾರ್ಟರ್​ನಲ್ಲಿ ನ್ಯೂಜಿಲೆಂಡ್​ ಒಂದು ಗೋಲ್​​ ಗಳಿಸಿ ಸಮಬಲ ಸಾಧಿಸಿತು ಮತ್ತು ಭಾರತಕ್ಕೆ 15 ನಿಮಿಷದಲ್ಲಿ ಒಂದೂ ಗೋಲ್​ ಗಳಿಸಿಲು ಸಾಧ್ಯವಾಗದಂತೆ ಕಿವೀಸ್​ ಗೋಲ್​​ನ್ನು ಕಾಪಾಡಿಕೊಂಡಿತು. ಇದರಿಂದ ಪಂದ್ಯ 3-3ರಲ್ಲಿ ಅಂತ್ಯವಾಯಿತು. ಕೊನೆಯ ಕ್ವಾರ್ಟರ್​ನಲ್ಲಿ ಭಾರತಕ್ಕೆ ಎರಡು ಪೆನಾಲ್ಟಿಗಳು ಸಿಕ್ಕಿದರೂ ಸೂಕ್ತವಾಗಿ ಬಳಸಿಕೊಳ್ಳುವಲ್ಲಿ ವಿಫಲವಾಯಿತು.

ಪೆನಾಲ್ಟಿ ಶೂಟೌಟ್​ನಲ್ಲಿ ಟೈ: ಪಂದ್ಯ ಟೈ ಆದ ನಂತರ ಪೆನಾಲ್ಟಿ ಶೂಟೌಟ್​ಗೆ ತಂಡಗಳು ಕಣಕ್ಕಿಳಿದವು. ಪೆನಾಲ್ಟಿಯ ಮೊದಲ ಬಾಲ್​ನ್ನು ನಾಯಕ ಹರ್ಮನ್‌ಪ್ರೀತ್ ಸಿಂಗ್ ಯಶಸ್ವಿಯಾಗಿ ಗುರಿ ಮುಟ್ಟಿಸಿದರು. ನಂತರ ರಾಜ್‌ಕುಮಾರ್, ಸುಖಜೀತ್ ಸಿಂಗ್ ಗೋಲ್​ ಪಡೆದುಕೊಂಡರು. ಆದರೆ ನಡುವಿನಲ್ಲಿ ಶಂಶೇರ್ ಸಿಂಗ್ ಮತ್ತು ಅಭಿಷೇಕ್ ಗೋಲ್​ ಮಾಡುವಲ್ಲಿ ವಿಫಲರಾದರು. ಕಿವೀಸ್​ ಪರ ಕೇನ್ ರಸೆಲ್, ಸೀನ್ ಫೈಂಡ್ಲೇ, ಹೇಡನ್ ಗೋಲ್​ಗಳಿಸಿ ಸಮಬಲ ಮಾಡಿದರು. ಮತ್ತೆ ಸಿಕ್ಕ ಅವಕಾಶದಲ್ಲಿ ಭಾರತ ಸತತ ವಿಫಲ ಕಂಡು ಒಂದು ಗೋಲ್​ ಗಳಿಸಿತು. ಇದರಿಂದ ನ್ಯೂಜಿಲೆಂಡ್​ 4-5ರಿಂದ ಗೆಲುವು ಸಾಧಿಸಿತು.

ಭಾರತ ಆಟಗಾರರು: ಹರ್ಮನ್‌ಪ್ರೀತ್ (ನಾಯಕ), ಶ್ರೀಜೇಶ್ (ಗೋಲ್​ ಕೀಪರ್​), ಸುರೇಂದರ್, ಮನ್‌ಪ್ರೀತ್, ಮಂದೀಪ್, ಶಂಶೇರ್, ವರುಣ್, ರಾಜ್ ಕುಮಾರ್, ರೋಹಿದಾಸ್, ವಿವೇಕ್ ಸಾಗರ್, ಸುಖಜೀತ್

ನ್ಯೂಜಿಲೆಂಡ್ ಆಟಗಾರರು: ವುಡ್ಸ್ (ನಾಯಕ), ಡಿಕ್ಸನ್ (ಗೋಲ್​ ಕೀಪರ್​), ಲೆಟ್, ಚೈಲ್ಡ್, ಕಿಂಗ್‌ಸ್ಟೋನ್, ಲೇನ್, ಸರಿಕಾಯಾ, ರಸ್ಸೆಲ್, ಟ್ಯಾರಂಟ್, ಫೈಂಡ್ಲೇ, ಫಿಲಿಪ್ಸ್.

ಇದನ್ನೂ ಓದಿ:ಕ್ರಾಸ್​ ಓವರ್​ನಲ್ಲಿ ಭಾರತಕ್ಕೆ ಕಿವೀಸ್​ ಎದುರಾಳಿ: ಗೆದ್ದರಷ್ಟೇ ಪ್ರಶಸ್ತಿ ಸುತ್ತಿಗೆ..