ದುಬೈ : ಮುಂದಿನ ವಾರದಿಂದ ಒಮಾನ್ ಮತ್ತು ಯುಎಇಯಲ್ಲಿ ಆರಂಭವಾಗಲಿರುವ ಐಸಿಸಿ ಟಿ20 ವಿಶ್ವಕಪ್ನಲ್ಲಿ ಚಾಂಪಿಯನ್ ಆಗುವ ತಂಡ 12 ಕೋಟಿ ರೂ (1.6 ಮಿಲಿಯನ್ ಯುಎಸ್ಡಿ) ಮತ್ತು ರನ್ನರ್ ಅಪ್ ಆಗುವ ತಂಡ ಅದರಲ್ಲಿ ಅರ್ಧದಷ್ಟು ಪಡೆಯಲಿದೆ ಎಂದು ಭಾನುವಾರ ಐಸಿಸಿ ಘೋಷಿಸಿದೆ.
ಅಕ್ಟೋಬರ್ 17ರಿಂದ ನವೆಂಬರ್ 14ರವರೆಗೆ ನಡೆಯಲಿರುವ ಚುಟುಕು ಮಹಾ ಕದನದಲ್ಲಿ ಆಡುವ 16 ತಂಡಗಳು ಒಟ್ಟು 42 ಕೋಟಿ ರೂ.(5.6 ಮಿಲಿಯನ್ ಯುಎಸ್ಡಿ) ಮೊತ್ತವನ್ನು ಹಂಚಿಕೊಳ್ಳಲಿವೆ.
ಚಾಂಪಿಯನ್ ತಂಡ 12 ಕೋಟಿ, ರನ್ನರ್ ಅಪ್ ತಂಡ 6 ಕೋಟಿ ರೂ. ಪಡೆದರೆ, ಸೆಮಿಫೈನಲ್ಸ್ನಲ್ಲಿ ಸೋಲುವ ತಂಡಗಳು ತಲಾ 3 ಕೋಟಿ ರೂ.(4,00,000 ಯುಎಸ್ಡಿ) ಪಡೆಯಲಿವೆ ಎಂದು ಐಸಿಸಿ ಹೇಳಿಕೆಯಲ್ಲಿ ತಿಳಿಸಿದೆ.
2016ರ ವಿಶ್ವಕಪ್ನಿಂದ ಸೂಪರ್ 12ನಲ್ಲಿ ತಂಡಗಳು ಗೆಲ್ಲುವ ಪ್ರತಿಯೊಂದು ಪಂದ್ಯಕ್ಕೂ ಬೋನಸ್ ಸಿಗಲಿದೆ. ಒಟ್ಟು 30 ಪಂದ್ಯಗಳು ನಡೆಯಲಿದ್ದು, ಪ್ರತಿಯೊಂದು ಪಂದ್ಯ ಗೆದ್ದ ತಂಡ 40,000 ಡಾಲರ್ (30 ಲಕ್ಷರೂ) ಪಡೆಯಲಿವೆ. ಇದಕ್ಕಾಗಿ ಒಟ್ಟು 12 ಲಕ್ಷ ಡಾಲರ್(9 ಕೋಟಿ ರೂ.) ಮೀಸಲಿಡಲಾಗಿದೆ.
ಇನ್ನು, ಕ್ವಾರ್ಟರ್ ಫೈನಲ್ ಪ್ರವೇಶಿಸುವ ತಂಡಗಳಿಗೆ 5,60,000 ಡಾಲರ್ ಮೀಸಲಿಡಲಾಗಿದೆ. 8 ತಂಡಗಳೂ ತಲಾ 70 ಸಾವಿರ ಡಾಲರ್ ಪಡೆಯಲಿವೆ. ಮೊದಲ ಸುತ್ತಿನಲ್ಲಿ ಗೆಲ್ಲುವ ತಂಡಗಳು ಕೂಡ 40 ಸಾವಿರ ಯುಎಸ್ಡಿ ಪಡೆಯಲಿವೆ. ಇನ್ನು, ಮೊದಲ ಸುತ್ತಿನಲ್ಲಿ ಸೋತು ಹೊರ ಬೀಳುವ ತಂಡಗಳು ಕೂಡ ತಲಾ 40 ಸಾವಿರ ಡಾಲರ್ ಪಡೆಯಲಿವೆ.
ಮೊದಲ ಸುತ್ತಿನಲ್ಲಿ ಬಾಂಗ್ಲಾದೇಶ, ಐರ್ಲೆಂಡ್, ನಮೀಬಿಯಾ, ನೆದರ್ಲೆಂಡ್ಸ್, ಒಮಾನ್, ಪಿಎನ್ಜಿ, ಸ್ಕಾಟ್ಲೆಂಡ್ ಮತ್ತು ಶ್ರೀಲಂಕಾ ತಂಡಗಳಿವೆ. ಇನ್ನು, ಸೂಪರ್-12ರಲ್ಲಿ ಭಾರತ, ಪಾಕಿಸ್ತಾನ, ಅಫ್ಘಾನಿಸ್ತಾನ, ನ್ಯೂಜಿಲ್ಯಾಂಡ್, ದ.ಆಫ್ರಿಕಾ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ವೆಸ್ಟ್ ಇಂಡೀಸ್ ತಂಡಗಳಿವೆ.
ಇದನ್ನು ಓದಿ: ಮಾರಕ ಬೌಲರ್ಗೆ ಟೀಂ ಇಂಡಿಯಾ ಮಣೆ.. T-20 ವಿಶ್ವಕಪ್ ನೆಟ್ ಬೌಲರ್ ಆಗಿ ಉಮ್ರಾನ್ ಮಲಿಕ್ ಆಯ್ಕೆ
